សហរដ្ឋអាមេរិក ៖ តាមការលើកឡើងរបស់អនុប្រធានាធិបតីសហរដ្ឋអាមេរិក លោក JD Vance កាលពីថ្ងៃទី១៣ ខែសីហា ឆ្នាំ២០២៦ (ម៉ោងនៅសហរដ្ឋអាមេរិក) បានឱ្យដឹងថា អាទិភាពកំពូលរបស់សហរដ្ឋអាមេរិកនាពេលបច្ចុប្បន្នក្នុងសង្គ្រាមអ៊ីរ៉ង់ មិនមែនជាកម្មវិធីនុយក្លេអ៊ែរទៀតនោះទេ ប៉ុន្តែជាការធ្វើឱ្យតម្លៃប្រេងធ្លាក់ចុះសម្រាប់អ្នកប្រើប្រាស់អាមេរិក ខណៈរដ្ឋមន្ត្រីក្រសួងរតនាគារអាមេរិក លោក Scott Bessent បានបន្ថែមថា ទណ្ឌកម្មសេដ្ឋកិច្ចថ្មីដើម្បីដាក់គំនាបលើអ៊ីរ៉ង់នឹងកើតឡើងក្នុងពេលឆាប់ៗនេះ។
ការលើកឡើងរបស់មន្ត្រីជាន់ខ្ពស់អាមេរិកទាំងពីររូប បានបង្ហាញឱ្យឃើញពីឥទ្ធិពលដ៏ខ្លាំងក្លាដែលអ៊ីរ៉ង់ទទួលបាន តាមរយៈការបិទច្រកសមុទ្រហ័រមូស (Hormuz)។ លោក Vance បានថ្លែងនៅលើកញ្ចក់ទូរទស្សន៍ Fox News ថា ការរារាំងមិនឱ្យអ៊ីរ៉ង់ទទួលបានអាវុធនុយក្លេអ៊ែរ ដែលត្រូវបានលោកប្រធានាធិបតី ដូណាល់ ត្រាំ តែងលើកឡើងជានិច្ចថាជាមូលហេតុចម្បងរបស់លោកក្នុងការធ្វើសង្គ្រាមនោះ ឥឡូវនេះបានក្លាយជាអាទិភាព ទី២ហើយ បន្ទាប់ពីការធ្វើឱ្យការដឹកជញ្ជូនប្រេងដោយសេរីឡើងវិញតាមច្រកហ័រមូស ដែលជាច្រកសមុទ្រផ្គត់ផ្គង់ដឹកជញ្ជូនប្រេងដ៏សំខាន់។
អ៊ីរ៉ង់បានបិទច្រកសមុទ្រនេះស្ទើរតែទាំងស្រុងដើម្បីជាការសងសឹក ហើយតាមរយៈនេះ ពួកគេបានរកឃើញលក្ខខណ្ឌចរចាដ៏សំខាន់មួយប្រឆាំងនឹងលោក ត្រាំ ក្នុងខណៈពេលដែលលោកកំពុងតែប្រឹងប្រែងស្វែងរកផ្លូវចេញពីសង្គ្រាម និងកំពុងតែរារែកក្នុងការចាប់ផ្តើមការវាយប្រហារទ្រង់ទ្រាយធំឡើងវិញ។ ស្របពេលដែលការគាំទ្រពីពលរដ្ឋអាមេរិកសម្រាប់ប្រធានាធិបតីវ័យ៨០ឆ្នាំរូបនេះ ចំពោះសង្គ្រាមមួយនេះ កំពុងធ្លាក់ចុះយ៉ាងគំហុក ហើយការបោះឆ្នោតពាក់កណ្តាលអាណត្តិក៏កំពុងខិតជិតមកដល់នាខែវិច្ឆិកាខាងមុខនេះផងដែរ។ គណបក្សសាធារណរដ្ឋបារម្ភថា លោក ត្រាំ និងសង្គ្រាមអ៊ីរ៉ង់ ដែលបណ្តាលឱ្យតម្លៃប្រេងសាំងហក់ឡើងខ្ពស់ នឹងធ្វើឱ្យពួកគេបាត់បង់ការគ្រប់គ្រងក្នុងសភា។
លោក Vance បានបញ្ជាក់ប្រាប់ Fox News យ៉ាងដូច្នេះថា «ខ្ញុំដឹងថាថ្ងៃនេះតម្លៃប្រេងបានធ្លាក់ចុះ ហើយបានធ្លាក់ចុះខ្លាំងបើធៀបនឹងតម្លៃដ៏ខ្ពស់កាលពីថ្ងៃដំបូងនៃជម្លោះ។ នោះហើយជាគោលដៅទី១ គឺការរក្សាប្រេង និងហ្គាសឱ្យមានតម្លៃថោកសម្រាប់ពលរដ្ឋអាមេរិកនៅទូទាំងប្រទេស ហើយបន្ទាប់មក ជាក់ស្តែងណាស់ គោលដៅទី២ គឺធានាថា អ៊ីរ៉ង់មិនអាចទទួលបានអាវុធនុយក្លេអ៊ែរឡើយ»៕ ប្រភព ៖ AFP
ចែករំលែកព័តមាននេះ