ប្រទេសកូឡុំប៊ី ៖ ប្រតិបត្តិការរុករកអ្នកដែលអាចនៅរស់រានមានជីវិត ក្រោយការរញ្ជួយដីកម្លាំង៧,៤រីស្ទ័រ នៅភាគខាងលិចកូឡុំប៊ី កាលពីថ្ងៃទី១០ សីហា កំពុងបន្តទៀត មកដល់ថ្ងៃទី១២ សីហា ជាដំណាក់កាលសំខាន់បំផុត ។
ការរញ្ជួយដីនោះ មកទល់ថ្ងៃទី១២ សីហា ចំនួនអ្នកស្លាប់កើនដល់២៦៥នាក់ ហើយមនុស្សច្រើនរយនាក់នៅតែបាត់ខ្លួន ។ ការរញ្ជួយដីនោះ ដែលចំណុចកណ្ដាលរបស់វាស្ថិតនៅខេត្តក្រីក្រចូកូ ជាប់ឆ្នេរសមុទ្រប៉ាស៊ីហ្វិក ជាការរញ្ជួយដីសម្លាប់មនុស្សច្រើនបំផុតនៃសតវត្សនេះនៅកូឡុំប៊ី ។ ការរញ្ជួយដីនោះប៉ះពាល់ដល់ទីក្រុងជាច្រើននាភាគខាងលិចប្រទេស ពិសេស ក្រុងកាលីជាទីក្រុងធំទី៣របស់ប្រទេស និងទីក្រុងប៉េរេអ៉ឺរ៉ា ក្នុងតំបន់កាហ្វេ។
តាមពួកអ្នកជំនាញការថា រយៈពេលអាចរកឃើញអ្នកនៅរស់រានមានជីវិត ក្រោមគំនរបាក់បែកគឹត្រឹម៧២ម៉ោង ហើយរយៈពេលនោះត្រូវផុតនាព្រឹកថ្ងៃទី១៣ សីហា ។ នៅក្រុងកាលី និងក្រុងប៉េរេអ៉ីរ៉ា ដែលរងការប៉ះពាល់ខ្លាំងជាងគេ ដោយការរញ្ជួយដីនោះ បណ្ដាក្រុមអ្នកជួយសង្គ្រោះនិងក្រុមអ្នកស្ម័គ្រចិត្ត ខិតខំដល់យប់ទី៣កាយរុករកដោយដៃ និងដោយរថយន្តស្ទូច ដោយមានឆ្កែហិតក្លិនជាជំនួយ ប្ដូរវេនគ្នាប៉ុនប៉ងចាប់សញ្ញាបញ្ចេញដោយអ្នកដែលអាចនៅរស់រានមានជិវិតជាយថាហេតុ ។
ប្រធានាធិបតីកូឡុំប៊ី លោកអាបេឡាដូដឺឡាអេស្ព្រីយេឡា ដែលទើបចូលកាន់តំណែងកាលពីសប្ដាហ៍មុន នារសៀលថ្ងៃទី១២សីហាបានប្រកាសពីតួលេខថ្មី ដោយលើកឡើងពីចំនួនអ្នកស្លាប់ថា កើនដល់២៦៥នាក់ ជិត៣៥០០នាក់រងរបួស និង៥០០នាក់បាត់ខ្លួន ។ លំនៅឋានដល់ជាង១១.០០០រងការបំផ្លាញ ក្នុងគ្រោះមហន្តរាយនោះ ហើយមនុស្សច្រើនពាន់គ្រួសារបាត់បង់ទីជម្រក ។ លោកប្រកាសពីការកាន់ទុក្ខជាតិរយៈពេល៣ថ្ងៃ និងប្រកាសភាពអាសន្នខាងសេដ្ឋកិច្ចជាមធ្យោបាយអាចទាញយកមូលនិធិមិនបាច់ឆ្លងកាត់សភាមកប្រើប្រាស់ ៕
ចែករំលែកព័តមាននេះ