ក្រុមប្រឹក្សាអភិវឌ្ឍន៍កម្ពុជាបានអះអាង កាលពីថ្ងៃទី១៣ ខែសីហា ឆ្នាំ២០២៦ថា ក្រុមហ៊ុនបារាំងមួយកំពុងតែមានគម្រោងបង្កើតផ្សារបោះដុំកសិផល និងអាហារស្រស់កម្រិតអន្តរជាតិ ដែលមានទីតាំងនៅរាជធានីភ្នំពេញតែម្តង ។
ប្រភពដដែលបានអះអាងថា ក្រុមហ៊ុនបារាំងនេះ គឺក្រុមហ៊ុន SEMMARIS ដោយតំណាងក្រុមហ៊ុននេះ បានចុះមកកម្ពុជា ហើយបានជួបជាមួយនឹងមន្ត្រីកម្ពុជា និងអ្នកជំនាញមួយចំនួន ដោយរួមទាំងលោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា ។
នៅក្នុងជំនួបនោះ លោក ធៀរី ហ្វេវេ (Thierry Febvay) ប្រធានផ្នែកអភិវឌ្ឍន៍ នៃក្រុមហ៊ុននេះ បានអះអាងថា ចាប់ពីថ្ងៃទី៦ ដល់ថ្ងៃទី២១ ខែសីហា ឆ្នាំ២០២៦ ក្រុមហ៊ុនកំពុងតែជួប និងពិភាក្សាជាមួយនឹងអ្នកពាក់ព័ន្ធដើម្បីសម្របសម្រួល និងជំរុញការសិក្សាសមិទ្ធលទ្ធភាពលើគ្រប់ទិដ្ឋភាពបច្ចេកទេស ពាណិជ្ជកម្ម និងប្រតិបត្តិការ សម្រាប់គម្រោងអភិវឌ្ឍន៍ផ្សារបោះដុំកសិផល និងអាហារស្រស់កម្រិតអន្តរជាតិ ។
លោកបានបន្តថា ដោយមានបទពិសោធន៍នៅទីក្រុងប៉ារីស ប្រទេសបារាំង ដែលជាផ្សារបោះដុំអាហារស្រស់ដ៏ធំបំផុតមួយ ក្នុងពិភពលោក លោកបានបញ្ជាក់ពីបំណងក្នុងការនាំយកជំនាញបច្ចេកទេស ព្រមទាំងគម្រូនៃការរៀបចំ និងគ្រប់គ្រងស្តង់ដារអន្តរជាតិ មកចូលរួមអភិវឌ្ឍប្រព័ន្ធឡូជីស្ទីកកសិកម្មនៅកម្ពុជាផងដែរ។
នៅពេលនេះ កម្ពុជាជាប្រទេសកសិកម្ម ហើយនៅមានសក្តានុពលអភិវឌ្ឍន៍ដំណាំកសិកម្មជាច្រើនប្រភេទ ប៉ុន្តែវិស័យនេះប្រឈមមុខនឹងបញ្ហាមួយចំនួន ជាពិសេស គឺកង្វះទីផ្សារ ៕
ចែករំលែកព័តមាននេះ