អន្តរជាតិ ៖ តម្រូវការសកលសម្រាប់រថយន្តអគ្គិសនីបានកើនឡើងក្នុងរយៈពេល៥ខែជាប់គ្នាក្នុងខែកក្កដា ដោយសារការជំរុញពីកំណើនដ៏រឹងមាំក្នុងតំបន់អឺរ៉ុប ខណៈពេលដែលការលក់មានការធ្លាក់ចុះនៅក្នុងប្រទេសចិន និងតំបន់អាមេរិកខាងជើង។
យោងតាមការចេញផ្សាយពី Reuters ដោយស្រង់ទិន្នន័យពីទីភ្នាក់ងាររាយការណ៍តម្លៃ និងប្រឹក្សាយោបល់ Benchmark Mineral Intelligence (BMI) កាលពីថ្ងៃទី១៣ ខែសីហា ឆ្នាំ២០២៦ បានបង្ហាញថា ការលក់រថយន្តអគ្គិសនីសុទ្ធ (BEV) ព្រមទាំងរថយន្តកូនកាត់ម៉ាស៊ីនសាំង និងអគ្គិសនី (Plug-in Hybrid) ជាសកលក្នុងខែកក្កដាបានកើនឡើង ៩% ធៀបនឹងឆ្នាំមុន ពោលកើនឡើងដល់ ១,៨៥ លានគ្រឿង ដែលធ្វើឱ្យចំនួនលក់សរុបគិតចាប់តាំងពីដើមឆ្នាំរហូតមកទល់ពេលនេះ កើនដល់ ១១,៥ លានគ្រឿង។
តួលេខទាំងនេះបង្ហាញឱ្យឃើញកាន់តែច្បាស់ពីការដើរផ្ទុយគ្នារវាងទីផ្សាររថយន្តអគ្គិសនី ធំៗ នៅលើពិភពលោក ដោយក្នុងនោះការឧបត្ថម្ភធនពីរដ្ឋាភិបាលនៅក្នុងតំបន់អឺរ៉ុបបានជួយគាំទ្រដល់តម្រូវការទីផ្សារ ខណៈដែលទីផ្សារសហរដ្ឋអាមេរិកបានរងផលប៉ះពាល់ ដោយសារការលុបចោលការបន្ធូរបន្ថយពន្ធសហព័ន្ធលើរថយន្តអគ្គិសនី ហើយចំណែកឯបណ្តាក្រុមហ៊ុនផលិតរថយន្តចិនឯណោះវិញ ក៏កំពុងតែពឹងផ្អែកកាន់តែខ្លាំងលើការនាំចេញដើម្បីជំរុញកំណើន។
ទិន្នន័យពី BMI បានបង្ហាញថា ការលក់រថយន្តអគ្គិសនីនៅអឺរ៉ុបកើនឡើង ៣៣% ដល់ ៤៥ ម៉ឺនគ្រឿង ជំរុញឱ្យកំណើនសរុបចាប់តាំងពីដើមឆ្នាំរហូតដល់ពេលបច្ចុប្បន្នឡើងដល់ ២៨%។ កំណើនដ៏ខ្លាំងក្លានេះកើតឡើងដោយសារទីផ្សារធំៗ នៅអឺរ៉ុបទទួលបានមកវិញនូវគោលនយោបាយឧបត្ថម្ភធនលើរថយន្តអគ្គិសនីក្នុងរយៈពេល១៨ខែកន្លងមកនេះ។ តួយ៉ាង ទីផ្សារធំៗនៅអឺរ៉ុប ដូចជាប្រទេសបារាំងបានកត់ត្រាកំណើនលក់រថយន្តអគ្គិសនីចំនួន ៨១% អាល្លឺម៉ង់ ៤៦% និងចក្រភពអង់គ្លេស ៤៣%។
ផ្ទុយពីការកើនឡើងនៅអឺរ៉ុប ក្រឡេកទៅទីផ្សារនៅក្នុងប្រទេសចិនឯណោះវិញ ការលក់នៅក្នុងខែកក្កដាបានធ្លាក់ចុះ ៥% មកនៅត្រឹមប្រមាណ ៩៨ ម៉ឺនគ្រឿង។ ទន្ទឹមជាមួយគ្នានោះ ការលក់ក្នុងតំបន់អាមេរិកខាងជើងបានធ្លាក់ចុះ ២៧% នៅត្រឹម ១៤ ម៉ឺនគ្រឿង បន្ទាប់ពីការបញ្ចប់ការផ្តល់ឥណទានពន្ធលើរថយន្តអគ្គិសនីរបស់សហរដ្ឋអាមេរិក។ ប៉ុន្តែបើនិយាយអំពីការលក់សម្រាប់តំបន់ផ្សេងទៀតនៅជុំវិញពិភពលោក បានហក់ឡើងរហូតដល់ ៩៧% ពោលចំនួន ២៨ ម៉ឺនគ្រឿង៕
ចែករំលែកព័តមាននេះ