ដោះស្រាយរួចរាល់ហើយ! សល់២ផ្ទះទុកពេលឱ្យ៧ថ្ងៃត្រូវតែរុះរើ
- ភ្នំពេញ
រាជធានីភ្នំពេញ ៖ ផ្ទះចំនួន ២ខ្នងដែលរងផលប៉ះពាល់នៅក្នុងការស្ថាបនាផ្លូវបេតុងអតីតផ្លូវរថភ្លើង ត្រូវបានអាជ្ញាធរខណ្ឌឬស្សីកែវ ជូនដំណឹងឲ្យម្ចាស់រុះរើចេញដោយទុករយៈពេល៧ ថ្ងៃ បន្ទាប់ពីរដ្ឋបាលរាជធានីភ្នំពេញ បានឯកភាពដោះស្រាយដីចំនួន ៣ឡូតិ៍នៅតំបន់ អភិវឌ្ឍន៍ព្រែកអូរវែងជូនតាមសំណើរបស់លោកស្រី ជាម្ចាស់រួចហើយ។
តាមសេចក្តីជូនដំណឹងរបស់ រដ្ឋបាលខណ្ឌប្ញស្សីកែវ ស្តីពីការតម្រូវឱ្យរុះរើសំណង់ខ្នងផ្ទះ និងសម្ភារៈផ្សេងៗដែលប៉ះពាល់ដល់ការស្ថាបនាផ្លូវបេតុងថ្មី (អតីតផ្លូវ រថភ្លើង)ដែលបានជម្រាបជូន-លោក គឹម សីហា (តំណាងក្រុមគ្រួសារលោក គឹម ហួរ) អាសយដ្ឋានផ្លូវបេតុងថ្មី (អតីតផ្លូវរថភ្លើង) ភូមិទួលសង្កែ សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ និង លោកស្រី ម៉េង សុខា អាសយដ្ឋានផ្លូវបេតុងថ្មី (អតីតផ្លូវរថភ្លើង) ភូមិចុងខ្សាច់ សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញបានអោយដឹងថា គម្រោងស្ថាបនាផ្លូវបេតុងថ្មី (អតីតផ្លូវ រថភ្លើង) ដែលរដ្ឋបាលរាជធានីភ្នំពេញ បានដោះស្រាយផលប៉ះពាល់រួច និងស្ថាបនាជាផ្លូវបេតុងសម្រេចបានប្រមាណ ៩៨% ហើយនៅសល់ ២ទីតាំងប៉ុណ្ណោះ ដែលពុំទាន់រុះរើចេញ ក្នុងនោះមានទីតាំងលំនៅដ្ឋានរបស់ លោក-លោកស្រីផងដែរ ស្ថិតនៅភូមិចុងខ្សាច់ និងភូមិទួលសង្កែសង្កាត់ទួលសង្កែទី១។
រដ្ឋបាលរាជធានីភ្នំពេញ បានឯកភាពដោះស្រាយដីចំនួន ៣ឡូតិ៍នៅតំបន់ អភិវឌ្ឍន៍ព្រែកអូរវែងជូនតាមសំណើរបស់លោកស្រី ។
បច្ចុប្បន្នផ្លូវបេតុងថ្មី (អតីតផ្លូវរថភ្លើង) ដែលបានស្ថាបនាស្ទើរ រួចរាល់ទាំងស្រុងខាងលើ បាននឹងកំពុងប្រើប្រាស់ជាឧត្តមប្រយោជន៍ដល់បងប្អូនប្រជាពលរដ្ឋទូទៅធ្វើចរាចរទៅមក យ៉ាងមមាញឹក ប៉ុន្តែមានការកកស្ទះជាប្រចាំថ្ងៃ នៅត្រង់ចំណុចផ្លូវប្រសព្វមុខវត្តទួលសង្កែ ដោយហេតុទីតាំងលំនៅដ្ឋាន របស់លោកស្រីពុំទាន់រុះរើចេញនៅឡើយ ។
តាមសេចក្តីជូនដំណឹងបានឲ្យតឹងទៀតថា ដើម្បីចូលរួមចំណែកក្នុងការអភិវឌ្ឍន៍ហេដ្ឋារចនាសម្ព័ន្ធសាធារណៈ សម្រួលដល់ការធ្វើដំណើរ ទៅមករបស់បងប្អូនប្រជាពលរដ្ឋទូទៅ ក៏ដូចជាបញ្ចៀសការកកស្ទះចរាចរប្រចាំថ្ងៃ និងការស្ថាបនាសម្រេចផ្លូវបេតុងថ្មី (អតីតផ្លូវរថភ្លើង) ឱ្យបានរួចរាល់ជាស្ថាពររដ្ឋបាលខណ្ឌឫស្សីកែវ តម្រូវឲ្យ លោកស្រី រុះរើសំណង់ខ្នងផ្ទះ និងសម្ភារៈ ផ្សេងៗចេញពីដីផ្លូវខាងលើ ក្នុងរយៈពេល ០៧ថ្ងៃ គិតចាប់ពីថ្ងៃជូនដំណឹងនេះតទៅ ហើយសូមលោកស្រី មកទទួលយកដីឡូតិ៍ដែលរដ្ឋបាលរាជធានីភ្នំពេញ បានផ្តល់ជូនតាមរយៈមន្ត្រីទទួលបន្ទុកការងាររបស់រដ្ឋបាលខណ្ឌឫស្សីកែវ (ជារៀងរាល់ថ្ងៃធ្វើការ) ។ ក្នុងករណី លោកស្រី មិនសហការអនុវត្តតាមការណែនាំខាងលើ រដ្ឋបាលខណ្ឌ នឹងចាត់វិធាន ការរដ្ឋបាលចុះរុះរើដោយពុំទទួលខុសត្រូវលើការខូចខាត ឬបាត់បង់ផលប្រយោជន៍អ្វីឡើយ ។
គួរបញ្ជាក់ថា ផ្លូវបេតុងអតីតផ្លូវរថភ្លើង ត្រូវបានបើកការដ្ឋានស្ថាបនាតាំងពីចុងឆ្នាំ ២០១៦តាំងពីជំនាន់លោកប៉ា សុជាតិវង្សនៅជាអភិបាលរាជធានីភ្នំពេញ។នៅក្នុងការស្ថាបនាផ្លូវនេះប្រជាពលរដ្ឋដែលរងផលប៉ះពាល់បានផ្ទុះការតវ៉ាជាបន្តបន្ទាប់។
ក្រោយមកផ្លូវនេះត្រូវបានបង្រួមកាត់បន្ថយផលប៉ះពាល់ ។ ទោះបីជាយ៉ាងណា ប្រជាពលរដ្ឋមួយចំនួនបានឯកភាពទទួលយកនូវដំណោះស្រាយតែមួយចំនួននៅក្រាញ់ននៀល។លុះក្រោយមកក៏បានទទួលយកដំណោះស្រាយជាបន្តបន្ទាប់រហូតនៅសល់តែ២ផ្ទះដែលតម្រូវឲ្យរុះរើនៅពេលនេះ ។
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព ៕
ចែករំលែកព័តមាននេះ