ទីក្រុងបាងកក៖ ថ្ងៃនេះ ប្រទេសថៃមានហេតុការណ៍ស្លុតរន្ធត់ទាំងព្រលឹមនៅពេលមានការបាញ់ប្រហារនៅក្នុងបរវេណសាលារៀនមួយកន្លែងបណ្ដាលឱ្យគ្រូបង្រៀនយ៉ាងតិចម្នាក់ស្លាប់ ជនដៃដល់នៅក្នុងអំពើបាញ់ប្រហារនេះក៏បានស្លាប់ដែរ ខណៈដែលសិស្សសាលាដប់នាក់រងរបួស។ សាក្សីនិយាយថាសិស្សម្នាក់នៅសុខៗទាញកាំភ្លើងបាញ់រះដោយឥតរើសមុខទៅលើមនុស្សនៅក្នុងបរិវេណសាលារៀន។ ក្រោយមក គាត់ក៏លើកកាំភ្លើងបាញ់សម្លាប់ខ្លួនឯងតែម្ដង។ ឧត្ដមសេនីយ៍នគរបាលប្រចាំខេត្តនន្ថបុរីបញ្ជាក់ថាពិតមានមនុស្សស្លាប់ដូចសារព័ត៌មានបានចុះផ្សាយមែន និងថាជនដៃដល់បានបាញ់សម្លាប់ខ្លួនតាមក្រោយ។
នៅក្នុងចំណោមអ្នករបួសទាំងនោះ ម្នាក់ជាគ្រូបង្រៀន និង៩នាក់ជាសិស្សសាលា។ ហេតុការណ៍នេះកើតឡើងនៅស្រុកបាងគ្រុយ ខេត្តនន្ថបុរី ភាគខាងជើងទីក្រុងបាងកក។ សិស្សម្នាក់អាយុ១៨ឆ្នាំប្រាប់ថាមុនដំបូង ខ្លួនស្មានតែគេដុតផាវ ឬគេគោះវត្ថុអ្វីម៉្យាងព្រោះឮសំឡេងផ្ទុះផូងផាំងៗ។ មិននឹកស្មានថានោះជាការបាញ់កាំភ្លើងយ៉ាងដូច្នេះសោះ។ ខ្លួនស្ដាប់ឮសំឡេងផ្ទុះច្រើនគ្រាប់។ បន្ទាប់មកក៏ស្ងប់ស្ងាត់ទៅវិញ។ មិនយូរប៉ុន្មាន ខ្លួនក៏ស្ដាប់ឮសំឡេងផ្ទុះគ្រាប់កាំភ្លើងសាជាថ្មី។
តាមរយៈរូបថតជាច្រើនសន្លឹកដែលផ្សព្វផ្សាយដោយភ្នាក់ងារសង្គ្រោះបន្ទាន់ គេឃើញសិស្សរត់ប្រសាចចេញពីសាលារៀនទេពសិរិន នន្ថបុរី និងឃើញរថយន្តគិលានសង្គ្រោះបើកបន្តកន្ទុយគ្នាដើម្បីដឹកអ្នករបួស។ រូបថតមួយសន្លឹកបង្ហាញរូបមនុស្សម្នាក់ដេកស្ដូកស្ដឹងនៅលើគ្រែស្នែងក្បែរឡានពេទ ចំណែកម្នាក់ទៀតកំពុងត្រូវបានគ្រូពេទ្យផ្ដល់ការសង្គ្រោះបឋម។ ប្រទេសថៃសម្បូរហេតុការណ៍បាញ់ប្រហារគ្នាខ្លាំងណាស់ព្រោះជាសង្គមគ្រឿងញៀន សម្បូរក្រុមអន្ធពាល ចោរឆក់ ចោរប្លន់។ ការកាន់កាប់កាំភ្លើងនៅថ្ងៃស្ថិតនៅក្នុងលំដាប់កំពូលរបស់ពិភពលោក។ ពោលគឺនៅក្នុងចំណោមមនុស្ស៧នាក់ មានម្នាក់ដែលមានកាំភ្លើងកាន់នៅក្នុងដៃ។
គេវាយតម្លៃថានៅប្រទេសថៃសព្វថ្ងៃនេះ មនុស្សដប់លាននាក់កំពុងកាន់កាប់កាំភ្លើង។ ទោះបីមានការរឹតបន្តឹងច្បាប់ស្ដីពីការកាន់កាប់កាំភ្លើងយ៉ាងណាក្ដី ក៏គ្មានប្រសិទ្ធភាពដែរ។ កាលពីឆ្នាំ២០២៥ សាលារៀនដែលកើតហេតុខាងលើទទួលចុះឈ្មោះសិស្សឱ្យចូលរៀនចំនួន៣១០០នាក់ និងមានគ្រូបង្រៀនសរុប១៤៧នាក់។ កាលពីខែកុម្ភៈ ឆ្នាំនេះ គ្រូបង្រៀនម្នាក់បានស្លាប់ និងសិស្សម្នាក់រងរបួសនៅស្រុកហាតយ៉ៃ នៃប្រទេសថៃភាគខាងត្បូងបន្ទាប់ពីជនប្រដាប់អាវុធម្នាក់បាញ់រះនៅក្នុងបរិវេណសាលារៀនមួយកន្លែង៕ ប្រភព៖ South China Morning Post
ចែករំលែកព័តមាននេះ