មន្ទីរបរិស្ថានខេត្តព្រះវិហារ បង្ក្រា.បបទល្មើសព្រៃឈើ និងទប់ស្កាត់ការទន្ទ្រានដីព្រៃខុសច្បាប់ ក្នុងប្រតិបត្តិការល្បាត ៣ថ្ងៃ
- ព្រះវិហារ
ខេត្តព្រះវិហារ៖ មន្ទីរបរិស្ថានខេត្តព្រះវិហារ សហការជាមួយអាជ្ញាធរមូលដ្ឋាន អង្គការ WCS និងសហគមន៍ បានចុះប្រតិបត្តិការល្បាតរយៈពេល៣ថ្ងៃជាប់ៗគ្នាចាប់ពីថ្ងៃទី១០ ដល់ថ្ងៃទី១២ ខែសីហា ឆ្នាំ២០២៦ ដោយសម្រេចបានលទ្ធផលសំខាន់ៗក្នុងការបង្ក្រាបបទល្មើសធនធានធម្មជាតិ និងការការពារសត្វព្រៃកម្រ ក្នុងដែនជម្រកសត្វព្រៃ «គូលែន-ព្រហ្មទេព» និង «ឆែប-ព្រះរការ»។
ប្រតិបត្តិការនេះ ដឹកនាំផ្ទាល់ដោយ លោក មឿន សុភេទ ប្រធានមន្ទីរបរិស្ថានខេត្តព្រះវិហារ ដោយមានការចូលរួមពីមន្ត្រីឧទ្យានុរក្ស តំណាងរដ្ឋបាលស្រុក ក្រុមការងារអង្គការសង្គ្រោះសត្វព្រៃ (WCS) និងប្រជាសហគមន៍ ក្នុងតំបន់ព្រៃសហគមន៍ការពារធម្មជាតិត្មាប៉ើយ (ស្រុកជាំក្សាន្ត) និងដែនជម្រកសត្វព្រៃឆែប-ព្រះរការ (ស្រុកឆែប)។
លទ្ធផលសំខាន់ៗនៃប្រតិបត្តិការល្បាត ៣ថ្ងៃ៖ការទប់ស្កាត់ដីព្រៃ៖ ក្រុមការងារបានរកឃើញ និងវ៉ៃឃ្លុំបេឡាដីរងការទន្ទ្រានខុសច្បាប់នៅចំណុច «ស្រះព្រីង» ដែលជាទីតាំងស្រះបុរាណ និងទួលប្រាសាទបុរាណ ដើម្បីកសាងសំណុំរឿងអនុវត្តតាមនីតិវិធីច្បាប់។
ការបង្ក្រាបឈើប្រណីត៖ បានឃាត់ទុកគោយន្តកែច្នៃដឹកឈើចំនួន ២គ្រឿង ដឹកឈើប្រភេទឈើទាល និងស្រឡៅ សរុប ៧៥សន្លឹក (ជនសង្ស័យបានរត់គេចខ្លួន)។ បច្ចុប្បន្ន វត្ថុតាងត្រូវបាននាំយកទៅរក្សាទុកនៅស្នាក់ការ «ដំរីបូត» ដើម្បីបន្តនីតិវិធី។
ការស្រាវជ្រាវបទល្មើសកាប់ឈើ៖ រកឃើញគល់ឈើចំនួន ៨គល់ ដែលជនសង្ស័យបានលួចកាត់ ជ្រៀក និងដឹកចេញកាលពីដើមឆ្នាំ២០២៦។ អាជ្ញាធរកំពុងបន្តស្រាវជ្រាវស្វែងរកមុខសញ្ញាដើម្បីយកមកផ្តន្ទាទោស។ពាក់ព័ន្ធករណីខាងលើសុំត្ថកិច្ចបានប្រមូលនិងដកហូតអន្ទាក់សត្វព្រៃ ព្រមទាំងឧបករណ៍នេសាទខុសច្បាប់បានចំនួន ២ឈុត។
ក្រៅពីកិច្ចការបង្ក្រាបបទល្មើស ក្រុមការងារល្បាតក៏បានប្រទះឃើញស្នាមជើងសត្វព្រៃសំខាន់ៗជាច្រើន រួមមាន ស្នាមជើងដំរីមេ និងកូន, ជ្រូកព្រៃ, ស្វាន និង ប្រភេទសត្វស្លាបកម្រៗ ជាច្រើនប្រភេទ នៅចំណុច «ស្រះខ្នា» នៃដែនជម្រកសត្វព្រៃឆែប-ព្រះរការ។
លោកប្រធានមន្ទីរបរិស្ថានបានគូសបញ្ជាក់ថា «ស្រះខ្នា» គឺជាប្រភពទឹកដ៏សំខាន់ និងជាគោលដៅយុទ្ធសាស្ត្រនៃការអភិរក្សសត្វព្រៃ រួមមាន ដំរី ស្វាន ឈ្លូស ទន្សោង និងជ្រូកព្រៃ។ ផ្អែកតាមទិន្នន័យស្រាវជ្រាវកន្លងមករបស់អង្គការ WCS តាមរយៈកាមេរ៉ាសុវត្ថិភាព (Camera Trap) បានបង្ហាញថា តំបន់ស្រះខ្នានេះ មានសត្វទន្សោងប្រមាណ ៣០ក្បាល, ដំរីព្រៃចន្លោះពី ១៥ ទៅ ២០ក្បាល ព្រមទាំងសត្វព្រៃកម្រផ្សេងៗទៀត តែងតែចេញចូលរកស៊ីជាប្រចាំ។
មន្ទីរបរិស្ថានខេត្តព្រះវិហារ បានអះអាងសារជាថ្មីពីបេសកកម្មរបស់ខ្លួន ក្នុងការបន្តពង្រឹងការអនុវត្តច្បាប់យ៉ាងម៉ឺងម៉ាត់ ដើម្បីបង្ក្រាបបទល្មើសធនធានធម្មជាតិ និងការពារជម្រកសត្វព្រៃឱ្យបានគង់វង្ស សម្រាប់ជាសម្បត្តិបេតិកភណ្ឌដល់កូនចៅជំនាន់ក្រោយ៕
ចែករំលែកព័តមាននេះ