ប្រទេសថៃ ៖ សមាគមទីភ្នាក់ងារទេសចរណ៍កម្ពុជា បានដឹកនាំក្រុមហ៊ុនទេសចរណ៍ចំនួន២៤ប្រចាំនៅកម្ពុជា ទៅធ្វើទស្សនកិច្ចសិក្សាវិស័យទេសចរណ៍នៅភាគខាងកើតប្រទេសថៃក្នុង គោលបំណងភ្ជាប់ទំនាក់ទំនងទេសចរណ៍ ជាពិសេសគឺការផ្លាស់ប្ដូរទេសចររវាងប្រទេសទាំង២កម្ពុជា-ថៃ។ ទស្សនកិច្ចនេះធ្វើឡើងពីថ្ងៃទី៣
ប្រទេសថៃ ៖ សមាគមទីភ្នាក់ងារទេសចរណ៍កម្ពុជា បានដឹកនាំក្រុមហ៊ុនទេសចរណ៍ចំនួន២៤ប្រចាំនៅកម្ពុជា ទៅធ្វើទស្សនកិច្ចសិក្សាវិស័យទេសចរណ៍នៅភាគខាងកើតប្រទេសថៃក្នុងគោលបំណងភ្ជាប់ទំនាក់ទំនងទេសចរណ៍ ជាពិសេសគឺការផ្លាស់ប្ដូរទេសចររវាងប្រទេសទាំង២កម្ពុជា-ថៃ។ ទស្សនកិច្ចនេះធ្វើឡើងពីថ្ងៃទី៣ដល់ថ្ងៃទី៦ សីហា ឆ្នាំ២០១១ ហើយនេះ គឺជាលើកទី២បន្ទាប់ពីដំណើរទស្សនកិច្ចកាលពីថ្ងៃទី៦ ខែកក្កដាកន្លងមកនេះ។
លោកអាង គឹមអៀង ប្រធានសមាគមទីភ្នាក់ងារទេសចរណ៍កម្ពុជាមានប្រសាសន៍ថាដោយពិនិត្យឃើញថាបរិយាកាសនយោបាយនៃប្រទេសទាំង២កម្ពុជា-ថៃខិតទៅរកភាពល្អប្រសើរឡើងវិញ ហើយម្យ៉ាងទៀតក៏បានការគាំទ្រពីសមាជិកសមាគមទីភ្នាក់ងារទេសចរណ៍កម្ពុជា និងមានការសម្របសម្រួលពីក្រុមហ៊ុនគ្រេនប៊ុកឃីង ដែលមានការិយាល័យធំនៅទីក្រុងបាងកក ជាពិសេសមានការគាំទ្រខ្ពស់ពីសំណាក់ប្រធានសមាគមទេសចរណ៍ប្រចាំខេត្ដច័ន្ទបុរីផងនោះ ការរៀបចំដំណើរទស្សនកិច្ចចំនួន២លើកបានកើតឡើង។ ជាលទ្ធផល បានធ្វើឱ្យសមាគមទេសចរណ៍ប្រចាំខេត្ដច័ន្ទបុរី ផ្ដោតអារម្មណ៍យ៉ាងខ្លាំងដោយបានសន្យាថា នឹងដឹកនាំទេសចរជនជាតិថៃ និងជនជាតិបរទេសមកកម្សាន្ដនៅប្រទេសកម្ពុជាឱ្យបានកាន់តែច្រើនផងដែរ។
លោកអាង គឹមអៀង បន្ដថា នៅចុងខែសីហានេះ ប្រធានសមាគមទេសចរណ៍ប្រចាំខេត្ដច័ន្ទបុរី នឹងនាំក្រុមហ៊ុនទេសចរណ៍ថៃចំនួន៥០ មកធ្វើទស្សនកិច្ចនៅប្រទេសកម្ពុជា ហើយដំណើរទស្សនកិច្ចនេះ គឺផ្ដោតទៅលើតំបន់ឆ្នេរសមុទ្រជាពិសេសឆ្នេរសមុទ្រខេត្ដព្រះសីហនុ។ ដោយឡែក ភ្ញៀវទេសចរនៃប្រទេសទាំងពីរត្រូវឆ្លងកាត់តាមច្រកខេត្តប៉ៃលិននិងខេត្ដច័ន្ទបុរី។ ចំពោះសមាគមទីភ្នាក់ងារទេសចរណ៍ គ្រាន់តែជាអ្នករកសមាជិកឱ្យដៃគូររវាងប្រទេសទាំងពីរប៉ុណ្ណោះ គឺមានន័យថា សមាគមគ្រាន់តែជាអ្នករៀបចំចងក្រងឱ្យក្រុមហ៊ុនទេសចរណ៍កម្ពុជា-ថៃបានជួបគ្នា ហើយក្រុមហ៊ុនទេសចរណ៍នីមួយៗ គឺនាំភ្ញៀវទៅវិញទៅមក។
លោកស្រី អាភីរ៉ាឌី ប្រធានសមាគមទេសចរណ៍ប្រចាំខេត្ដច័ន្ទបុរីបានមានប្រសាសន៍ ក្នុងជំនួបជាមួយលោកអាង គឹមអៀង ថា កាលពីខែកក្កដា ឆ្នាំ២០១១ លោកស្រីបានទៅដល់ក្រុងសៀមរាបម្តងហើយ ពេលសួររកសមាគមទេសចរណ៍នៅកម្ពុជា មានគេប្រាប់ថា ពុំមានទេ ប៉ុន្ដែចៃដន្យលោកស្រីបានជួបលោកប្រធានសមាគមទីភ្នាក់ងារទេសចរណ៍ក៏ចាប់ផ្ដើមមានទំនាក់ទំនងគ្នាមកដល់បច្ចុប្បន្ន។ លោកស្រីបន្ដថា គាត់បានឃើញសមាជិកក្រុមហ៊ុនទេសចរណ៍របស់សមាគមទីភ្នាក់ងារទេសចរណ៍មានការប្រាស្រ័យទាក់ទង និងសាមគ្គីគ្នាយ៉ាងល្អប្រសើរហើយបានទៅធ្វើទស្សនកិច្ចនៅខេត្ដច័ន្ទបុរី ចំនួន២លើក ដោយបង្កើតការជួបជុំទទួលអាហារយ៉ាងសប្បាយរីករាយជាមួយសមាគមទេសចរណ៍ប្រចាំនៅខេត្ដច័ន្ទបុរី។ លោកស្រីសន្យាថា នឹងនាំភ្ញៀវទេសចរមកកម្សាន្ដនៅប្រទេសកម្ពុជាឱ្យកាន់តែច្រើនថែមទៀត។
ខេត្ដច័ន្ទបុរី មានប្រជាពលរដ្ឋរស់នៅចំនួន៥០ម៉ឺននាក់ ហើយប្រជាពលរដ្ឋថៃភាគច្រើនជាកសិករធ្វើចម្ការដំណាំហូបផ្លែមានដូចជា សាវម៉ាវ មង្ឃុត ទុរេន មៀន និងផ្លែឡុងកុងជាដើម។ក្រៅពីនេះ ប្រជាពលរដ្ឋក្នុងខេត្ដនេះធ្វើស្រែ និងពិសេសបំផុត គឺការចិញ្ចឹមបង្កង។ ខេត្ដច័ន្ទបុរីមានជ្រលងភ្នំ ជ្រោះ ឆ្នេរសមុទ្រសម្រាប់ភ្ញៀវទេសចរទៅកម្សាន្ដបានយ៉ាងល្អផងដែរ៕
ចែករំលែកព័តមាននេះ