លោក ហង់ជួន ណារ៉ុន ឧបនាយករដ្ឋមន្ត្រី និងជារដ្ឋមន្ត្រីក្រសួងអប់រំ យុវជន និងកីឡា បានអះអាងថា មណ្ឌលកំណែវិញ្ញាសារប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប ឆ្នាំ២០២៦ គឺមាននៅទីតាំង១១ កន្លែងនៅរាជធានីភ្នំពេញ ។
តាមការអះអាងរបស់លោករដ្ឋមន្ត្រីមណ្ឌលកំណែទាំងនោះ មានទីតាំងនៅវិទ្យាល័យបាក់ទូក, វិទ្យាល័យជាស៊ីមសន្ធរម៉ុក និងមណ្ឌលបឋមសិក្សាសន្ធរម៉ុក, វិទ្យាល័យជាស៊ីមសាមគ្គី, វិទ្យាល័យព្រះស៊ីសុវត្ថិ, អនុវិទ្យាល័យចតុមុខ, វិទ្យាល័យ ហ៊ុន សែន ប៊ុនរ៉ានី វត្តភ្នំ, វិទ្យាល័យទួលទំពូង, វិទ្យាល័យបឹងត្របែក, វិទ្យាល័យជាស៊ីមបឹងកេងកង និងវិទ្យាល័យព្រះយុគន្ធរ ។
លោកបានបន្តថា ស្របពេលជាមួយគ្នានេះ ដំណើរការកំណែសន្លឹកកិច្ចការបេក្ខជននៅតាមមណ្ឌលកំណែនីមួយៗនឹងត្រូវប្រព្រឹត្តទៅក្រោមការយកចិត្តទុកដាក់បំផុតលើគោលការណ៍ «អ្នកចេះគឺជាប់» ដោយមានការចូលរួមយ៉ាងសកម្មពីគណៈកម្មការកំណែ និងការតាមដានត្រួតពិនិត្យពីអង្គភាពប្រឆាំងអំពើពុករលួយ (ACU) ដើម្បីធានាបាននូវតម្លាភាព យុត្តិធម៌ និងលទ្ធផលដែលស្របតាមសមត្ថភាពពិតប្រាកដរបស់បេក្ខជនម្នាក់ៗ។
លោកបានបន្តថា បន្ទាប់ពីបញ្ចប់វគ្គកំណែ ក្រសួងនឹងបន្តឈានចូលដល់វគ្គស្រង់ បញ្ចូល និងបូកពិន្ទុតាមប្រព័ន្ធកុំព្យូទ័រ ដោយមានការផ្ទៀងផ្ទាត់យ៉ាងប្រុងប្រយ័ត្នបំផុត មុននឹងឈានទៅដល់ការប្រកាសលទ្ធផលជាផ្លូវការ។
តាមការគ្រោងទុក ក្រសួងបានកំណត់យកថ្ងៃទី២ ខែកញ្ញា ឆ្នាំ២០២៦ សម្រាប់ប្រកាសលទ្ធផលប្រឡង តាមមណ្ឌលសំណេរនៃរាជធានី-ខេត្តទាំង២៥ នៅទូទាំងប្រទេស ៕
ចែករំលែកព័តមាននេះ