សង្គ្រាមអ៊ុយក្រែន-រុស្ស៊ី ៖ ប្រធានាធិបតីអ៊ុយក្រែន លោកវ៉ូឡូឌីមៀរហ្សេឡេនស្គី កាលពីថ្ងៃទី១១ សីហា បានចោទប្រកាន់
រុស្ស៊ីថា បានប្រើបណ្ដាមីស៊ីលបាលីស្ទិកកូរ៉េខាងជើង ក្នុងការវាយប្រហារនាពេលយប់ លើទីក្រុងហ្សាប៉ូរីហ្ស៊ីយ៉ា ភាគខាងត្បូងអ៊ុយក្រែនបណ្ដាលឲ្យមនុស្សស្លាប់យ៉ាងតិច៦នាក់ ។
តាមបណ្ដាញសង្គម X លោកហ្សេ ឡេនស្គីថ្លែងថា ទីក្រុងនោះ រងការវាយប្រហារដោយបណ្ដាមីស៊ីលបាលីស្ទិកកូរ៉េខាងជើង និងបណ្ដាមីស៊ីលរុស្ស៊ីធុន ZIRCON ព្រមទាំងគ្រាប់បែកអាកាសបញ្ជា ។ លោកបរិហារថា នោះជាការវាយប្រហារដ៏សាហាវ ធ្វើឲ្យមានការខូចខាតយ៉ាងដំណំ ។ តាមតុល្យការផ្លូវការមួយចេញផ្សាយនាថ្ងៃទី១១ សីហា ថា មនុស្សយ៉ាងតិច៩នាក់ស្លាប់ ក្នុងការវាយប្រហារពេលយប់ថ្មីរបស់រុស្ស៊ីប្រឆាំងអ៊ុយក្រែន ។ នៅក្រុងហ្សាប៉ូរីហ្ស៊ីយ៉ាមនុស្ស៦នាក់ស្លាប់ និង១៩នាក់រងរបួស ហើយបណ្ដាអគាររងការបំផ្លាញឬខូចខាត ។
ការវាយប្រហារទាំងនេះរបស់រុស្ស៊ីកើតមានបន្ទាប់ពីលោកហ្សេឡេនស្គីអះអាងកាលពីថ្ងៃទី១០ សីហា ថា រុស្ស៊ីរៀបចំដាក់ពង្រាយថែមទៀតកងទាហានកូរ៉េខាងជើងក្នុងទឹកដីខ្លួន ហើយកំពុងទទួលមីស៊ីលបាលីស្ទិកថ្មីៗមកពីកូរ៉េខាងជើង។ កាលពីចុងសប្ដាហ៍កន្លងទៅលោកហ្សេឡេនស្គីធ្លាប់អះអាងថា ការសម្រេចចិត្តមួយគំពុងធ្វើ ទាក់ទិននឹងការដាក់ពង្រាយកងទ័ពកូរ៉េខាងជើងពី៣០.០០០ទៅ៥០.០០០នាក់ ក្នុងដែនដីរុស្ស៊ី ។ លោកមិនបញ្ជាក់ឡើយថាតើលោកទទួលបានព័ត៌មាននោះមកពីខាងណា។
អ៊ុយក្រែនក៏ដូចជាបណ្ដាសម្ព័ន្ធមិត្តលោកខាងលិច ពីមុនមកក៏ធ្លាប់បានចោទប្រកាន់រុស្ស៊ីថា ប្រើបណ្ដាអាវុធផលិតនៅកូរ៉េខាងជើង ។ កូរ៉េខាងជើងជាសម្ព័ន្ធមិត្តមួយរបស់រុស្ស៊ី ហើយទំនាក់ទំនងរវាងប្រទេសទាំង២ ត្រូវបានពង្រឹងតាំងពីចាប់ផ្ដើមការលុកលុយចូលអ៊ុយក្រែនមក។ អ្នកនាំពាក្យម្នាក់របស់ក្រសួងការបរទេសកូរ៉េខាងត្បូងលើកឡើងថា កិច្ចសហប្រតិបត្តិការយោធារវាងរុស្ស៊ី និងកូរ៉េខាងជើង ជាបញ្ហាមួយដែលប៉ះពាល់ដោយផ្ទាល់ដល់សន្តិសុខរបស់យើង ហើយជាការបំពានលើបណ្ដាដំណោះស្រាយរបស់ក្រុមប្រឹក្សាសន្តិសុខអ.ស.ប ។ ក្រុងសេអ៊ូលកំពុងតាមដានមើលយ៉ាងប្រកិតការវិវឌ្ឍនៃសភាពការណ៍ ៕
ចែករំលែកព័តមាននេះ