ប្រទេសព័រទុយហ្គាល់ ៖ កីឡាករបាល់ទាត់ដ៏ឆ្នើម Cristiano Ronaldo បានរៀបការជាមួយដៃគូដ៏យូរអង្វែងរបស់ខ្លួន គឺកញ្ញា Georgina Rodríguez ដែលជាម៉ូដែល នៅក្នុងពិធីអាពាហ៍ពិពាហ៍តាមផ្លូវច្បាប់មួយ នៅក្នុងប្រទេសព័រទុយហ្គាល់។ នេះបើតាមប្រភពពី BBC ចេញផ្សាយនៅថ្ងៃទី១២ ខែសីហា ឆ្នាំ២០២៦។
ខ្សែប្រយុទ្ធឆ្នើមក្រុមជម្រើសជាតិព័រទុយហ្គាល់ និងក្លិប Al Nassr វ័យ៤១ឆ្នាំរូបនេះ បានបង្ហោះរូបភាពមួយនៅលើគណនី Instagram ផ្ទាល់ខ្លួន ដោយបង្ហាញពីដៃដែលបានគេសន្មតថាជាដៃរបស់លោកនៅពីលើដៃភរិយា (Georgina) ហើយដៃទាំងពីរនាក់សុទ្ធតែមានពាក់ចិញ្ចៀនអាពាហ៍ពិពាហ៍។
ក្រឡេកទៅប្រព័ន្ធផ្សព្វផ្សាយព័រទុយហ្គាល់បានហៅព្រឹត្តិការណ៍នេះថា អាពាហ៍ពិពាហ៍ប្រចាំឆ្នាំ ដោយបានរាយការណ៍ថា គូស្នេហ៍១គូនេះ បានដឹកដៃគ្នាចូលរោងការកាលពីថ្ងៃទី១១ ខែសីហា ឆ្នាំ២០២៦ ស្ថិតនៅក្នុងទីក្រុងជាប់មាត់សមុទ្រ Cascais នៅក្បែរទីក្រុង Lisbon ព្រមទាំងវត្តមានកូនៗទាំង ៥ នាក់របស់ពួកគេផងដែរ។
ការបង្ហោះនៅលើ Instagram នោះទទួលបានការចុចចូលចិត្ត (Like) ជាង ៣លានដង ក្នុងរយៈពេលត្រឹមតែ ៣០នាទីប៉ុណ្ណោះ បន្ទាប់ពីត្រូវបានបង្ហោះ។ គូស្នេហ៍១គូនេះបានរួមរស់ជាមួយគ្នាអស់រយៈពេល ១០ ឆ្នាំមកហើយ បន្ទាប់ពីពួកគេបានជួបគ្នាដំបូងបង្អស់នៅហាងទំនិញប្រណីត Gucci មួយកន្លែងនៅក្នុងទីក្រុង Madrid ប្រទេសអេស្ប៉ាញ ដែលកាលនោះ Georgina ដែលជាកូនកាត់អេស្ប៉ាញ-អាហ្ស់ងទីន ជាបុគ្គលិកបម្រើការងារនៅទីនោះ ចំណែក Ronaldo កំពុងប្រកបអាជីពជាមួយក្លិប Real Madrid។
ពួកគេបានប្រកាសពីភ្ជាប់ពាក្យ កាលពីថ្ងៃទី១១ ខែសីហា ឆ្នាំ ២០២៥ ដោយពេលនោះ Georgina Rodríguez បានបង្ហោះរូបចិញ្ចៀនពេជ្រដ៏ធំ១រង់ រួមជាមួយការសរសេរជាភាសាអេស្ប៉ាញថា «ចាស! អូនយល់ព្រមហើយ។ ទាំងក្នុងជាតិនេះ និងគ្រប់ជាតិរបស់អូន»៕
ចែករំលែកព័តមាននេះ