រុស្ស៊ី-ជប៉ុន ៖ រុស្ស៊ី និងជប៉ុន បានរិះគន់គ្នាខ្លាំងក្លា កាលពីថ្ងៃទី១៣ សីហា បន្ទាប់ពីទស្សនកិច្ចលើកដំបូងរបស់ប្រធានាធិបតី
រុស្ស៊ី លោកវ្ល៉ាឌីមៀរពូទីន នៅប្រជុំកោះគូរីលជាដែនដីមានទំនាស់គ្នាខ្លាំងក្លា រវាងប្រទេសទាំង២ក្រោយសង្គ្រាមលោកលោក
ទី២មក ។
ទំនាក់ទំនងរវាងរុស្ស៊ី និងជប៉ុន មានភាពតានតឹងជុំវិញកោះ៤នៃប្រជុំកោះនោះ ដែលកងទ័ពសូវៀតដណ្ដើមយកតាំងពីឆ្នាំ១៩៤៥ នាបណ្ដាថ្ងៃចុងក្រោយនៃសង្គ្រាមលោកលើកទី២មក ។ បន្ទាប់ពីធ្វើដំណើរទៅកាន់កោះសាខាលីននៅចុងបូព៌ារុស្ស៊ី ដែរមក លោកពូទីននាថ្ងៃទី១៣ សីហា បានទៅកាន់កោះ ITOUROUP ជាកោះ១ ក្នុងចំណោមកោះ៤ ដែលមានជម្លោះនាភាគភាគខាងត្បូង ប្រជុំកោះគូរីល ។ នៅទីនោះ លោកបានទស្សនារោងចក្រកែច្នៃត្រីមួយកន្លែង ។
នៅសាខាលីនលោកពូទីន បានដឹកនាំកិច្ចប្រជុំមួយស្ដីពីការធានារ៉ាប់រងសន្តិសុខនៅតាមព្រំដែនភាគខាងកើតរុស្ស៊ី ។ នេះបើតាមទីភ្នាក់ងារព័ត៌មានរុស្ស៊ី RIA NOVOSTI ។ នោះជាទស្សនកិច្ចលើកដំបូងរបស់លោកពូទីននៅដែនដីនេះ បន្ទាប់ពីទស្សនកិច្ចរបស់លោកឌីមីទ្រីម៉េដវេដេវកាលពីឆ្នាំ២០១០ ដែលលោកជាប្រធានាធិបតីរុស្ស៊ីដំបូងគេទៅកាន់ទីនោះ នាំឲ្យជប៉ុនខឹងសម្បាររួចមកហើយ ។
ក្រុងតូក្យូមានប្រតិកម្មខ្លាំងចំពោះទស្សនកិច្ចនេះរបស់លោកពូទីន នៅកោះ ITOUROUP ដោយនាយករដ្ឋមន្ត្រីជប៉ុន លោកស្រីសាណាអ៊ីតាកាអ៉ីជីថ្លែងថា ទស្សនកិច្ចនោះធ្វើឲ្យប៉ះពាល់ដល់អារម្មណ៍របស់ប្រជាជនជប៉ុន ដែលពិតជាមិនអាចទទួលយកបានឡើយ។ យើងតវ៉ាយ៉ាងម៉ឺងម៉ាត់ ។ ចំណែករដ្ឋមន្ត្រីការបរទេសជប៉ុនលោកតូស៊ីមីតស៊ូម៉ូតេហ្ស៊ីវិញ បានកោះហៅឯកអគ្គរដ្ឋទូតរុស្ស៊ី ប្រចាំប្រទេសជប៉ុន លោកនីកូឡៃណូសដ្រេវ ដើម្បីបញ្ជូនការតវ៉ាដ៏ខ្លាំងក្លាមួយ ។
ចំណែកអ្នកនាំពាក្យក្រសួងការបរទេសរុស្ស៊ី លោកស្រីម៉ារីយ៉ាហ្សាខារ៉ូវ៉ា បានបដិសេធថា នោះជាការរិះគន់ដែលគ្មានមូលដ្ឋាន ហើយបរិហារនយោបាយប្រឆាំងរុស្ស៊ីរបស់ជប៉ុន ក្នុងសេចក្ដីប្រកាសមួយលោកស្រីអះអាងថា អធិបតេយ្យភាពរបស់រុស្ស៊ី លើកោះទាំងនេះ គ្មានអ្វីគួរឲ្យសង្ស័យឡើយ ។ លោកស្រីបន្តថា បណ្ដាមេដឹកនាំជប៉ុនមិនអាចរារាំងថា តើតំបន់ណានៃដែនដីរុស្ស៊ីដែលមេដឹកនាំរបស់ខ្លួនអាច ឬមិនអាចទៅបំពេញទស្សនកិច្ចឡើយ ។
ពេលទៅកាន់តំបន់ប្រជុំកោះគូរីលបើកសមយុទ្ធជើងទឹករបស់កងនាវាចរណ៍ប៉ាស៊ីហ្វិករុស្ស៊ី លោកពូទីន កាលពីថ្ងៃទី១២ សីហាបានគំរាមតបចំពោះបណ្ដាប្រទេសដែលចាប់នាវានៃកងនាវាខ្មោចរបស់រុស្ស៊ី ដឹកប្រេងនិងទំនិញពង្វាងទណ្ឌកម្មពួកលោកខាងលិច ។ លោកហៅសកម្មភាពទាំងនោះថា ជាសកម្មភាពចោរសមុទ្រ និងអំពើប្លន់ ហើយលោកថ្លែងថា ប្រសិនបើមានរឿងបែបនេះ នោះរុស្ស៊ីនឹងតបតវិញប្រហាក់ប្រហែលគ្នានោះដែរ បើយល់ថាចាំបាច់និងសមស្របទោះជានៅទីណា រួមទាំងនៅក្នុងមហាសមុទ្រប៉ាស៊ីហ្វិកផងដែរ ៕
ចែករំលែកព័តមាននេះ