ទីក្រុងអង់ការ៉ា៖ យន្តហោះម៉ាកអែហ្វ១៦របស់ប្រទេសតួកគីមួយគ្រឿងកំពុងហោះហើរហ្វឹកហាត់អាកាសយានិកសុខៗស្រាប់តែធ្លាក់នៅខេត្តយ៉ាឡូវ៉ា ភាគពាយព្យប្រទេសនេះ។ អាជ្ញាធរតួកគីមិនទាន់បញ្ចេញរបាយការណ៍លម្អិតជាផ្លូវការអំពីឧបទ្ទវហេតុនេះទេ ហើយក៏មិនទាន់ដឹងថាតើហេតុការណ៍នេះបណ្ដាលឱ្យមនុស្សប៉ុន្មាននាក់រងរបួស ឬបាត់បង់ជីវិតនោះដែរ។
ក្រសួងការពារជាតិតួកគីសរសេររៀបរាប់នៅក្នុងសេចក្ដីប្រកាសរបស់ខ្លួនថាយន្តហោះម៉ាកអែហ្វ១៦មួយគ្រឿងបានធ្លាក់ពិតមែននៅពេលចូលរួមវគ្គបណ្ដុះបណ្ដាលសិក្ខាកាមនៅទីក្រុងយ៉ាឡូវ៉ា។ អាកាសយានិកអាចចុចគន្លឹះឆ័ត្រយោងដើម្បីរំដោះខ្លួនរួចផុតពីគ្រោះថ្នាក់ទាន់ពេលវេលាមុនពេលយន្តហោះផ្ទុះឆេះយ៉ាងសន្ធោសន្ធៅ។ គាត់អាចរួចផុតពីសេចក្ដីស្លាប់។ នេះបើយោងតាមការចុះផ្សាយរបស់សារព័ត៌មានតួកគី Hürriyet។
ក្រសួងការពារជាតិសរសេររៀបរាប់បន្តទៀតថាយន្តហោះអែហ្វ១៦ធ្លាក់នៅពេលហ្វឹកហាត់នៅខេត្តយ៉ាឡូវ៉ា។ អាកាសយានិករបស់យើងបានចុចគន្លឹះឆ័ត្រយោងរំដោះខ្លួនពីគ្រោះថ្នាក់នោះដោយសុវត្ថិភាព។ មូលហេតុនៃការធ្លាក់យន្តហោះនោះមិនទាន់ដឹងនៅឡើយទេ ហើយក្រសួងនឹងកំណត់អំពីបញ្ហានេះនៅពេលបើកការស៊ើបអង្កេតដ៏លម្អិត។ ប្រភពខ្លះថាយន្តហោះនោះធ្លាក់ចូលទៅក្នុងទឹកសមុទ្រ ហើយបង្កជាការផ្ទុះដ៏ខ្លាំងក្លាមួយ។
គេឃើញផ្សែងដ៏ខ្មៅងងឹតហោះហើរចេញពីទីកន្លែងផ្ទុះដែលអាចមើលឃើញពីគ្រប់ជ្រុងទាំងអស់ដែលនៅមិនឆ្ងាយប៉ុន្មានពីទីនោះ។ ជាថ្មីម្ដងទៀត អាជ្ញាធរមិនទាន់ដឹងអំពីមូលហេតុនៃការធ្លាក់យន្តហោះនេះនៅឡើយទេ។ គេឃើញរថយន្តគិលានសង្គ្រោះ (ឡានពេទ្យ) និងក្រុមគ្រូពេទ្យចុះទៅកន្លែងកើតហេតុជាបន្តបន្ទាប់។ អាជ្ញាធរពាក់ព័ន្ធនានានឹងចេញផ្សាយរបាយការណ៍លម្អិតក្រោយពេលដំណើរការស៊ើបអង្កេតត្រូវបានបិទបញ្ចប់៕ ប្រភព៖ Reuters និងប្រភពដទៃទៀត
ចែករំលែកព័តមាននេះ