នាំគ្នាផ្លោះរបងកម្ពស់៣ម៉ែត្រចូលតំបន់ផ្ទះជួល លុះពលរដ្ឋឃើញទាន់ ចាប់បានម្នាក់ ប្រាប់មូលហេតុមួយនេះ
- ភ្នំពេញ
រាជធានីភ្នំពេញ ៖ ជនសង្ស័យម្នាក់ក្នុងចំណោមបក្សពួក២នាក់ ត្រូវបានប្រជាពលរដ្ឋឃាត់ខ្លួនប្រគល់អោយសមត្ថកិច្ចយកទៅសួរនាំ បន្ទាប់ពីជនសង្ស័យរូបនោះ បានផ្លោះរបងចូលតំបន់ផ្ទះជួល បំរុងលួចទ្រព្យសម្បត្តិ នៅវេលាម៉ោង៣និង៣០នាទីទៀបភ្លឺថ្ងៃទី១៤ ខែសីហា ឆ្នាំ២០២៦ នៅចំនុចផ្ទះជួលមួយកន្លែង ម្តុំផ្លូវទ្រុងមាន់ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ។
តាមប្រភពពីប្រជាពលរដ្ឋរស់នៅតំបន់ផ្ទះជួលបានអោយដឹងថា តំបន់ដែលពួកគាត់រស់នៅ ឧស្សាហ៍បាត់របស់របរដូចជាម៉ូតូជាដើម លុះនៅយប់ថ្ងៃកើតហេតុ ក៍ស្រាប់តែមានបុរសជនសង្ស័យ២នាក់ បានធ្វើសកម្មភាពផ្លោះរបងដែលមានកំពស់ជិត៣ម៉ែត្រ ចូលទៅក្នុងតំបន់ផ្ទះជួល ដោយបំរុងធ្វើសកម្មភាពលួចរបស់ទ្រព្យសម្បត្តិអ្នករស់នៅទីនោះ តែត្រូវបានប្រជាពលរដ្ឋរស់នៅម្តុំនោះឃើញទាន់ ស្រែកសួរនាំស្រាប់តែជនសង្ស័យម្នាក់ បានរត់ផ្លោះរបងរត់គេចបាត់ ។ ដោយបន្សល់ទុកបក្ខពួកម្នាក់ រួមទាំងវត្ថុតាង កូនសោចំនួន២ ត្រូវបានប្រជាពលរដ្ឋសហការគ្នាឃាត់ខ្លួន ហើយទាក់ទងសមត្ថកិច្ចអោយចុះមកទទួលយកទៅសួរនាំបន្តផងដែរ ។
ជនសង្ស័យបាននិយាយថា មកតាមគ្នាហើយមករកមិត្តភក្ដិតែប៉ុណ្ណោះ ។
ក្រោយកើតហេតុ ទោះខំប្រឹងប្រកែកយ៉ាងណា ជនសង្ស័យ ត្រូវបានសមត្ថកិច្ចនាំយកទៅសួរនាំនិងអនុវត្តនិតិវិធីនៅប៉ុស្តិ៍នគរបាលរដ្ឋបាលស្ទឹងមានជ័យទី៣ ៕
ចែករំលែកព័តមាននេះ