ខេត្តពោធិ៍សាត់ ៖ ថ្ងៃទី៥ ខែសីហា ឆ្នាំ២០២៦ លោក ខូយ រីដា អភិបាល នៃគណៈអភិបាលខេត្តពោធិ៍សាត់ និងលោកស្រី សុខ ចាន់សូណា នាយិការក្រុមហ៊ុន សូណាវិទ្យ និងលោក លរ័ ទួនអ៊ី នាយកក្រុមហ៊ុនហ្វាមហ្វ្រិស បានចុះហត្ថលេខាលើកិច្ចព្រមព្រៀងជួលដី សម្រាប់វិនិយោគគម្រោងចិញ្ចឹមគោ យកទឹកដោះ លើផ្ទៃដីប្រមាណ១,០០០ហិកតា នៅឃុំប្រមោយ ស្រុកវាលវែង ដែលអាចចាត់ទុកថា មានទំហំធំ និងទំនើបជាងគេបំផុត ក្នុងប្រទេសកម្ពុជា និងជាព្រឹត្តិការប្រវត្តិសាស្ត្រមួយ សម្រាប់ព្រះរាជាណាចក្រកម្ពុជា ជាពិសេសក្នុងទឹកដីខេត្តពោធិ៍សាត់តែម្ដង ។
ក្រុមហ៊ុន សូណាវិទ្យ បានចាប់ដៃគូជាមួយក្រុមហ៊ុនយក្សរបស់ម៉ាឡេស៊ី ដែលផលិតទឹកដោះគោដ៏ធំនៅតំបន់អាស៊ីអាគ្នេយ៍គឺ ហ្វាមហ្វ្រិស ដើម្បីបង្កើតគម្រោងវិនិយោគខ្នាតយក្ស ក្រោមឈ្មោះ “FARM FRESH PURSAT” ដែលមានទុនវិនិយោគសរុបប្រមាណ ៦៨លានដុល្លារអាមេរិក ។
លោក ខូយ រីដា អភិបាល មានប្រសាសន៍ថា តាមរយៈការវិនិយោគដ៏ធំនេះ ខេត្តពោធិ៍សាត់ នឹងមានកសិដ្ឋានចិញ្ចឹមគោយកទឹកដោះ ដ៏ធំបំផុតនៅកម្ពុជា ដែលនឹងបង្កើតឱកាសការងារជាច្រើនសម្រាប់កូនចៅប្រជាពលរដ្ឋ និងជាប្រវត្តិសាស្ត្រថ្មីរបស់ខេត្ត ក៏ដូចជាប្រទេសកម្ពុជាទាំងមូល។
លោកអភិបាលខេត្តរំពឹងថា គម្រោងវិនិយោគនេះ នឹងនាំមកនូវអត្ថប្រយោជន៍ជាច្រើន រួមមាន ការបង្កើតការងារជូនប្រជាពលរដ្ឋក្នុងមូលដ្ឋាន ការផ្ទេបច្ចេកវិទ្យានិងចំណេះដឹងទំនើបក្នុងការចិញ្ចឹមគោយកទឹកដោះ កាត់បន្ថយការពឹងផ្អែក ការនាំចូលពីខាងក្រៅ និងជម្រុញសេដ្ឋកិច្ចមូលដ្ឋានឱ្យមានជីវភាពកាន់តែប្រសើរឡើង ៕
ចែករំលែកព័តមាននេះ