ព្រះសង្ឃក្នុងខេត្តសៀមរាប បន្តនាំយកគ្រឿងឧបភោគបរិភោគ និងថវិកា ឧបត្ថម្ភជូនដល់កងទ័ពការពារព្រំដែនក្នុងខេត្តព្រះវិហារ
- សៀមរាប
ខេត្តសៀមរាប ៖ ក្នុងស្មារតីសាមគ្គីជាតិ និងដើម្បីជាការលើកទឹកចិត្តដល់កងកម្លាំងប្រដាប់អាវុធ ដែលកំពុងឈរជើងការពារទឹកដីនៅតាមខ្សែបន្ទាត់ព្រំដែនកម្ពុជា-ថៃ ក្នុងភូមិសាស្ត្រខេត្តព្រះវិហារ នៅថ្ងៃទី៩ ខែសីហា ឆ្នាំ២០២៦នេះ ព្រះគ្រូចៅអធិការតាមបណ្តាវត្តនឹងលោកតា លោកយាយ ញាតិពុទ្ធបរិស័ទ ក្នុងខេត្តសៀមរាប បាននិមន្ត និងចូលរួម នាំយកអំណោយជាគ្រឿងឧបភោគបរិភោគ សម្ភារប្រើប្រាស់ និងថវិកាមួយចំនួនជូនដល់បងប្អូនកងទ័ពជួរមុខដោយផ្ទាល់។
ព្រះយសោធរញ្ញាណ ឡោម សុឈាត ព្រះចៅអធិការវត្ត ព្រះសិអារ្យ មានថេរដីកាថា សកម្មភាពមនុស្សធម៌ដ៏ប្រពៃនេះ បានស្ដែងឱ្យឃើញពីការផ្សារភ្ជាប់យ៉ាងជិតស្និទ្ធរវាង «ពុទ្ធចក្រ និង អាណាចក្រ» ជាពិសេសគឺទឹក ព្រះទ័យរបស់ព្រះសង្ឃខ្មែរ និង ពុទ្ធបរិស័ទ ដែលតែងតែគិតគូរ និងដឹងគុណចំពោះវីរភាពរបស់កងទ័ពជួរមុខ ដែលបានលះបង់កម្លាំង កាយចិត្ត សេចក្ដីសុខផ្ទាល់ខ្លួន ក្នុងការការពារបូរណភាពទឹកដី និងសេចក្ដីសុខសាន្តរបស់ប្រជាពលរដ្ឋនៅផ្ទៃក្នុងប្រទេស។
ព្រះអង្គ មានថេរដីការ បញ្ជាក់ថា ទោះបីជាអំណោយទាំង នេះមានចំនួនមិនច្រើនលើសលប់ ប៉ុន្តែវាជាសេចក្ដីជ្រះថ្លា និងជាទឹកចិត្តរួមគ្នារវាងព្រះបសង្ឃ និង ពុទ្ធបរិស័ទ ដើម្បីជាកម្លាំងចិត្តដល់បងប្អូនកងទ័ពឲ្យដឹងថា ប្រជាជននៅសមរ ភូមិក្រោយ តែងតែនៅក្បែរ និងគាំទ្របងប្អូនសមរភូមិមុខជានិច្ច ។
ព្រះគ្រូបានបន្តថា នេះជាទឹកចិត្តសប្បុរសធម៌ ក្នុងស្មារតីចែករំលែករបស់សប្បុរសជន ដែលបានបរិច្ចាគដោយ ស្ម័គ្រចិត្ត ហើយទោះបីជាគ្រឿង ឧបភោគ បរិភោគទាំងនេះមានចំនួនមិនច្រើន លើស លប់ ប៉ុន្តែវាជាសក្ខីកម្មបញ្ជាក់ពីសាមគ្គី ភាព និងជាកម្លាំងចិត្តដ៏កក់ក្ដៅ ជូនដល់កង កម្លាំងជួរមុខរបស់យើងឱ្យបន្តស្មារតីស្នេហាជាតិដ៏រឹងមាំតទៅមុខទៀត ។
លោកស្រី បន្តថា សាមគ្គីភាពរវាងសមរភូមិក្រោយ និង សមរ ភូមិមុខ គឺបង្ហាញពីការយកចិត្តទុកដាក់ និងការគាំទ្រផ្នែកស្មារតីយ៉ាងរឹងមាំពីសំណាក់ព្រះសង្ឃ អាជ្ញាធរមូលដ្ឋាន ផ្ញើជូនទៅដល់កងទ័ពដែលកំពុងបំពេញភារកិច្ចការពារបូរណភាពទឹកដី ។
ក្នុងនោះដែរ តំណាងកងទ័ពនៅជួរមុខ បានសម្ដែងនូវសេចក្ដីត្រេកអរ និង ដឹងគុណយ៉ាងជ្រាលជ្រៅបំផុតចំពោះព្រះទ័យរបស់ព្រះសង្ឃគ្រប់ព្រះអង្គនិង ពុទ្ធបរិស័ទទាំងអស់។ ទឹកចិត្តដ៏ថ្លៃថ្លានេះ គឺជាការជួយជម្រុញស្មារតីបងប្អូនយុទ្ធជនឱ្យកាន់តែមានសេចក្ដីក្លាហាន និងប្ដេជ្ញាចិត្តខ្ពស់ក្នុងការបំពេញភារកិច្ចការពារជាតិមាតុភូមិ៕
ចែករំលែកព័តមាននេះ