អ្នករៀបចំគម្រោងថវិកាអភិវឌ្ឍន៍ និងធ្វើសកម្មភាពផ្សេងៗសូមមានការប្រយ័ត្ន ហើយកុំចេះតែបំប៉ោងចំណាយ ដើម្បីបានចូលហោប៉ៅ ពីព្រោះរាស្ត្រនៅសម័យ២០២៦នេះ មិនដូចជា រាស្ត្រនៅសម័យមុនឡើយ ។ មន្ត្រីអស់តំណែងច្រើនគ្នាហើយ ដោយសារតែស្នាដៃរាស្ត្រ ពីព្រោះតែរឿងបំប៉ោងចំណាយ ហើយយកទៅចូលហោប៉ៅ ។
ក្រោយបែកធ្លាយករណីដាក់ដេញថ្លៃ បង្គោលភ្លើងសូឡា១ដើម ៨លានរៀល ឬប្រហែល ២.០០០ដុល្លារ នៅឃុំទឹកហូត ស្រុករលាប្អៀរ ខេត្តកំពង់ឆ្នាំង រាស្ត្ររិះគន់ពេញបណ្តាញសង្គម ។ បញ្ហានេះ គឺជាករណីបំប៉ោងចំណាយ ស្របពេលដែលបង្គោលសូឡា១ដើម ដែលមានរាងសមញ្ញបំផុតមិនគួរមានតម្លៃដល់ថ្នាក់នោះទេ ទើបសកម្មភាពនេះទទួលការរិះគន់ ហើយក្លាយជាប្រធានបទក្តៅរហូតដល់មន្ត្រីដែលពាក់ព័ន្ធបានទទួលពិន័យរដ្ឋបាល ។ ដោយសារតែរឿងអាស្រូវបែបនេះ មន្ត្រីជាន់ខ្ពស់នៅខេត្តកំពង់ឆ្នាំង ២រូបត្រូវអស់បុណ្យអស់ស័ក្តិ នៅក្នុងមួយពព្រិចភ្នែក ។
មន្ត្រីទាំងពីររូបនោះ គឺមានតំណែងជានាយកទីចាត់ការផែនការនិងវិនិយោគសាលាខេត្ត និងមួយរូបទៀតជានាយកទីចាត់ការអន្តរវិស័យសាលាខេត្ត ។ អ្នកទាំងពីរអស់បុណ្យស័ក្តិជាប្រធាន ដោយត្រូវដកតំណែងហើយក្លាយជាមន្ត្រីសាមញ្ញ ដោយម្នាក់ក្លាយជាមន្ត្រីការិយាល័យគ្រប់គ្រងបុគ្គលិកនៃទីចាត់ការគ្រប់គ្រងធនធានមនុស្សសាលាខេត្ត និងម្នាក់ក្លាយជាមន្ត្រីការិយាល័យគ្រប់គ្រងបុគ្គលិកនៃទីចាត់ការគ្រប់គ្រងធនធានមនុស្សសាលាខេត្ត ។
កុំចេះតែហ៊ាន ទម្រាំកសាងស្នាដៃហើយទទួលបានការទុកចិត្តហើយឡើងតំណែងមួយថ្នាក់ៗមិនមែនជារឿងងាយស្រួលឡើយ គឺត្រូវចំណាយពេលវេលា និងថាមពលក៏ដូចជា ថាមវ័ន្តការងារជាច្រើនណាស់ ហើយសុខៗអស់តំណែង បែបនេះវាគឺជារឿងមួយដែលគួរតែយកចិត្តទុកដាក់ ។
គេសង្ស័យថាថា ក្រៅពីគម្រោងដេញថ្លៃបង្គោលភ្លើងសូឡាថ្លៃ មិនសមរម្យនៅខេត្តកំពង់ឆ្នាំងនេះ គឺជាករណីតូចមួយប៉ុណ្ណោះ សព្វថ្ងៃនេះនៅតាមក្រសួងមន្ទីរនានា អាចនៅមានករណីបំប៉ោងចំណាយមិនសមហេតុផលបែបនេះមិនតិចឡើយ ។
សូមប្រុងប្រយ័ត្ន ហើយលើកកម្ពស់តម្លាភាពនៃគម្រោង ក្រៅពីនោះរាល់ការចំណាយគួរតែសមហេតុផល ។ យើងសរសេរគម្រោង គឺដើម្បីអភិវឌ្ឍន៍ប្រទេសមិនមែនសរសេរគម្រោងដើម្បីបំប៉ោងចំណាយ ហើយបានលុយយកមកអភិវឌ្ឍន៍តែមួយភាគតូច ហើយមួយភាគធំយកទៅចែកចាយចូលហោប៉ៅបានឡើយ ។ កុំអោយរាស្ត្រឫបុគ្គលិកដឹង ! ការធ្វើគម្រោងដែលបំប៉ោងសកម្មភាពបំប៉ោងថវិការក្រោមហេតុផលផលប្រយោជន៍ ហើយមានតម្លៃមិនសមរម្យ តែរាស្ត្រដឹង នោះអ្នកនឹងមានពិរុទ្ធហើយត្រូវទទួលខុសត្រូវមិនខាន ។
