សូមប្រុងប្រយ័ត្ន! ការឆបោកក្រោមរូបភាពទិញទំនិញអនឡាញ
- ភ្នំពេញ
ការទិញទំនិញតាមអនឡាញ កំពុងក្លាយជាមធ្យោបាយដ៏ពេញនិយម ប៉ុន្តែអ្នកប្រើប្រាស់ក៏ត្រូវប្រុងប្រយ័ត្ន ចំពោះការឆបោកតាមអនឡាញផងដែរ ។ ជនខិលខូចអាចបង្កើត Page ឬគណនីលក់ទំនិញក្លែងក្លាយ ដើម្បីបញ្ឆោតឱ្យជនរងគ្រោះផ្ទេរប្រាក់ ប៉ុន្តែមិនទទួលបានទំនិញ ឬទទួលបានទំនិញមិនដូចការផ្សព្វផ្សាយ ។
យោងតាមនាយកដ្ឋានប្រឆាំងបទល្មើសបច្ចេកវិទ្យា អ្នកប្រើប្រាស់គួរសង្ស័យចំពោះសញ្ញាសំខាន់ៗ ដូចជា៖
១-តម្លៃថោកខ្លាំងខុសពីទីផ្សារ ជាពិសេស ថោកប្រមាណ ៥០% ទៅ ៧០%។
២-Page ទើបបង្កើតថ្មី ឬប្តូរឈ្មោះញឹកញាប់ ។
៣-បិទមុខងារ Comment ឬមាន Comment មិនធម្មតា ដូចៗគ្នា ដែលអាចជាគណនីក្លែងក្លាយ។
៤- បង្ខំឱ្យបង់ប្រាក់ជាមុន ឬផ្ទេរប្រាក់ទាំងអស់ មុនទទួលទំនិញ ។
៥-គណនីទទួលប្រាក់ជាឈ្មោះបុគ្គល មិនមែនជាឈ្មោះហាង ឬក្រុមហ៊ុន ។
៦-ជនឆបោកក៏អាចប្រើវិធីបង្កើតគេហទំព័រ ឬ Page ក្លែងក្លាយ បន្ទាប់មក ទាក់ទងជនរងគ្រោះតាម Messenger ឬ Telegram និងស្នើឱ្យផ្ទេរប្រាក់កក់ ឬបង់ប្រាក់ទាំងស្រុងតាម QR Code។ ក្រោយទទួលបានប្រាក់ ពួកគេអាចបិទទំនាក់ទំនង ឬទាមទារថ្លៃបន្ថែម មុនពេលបាត់ខ្លួន ។
ដើម្បីការពារខ្លួន អ្នកប្រើប្រាស់គួរ កុំជឿដោយងាយ កុំប្រញាប់ផ្ទេរប្រាក់ និងត្រូវផ្ទៀងផ្ទាត់ប្រភព អត្តសញ្ញាណអ្នកលក់ និងព័ត៌មានទំនាក់ទំនងឱ្យបានច្បាស់លាស់ មុនពេលសម្រេចចិត្តបញ្ជាទិញ។
សូមយកចិត្តទុកដាក់ តម្លៃថោកខុសធម្មតា ការទាមទារឱ្យបង់ប្រាក់ជាមុន និងគណនីទទួលប្រាក់មិនច្បាស់លាស់ គឺជាសញ្ញាដែលគួរឱ្យសង្ស័យ ។
ចែករំលែកព័តមាននេះ