អាជ្ញាធរស្រុកបាទី និងមន្ទីរការងារ កំពុងចុះសម្របសម្រួលដោះស្រាយយ៉ាងយកចិត្តទុកដាក់ជាមួយកម្មករជាង ២០នាក់ តវ៉ាបិទផ្លូវ ទាមទារប្រាក់ឈ្នួល
- តាកែវ
ខេត្តតាកែវ ៖ មានករណីភ្ញាក់ផ្អើលមួយបានកើតឡើង នៅវេលាម៉ោងប្រមាណ ១១:០០ នាទីព្រឹក ថ្ងៃទី១៤ ខែសីហា ឆ្នាំ២០២៦ នេះ ដោយក្រុមកម្មករជាង ២០នាក់ បាននាំគ្នាតវ៉ាធ្វើកូដកម្ម និងបិទផ្លូវ ដើម្បីទាមទារឱ្យថៅកែបើកប្រាក់ឈ្នួលជូនពួកគេ ដែលត្រូវបានអះអាងថា មិនទាន់ទទួលបានតាមការកំណត់នៅឡើយ។ ហេតុការណ៍តវ៉ានេះ បានកើតឡើងនៅចំណុចអគារសំណង់រោងចក្រមួយកន្លែង ស្ថិតនៅក្នុង ភូមិស្តុក ឃុំកុមារាជា ស្រុកបាទី ខេត្តតាកែវ។
ភ្លាមៗបន្ទាប់ពីទទួលបានព័ត៌មានខាងលើនេះ អាជ្ញាធរស្រុកបាទី សហការជាមួយ មន្ទីរការងារ និងបណ្តុះបណ្តាលវិជ្ជាជីវៈខេត្តតាកែវ បានចុះទៅដល់ទីតាំងកើតហេតុ ដើម្បីធ្វើការសម្របសម្រួល និងសម្រួលចរាចរណ៍ ដោយកំពុងបើកការដោះស្រាយរវាងភាគីកម្មករ និងតំណាងថៅកែរោងចក្រ យ៉ាងយកចិត្តទុកដាក់ និងទទួលខុសត្រូវខ្ពស់បំផុត ដើម្បីស្វែងរកដំណោះស្រាយសមស្រប និងធានាបាននូវយុត្តិធម៌ជូនបងប្អូនកម្មករ ៕
ចែករំលែកព័តមាននេះ