ការរៀបចំគម្រោងអភិវឌ្ឍន៍ និងការប្រើប្រាស់ថវិកាផ្សេងៗ គឺជាការទទួលខុសត្រូវដ៏ធ្ងន់ធ្ងររបស់មន្ត្រី និងអ្នកពាក់ព័ន្ធគ្រប់រូប ព្រោះថវិកាទាំងនោះជាថវិកាដែលកើតចេញពីធនធានជាតិ និងផលប្រយោជន៍របស់ប្រជាពលរដ្ឋ ។ រាល់ការរៀបចំគម្រោង ការកំណត់តម្លៃ និងការចំណាយ ត្រូវប្រកាន់ខ្ជាប់នូវគោលការណ៍សមហេតុផល តម្លាភាព ប្រសិទ្ធភាព និងគណនេយ្យភាព មិនត្រូវយកគម្រោងអភិវឌ្ឍន៍មកធ្វើជាមធ្យោបាយបំប៉ោងចំណាយ ឬបែងចែកផលប្រយោជន៍ផ្ទាល់ខ្លួនឡើយ។
ករណីដែលមានការរិះគន់ពាក់ព័ន្ធនឹងតម្លៃបង្គោលភ្លើងសូឡា គួរត្រូវបានចាត់ទុកជាមេរៀនសម្រាប់អ្នករៀបចំគម្រោងគ្រប់លំដាប់ថ្នាក់ថា ក្នុងសម័យដែលព័ត៌មានមានការផ្សព្វផ្សាយយ៉ាងឆាប់រហ័ស ហើយប្រជាពលរដ្ឋមានការចូលរួមតាមដានកាន់តែខ្លាំង ។ គ្រប់ការចំណាយរបស់រដ្ឋគួរតែអាចបកស្រាយបានយ៉ាងច្បាស់លាស់ និងអាចឆ្លើយតបចំពោះសំណួររបស់សាធារណជនបាន។ ការធ្វើអ្វីមួយដោយគិតថា រាស្ត្រមិនដឹង មិនមែនជាវិធីធានាសុវត្ថិភាពនៃការងារឡើយ ព្រោះនៅទីបំផុត តម្លាភាព និងការតាមដានពីសាធារណជនអាចបង្ហាញការពិតបាន។
ហេតុនេះ អ្នករៀបចំគម្រោង និងមន្ត្រីពាក់ព័ន្ធគួរតែមានការប្រុងប្រយ័ត្នខ្ពស់ ចាប់ពីការសិក្សាតម្រូវការ ការគណនាបរិមាណ ការកំណត់តម្លៃ ការដេញថ្លៃ រហូតដល់ការអនុវត្ត និងត្រួតពិនិត្យគម្រោង ។ រាល់ការចំណាយត្រូវមានមូលហេតុច្បាស់លាស់ មានឯកសារគាំទ្រ និងស្របតាមតម្លៃទីផ្សារ ដើម្បីធានាថា ថវិកាជាតិមួយរៀលៗត្រូវបានប្រើប្រាស់សម្រាប់អភិវឌ្ឍប្រទេស និងបម្រើប្រជាពលរដ្ឋឱ្យបានច្រើនបំផុត ។
ការឡើងកាន់តំណែងត្រូវការពេលវេលា សមត្ថភាព និងការខិតខំប្រឹងប្រែងជាច្រើនឆ្នាំ ប៉ុន្តែការបាត់បង់ការទុកចិត្តអាចកើតឡើងក្នុងរយៈពេលដ៏ខ្លី ប្រសិនបើមានការប្រព្រឹត្តខុសឆ្គង ឬបាត់បង់ភាពជឿជាក់ពីសាធារណជន ។ ដូច្នេះ មន្ត្រីគ្រប់រូបគួរយល់ថា តំណែងមិនមែនជាខែលការពារកំហុសទេ ហើយថវិការដ្ឋក៏មិនមែនជាទ្រព្យសម្បត្តិផ្ទាល់ខ្លួនដែរ។
យើងគួររួមគ្នាលើកកម្ពស់វប្បធម៌ការងារដែលផ្តល់តម្លៃដល់ភាពស្មោះត្រង់ តម្លាភាព គណនេយ្យភាព និងប្រសិទ្ធភាព ។ គម្រោងអភិវឌ្ឍន៍គួរត្រូវបានរៀបចំឡើង ដើម្បីឱ្យប្រជាពលរដ្ឋទទួលបានផលប្រយោជន៍ពិតប្រាកដ និងឱ្យប្រទេសជាតិមានការរីកចម្រើន មិនមែនដើម្បីបំប៉ោងថវិកា និងបែងចែកផលប្រយោជន៍ចូលហោប៉ៅបុគ្គលមួយចំនួនឡើយ។
ជាចុងក្រោយនេះ សូមអ្នករៀបចំគម្រោង និងមន្ត្រីពាក់ព័ន្ធគ្រប់រូប ចងចាំថា រាល់ថវិការដ្ឋដែលយើងកាន់កាប់ និងសម្រេចចំណាយ គឺជាការទទួលខុសត្រូវចំពោះប្រជាពលរដ្ឋ និងប្រទេសជាតិ។ កុំរង់ចាំដល់ពេលមានរឿងអាស្រូវ ទើបចាប់ផ្តើមប្រុងប្រយ័ត្ន ។ ការធ្វើការឱ្យត្រឹមត្រូវតាំងពីដំបូង គឺជាវិធីល្អបំផុតក្នុងការការពារកិត្តិយសរបស់ខ្លួន ការពារស្ថាប័ន និងការពារផលប្រយោជន៍ជាតិ ៕
ចែករំលែកព័តមាននេះ