ធ្វើសកម្មភាពឆក់ទូរស័ព្ទពីស្ត្រីម្នាក់បានសម្រេចហើយ ព្យាយាមជិះម៉ូតូគេចខ្លួន តែគេចមិនរួច
- កំពង់ស្ពឺ
ខេត្តកំពង់ស្ពឺ៖ យុវជនចំនួន២នាក់ត្រូវបានកម្លាំងនគរបាលស្រុកបរសេដ្ឋធ្វើការឃាត់ខ្លួន ខណៈដែលធ្វើសកម្មភាពឆក់ទូរសព្ទដៃពីស្ត្រីម្នាក់បានសម្រេច។ ហើយព្យាយាមជិះគេចខ្លួនប៉ុន្តែត្រូវបានសមត្ថកិច្ចដេញប្រផាប់ចាប់ប្រផីង ក៏ឃាត់ខ្លួនបានតែម្ដង។
ការឃាត់ខ្លួនក្រុមជនសង្ស័យបានធ្វើឡើងកាលពីព្រឹកថ្ងៃទី១៤ ខែសីហា ឆ្នាំ២០២៦ នៅតាមបណ្ដោយផ្លូវក្រាលកៅស៊ូ ស្ថិតនៅក្នុងភូមិតាមុឺន ឃុំទួលអំពិល ស្រុកបសេដ្ឋ ខេត្តកំពង់ស្ពឺ។
នគរបាលស្រុកបសេដ្ឋបាននិយាយឱ្យដឹងថា ក្រុមជនសង្ស័យដែលឃាត់ខ្លួនបានទី១-ឈ្មោះ ម៉ុន ពៅ ភេទប្រុស អាយុ២១ឆ្នាំ និងទី២-ឈ្មោះ ខុម តួ ភេទប្រុស អាយុ២០ឆ្នាំ ទាំង២នាក់ រស់នៅក្នុងភូមិសាច់ត្រី ឃុំភារីមានជ័យ ស្រុកបសេដ្ឋ ខេត្តកំពង់ស្ពឺ ។
នគរបាលស្រុកបសេដ្ឋបានបន្តថា៖ដោយអនុវត្ដតាមបទបញ្ជាការដឹកនាំដ៏ខ្ពង់ខ្ពស់លោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ និងការដឹកនាំចង្អុលការណ៍ផ្ទាល់ពីលោកវរសេនីយ៍ឯក ចន សុភីត អធិការនគរបាលស្រុកបសេដ្ឋ កម្លាំងជំនាញអធិការដ្ឋាននគរបាលស្រុកបសេដ្ឋបានចេញប្រតិបត្ដិការអន្ដរាគមន៍ករណីលួចមានស្ថានទម្ងន់ទោស (ឆក់ទូរស័ព្ទដៃ) នៅចំណុចលើផ្លូវក្រាលកៅស៊ូ ស្ថិតនៅក្នុងភូមិតាមុឺន ឃុំទួលអំពិល ស្រុកបសេដ្ឋ ដោយឃាត់ខ្លួនបានមមុខសញ្ញាធ្វើសកម្មភាពឆក់ទូរស័ព្ទដៃជាក់ស្ដែងបានចំនួន២នាក់ ដោយប្រេីប្រាស់មធ្យោបាយម៉ូតូ១គ្រឿងម៉ាកហុងដាសេ១២៥ ពណ៌ខ្មៅ ពាក់ផ្លាកលេខភ្នំពេញ1FW-7419 ។ ក្រោយធ្វេីសកម្មភាពឆក់ទូរស័ព្ទដៃពីជនរងគ្រោះឈ្មោះ ផល ថង ភេទស្រី អាយុ២៥ឆ្នាំ រស់នៅក្នុងភូមិសាច់ត្រី ឃុំភារីមានជ័យ ស្រុកបសេដ្ឋ ខេត្តកំពង់ស្ពឺ ។ ទូរស័ព្ទដៃដែលក្រុមជនសង្ស័យធ្វើសកម្មភាពឆក់បានម៉ាកIPhone14 ពណ៌ផ្កាឈូក ខណៈជនរងគ្រោះជិះម៉ូតូដោយដាក់ទូរស័ព្ទក្នុងហោប៉ាវខាងក្រោយ ។
នគរបាលស្រុកបសេដ្ឋ បានបញ្ជាក់ថាចំពោះជនសង្ស័យ២នាក់ សមត្ថកិច្ចបានដកហូតវត្ថុតាងរួមមានទូរសព្ទ័ម៉ាកដៃម៉ាក iPhone ១៤ពណ៌ផ្កាឈូករួចបានគោលការណ៍ប្រគល់ជូនជនរងគ្រោះវិញ។ ចំណែកមុខសញ្ញាទាំង២បានបញ្ជូនមកសួនាំនៅអធិការដ្ឋានស្រុកបសេដ្ឋ។ និងកសាងសំណុំរឿងបញ្ជូនទៅការិយាល័យជំនាញនៃស្នងការដ្ឋាននគរបាលខេត្តកំពង់ស្ពឺដើម្បីចាត់ការតាមផ្លូវច្បាប់ ៕
ចែករំលែកព័តមាននេះ