ទីក្រុងហ្សាការតា ៖ ប្រទេសឥណ្ឌូណេស៊ីកំពុងរៀបចំបង្កើតប្រភេទទិដ្ឋាការ (Visa) ថ្មីមួយ សម្រាប់ផ្តល់ជូនអ្នកបង្កើតមាតិកាជនជាតិបរទេស ខណៈដែលរដ្ឋាភិបាលប្រទេសនេះ ចង់បែងចែកឱ្យបានច្បាស់លាស់រវាងការផលិតមាតិកាឌីជីថលបែបពាណិជ្ជកម្ម និងសកម្មភាពសារព័ត៌មាន។ នេះបើយោងតាមប្រភពពីសារព័ត៌មាន Vietnam Express (VnExpress) ចេញផ្សាយនៅថ្ងៃទី១៤ ខែសីហា ឆ្នាំ២០២៦។
បើតាម លោក Happy Reza Dipayuda ប្រធានអនុនាយកដ្ឋានសេវាកម្មទិដ្ឋាការ នៃអគ្គនាយកដ្ឋានអន្តោប្រវេសន៍ ស្ថិតក្រោមក្រសួងអន្តោប្រវេសន៍ឥណ្ឌូណេស៊ី បានលើកឡើងថា ទិដ្ឋាការប្រភេទ C5A ដែលបានស្នើឡើងនេះ នឹងត្រូវបង្កើតឡើងសម្រាប់ផ្តល់ជូនជនបរទេសដែលធ្វើដំណើរមកកាន់ប្រទេសឥណ្ឌូណេស៊ី ដើម្បីផលិតមាតិកាឌីជីថល រួមទាំងសកម្មភាពផ្សព្វផ្សាយពាណិជ្ជកម្ម និងការសហការជាមួយអាជីវកម្ម និងក្រុមហ៊ុនផ្សេងៗ។ ចំណែកទិដ្ឋាការអ្នកសារព័ត៌មានប្រភេទ C5 ដែលមានស្រាប់ នឹងបន្តផ្តល់ជូនជនបរទេសដែលចូលមកឥណ្ឌូណេស៊ី ដើម្បីបំពេញការងារជាអ្នកសារព័ត៌មាន។
លោកបានបន្ថែមថា អ្នកសារព័ត៌មាន និងអ្នកបង្កើតមាតិកា អាចផលិតមាតិកាបានដូចគ្នា គ្រាន់តែតួនាទី និងទំនួលខុសត្រូវខុសគ្នា ដោយអ្នកសារព័ត៌មានធ្វើការឱ្យស្ថាប័នប្រព័ន្ធផ្សព្វផ្សាយ ព្រមទាំងតម្រូវឱ្យអនុវត្តតាមស្តង់ដារវិជ្ជាជីវៈសារព័ត៌មាន ខណៈដែលអ្នកបង្កើតមាតិកាអាចផលិតមាតិកាសម្រាប់គោលបំណងពាណិជ្ជកម្ម។
លោកបានគូសបញ្ជាក់ថា ការកើនឡើងយ៉ាងឆាប់រហ័សនៃចំនួនអ្នកបង្កើតមាតិកាអន្តរជាតិ បានបង្ហាញអំពីតម្រូវការសម្រាប់ប្រភេទវីសាឯកទេសមួយ។ បើទោះបីជាអ្នកបង្កើតមាតិកាមិនមែនជាអ្នកសារព័ត៌មានក៏ដោយ ក៏ការងាររបស់ពួកគេអាចផ្សព្វផ្សាយទៅដល់មនុស្សរាប់លាននាក់ និងមានឥទ្ធិពលយ៉ាងខ្លាំងលើមតិសាធារណៈ ដូច្នេះហើយទិដ្ឋាការប្រភេទថ្មីដែលបានស្នើឡើង គឺមានបំណងផ្តល់នូវក្របខណ្ឌផ្លូវច្បាប់កាន់តែច្បាស់លាស់សម្រាប់សកម្មភាពបែបនេះ។
សំណើទិដ្ឋាការ C5A កំពុងតែត្រូវបានពិនិត្យដោយក្រសួងការបរទេសឥណ្ឌូណេស៊ី និងស្ថាប័នពាក់ព័ន្ធផ្សេងទៀត រហូតទាល់តែបទប្បញ្ញត្តិថ្មីនេះចូលជាធរមាននោះ អ្នកផលិតមាតិកាបរទេសដែលមកឥណ្ឌូណេស៊ី ត្រូវតែប្រើប្រាស់ទិដ្ឋាការសមស្របនឹងសកម្មភាពរបស់ពួកគេ ដូចជាទិដ្ឋាការ C14 សម្រាប់សកម្មភាពផលិតមាតិកាមួយចំនួន៕
ចែករំលែកព័តមាននេះ