ប្រឡងបាក់ឌុបឆ្នាំ២០២៦នេះ ខេត្តពោធិ៍សាត់មានបេក្ខជនជិត ៤ពាន់នាក់
- ពោធិ៍សាត់
ខេត្តពោធិ៍សាត់៖ លោក អ៊ឹម កុច រដ្ឋលេខាធិការ ក្រសួងអប់រំ យុវជន និងកីឡា ប្រធានគណៈមេប្រយោគប្រចាំខេត្តពោធិ៍សាត់ និង លោក ខូយ រីដា អភិបាល នៃគណៈអភិបាលខេត្ត បានអញ្ជើញបើកហិប និងកាត់ស្រោមវិញ្ញាសាប្រឡងសញ្ញាបត្រមធ្យមសិក្សាទុតិយភូមិ នាសម័យប្រឡងថ្ងៃទី១០ ខែ សីហា ឆ្នាំ២០២៦ នៅមណ្ឌលប្រឡងវិទ្យាល័យពោធិ៍សាត់។
ក្នុងឱកាសនោះក៏មានការចូលរួមពីលោកអភិបាលរងខេត្ត មេបញ្ជាការកងកម្លាំងប្រដាប់អាវុធ ប្រធានមន្ទីរអង្គភាពនានា អភិបាលក្រុងពោធិ៍សាត់ និងតំណាងអង្គភាពប្រឆាំងអំពើពុករលួយ (ACU) ដើម្បីធ្វើជាសាក្សី បញ្ជាក់ពីភាពស្អាតស្អំ ភាពត្រឹមត្រូវ និងតម្លាភាពក្នុងការប្រឡងផងដែរ។
លោក លឹម វុទ្ធី ប្រធានមន្ទីរអប់រំយុវជននិងកីឡាខេត្ត បានឲ្យដឹងថា បេក្ខជនដែលមានឈ្មោះក្នុងបញ្ជីប្រឡងសញ្ញាបត្រមធ្យមសិក្សាទុតុយភូមិ សម័យប្រឡងថ្ងៃទី១០ខែសីហាឆ្នាំ២០២៦នេះ សរុបទូទាំងខេត្តពោធិ៍សាត់មានចំនួន៣៦៦៩នាក់ ស្រី២១៥៥នាក់ ក្នុងនោះបេក្ខជនជាព្រះសង្ឃមានចំនួន១៥អង្គ។ ចែកចេញជា០៦មណ្ឌលសំណេរ និងថ្នាក់វិទ្យាសាស្ត្រមាន០១មណ្ឌល។ ១.មណ្ឌលអនុវិទ្យាល័យព្រែកស្ដី មាន២២បន្ទប់ មានបេក្ខជនប្រឡង៥៥០នាក់។ ២.មណ្ឌលវិទ្យាល័យពោធិ៍សាត់ខាងជើង មាន២១បន្ទប់ មានបេក្ខជន៥២៥នាក់។ ៣.មណ្ឌលវិទ្យាល័យពោធិ៍សាត់ខាងត្បូង មាន២៨បន្ទប់ មានបេក្ខជន៧០០នាក់។ ៤.មណ្ឌលបឋមសិក្សាពោធិ៍សាត់ មាន៣៦បន្ទប់ មានបេក្ខជន៩០០នាក់, និង ៥.មណ្ឌលអនុវិទ្យាល័យពោធិ៍សាត់ខាងលិច មាន០៩បន្ទប់ និងមានបេក្ខជន២២១នាក់។
ក្នុងឱកាសនោះ លោក ខូយ រីដា និង លោក អ៊ឹម កុច បាននាំមកនូវការផ្តាំផ្ញើសួរសុខទុក្ខ ពីសំណាក់ថ្នាក់ដឹកនាំក្រសួងអប់រំ យុវជននិងកីឡា និងបានផ្ដាំផ្ញើឲ្យបេក្ខជនទាំងអស់ខិតខំប្រឹងប្រែងធ្វើវិញ្ញាសា ដោយប្រើប្រាស់ចំណេះដឹងដែលបានសិក្សាកន្លងមក ឱ្យអស់ពីសមត្ថភាព។ គោរពបទបញ្ជាផ្ទៃក្នុងឲ្យបានម៉ឺងម៉ាត់បំផុត ដោយមិនត្រូវនាំយកទូរស័ព្ទដៃ ឧបករណ៍អេឡិចត្រូនិក ឬឯកសារផ្សេងៗចូលក្នុងបន្ទប់ប្រឡងជាដាច់ខាត។ ជាមួយគ្នានេះ ត្រូវយកចិត្តទុកដាក់លើសុខភាព ហូបស្អាត ផឹកស្អាត និងសម្រាកឱ្យបានគ្រប់គ្រាន់ ដើម្បីមានកម្លាំងមាំមួនក្នុងការប្រឡង។ ឯកឧត្តមក៏បានជូនពរដល់បេក្ខជនទាំងអស់ ឱ្យទទួលបានលទ្ធផលល្អប្រសើរក្នុងការប្រឡងសញ្ញាបត្រមធ្យមសិក្សាទុតិយភូមិឆ្នាំ២០២៦នេះគ្រប់ៗគ្នា ក្រោមបាវចនា «អ្នកចេះគឺជាប់»៕
ចែករំលែកព័តមាននេះ