ទីក្រុងយេរូសាឡឹម៖ នាយករដ្ឋមន្ត្រីអ៊ីស្រាអែល លោកណឺតាន់យ៉ាហ៊ូ ប្រកាសច្បាស់ៗនៅថ្ងៃនេះថាលោកនឹងមិនដកកងទ័ពថយចេញពីតំបន់ហ្កាហ្សាជាដាច់ខាតរហូតដល់ក្រុមហាម៉ាស់ទម្លាក់អាវុធទាំងស្រុង និងដកថយពីតំបន់នេះ។ ពាក្យសម្ដីនេះផ្ទុយពីកិច្ចព្រមព្រៀងដែលប្រកាសដោយលោកដូណាល់ត្រាំ។ ពាក្យសម្ដីរបស់លោកណឺតាន់យ៉ាហ៊ូធ្វើឱ្យគេមានវិមតិសង្ស័យថាកិច្ចព្រមព្រៀងដើម្បីកាត់រំសាយអាវុធពីក្រុមហាម៉ាស់ប្រហែលជាមិនទទួលបានជោគជ័យទេ។ នេះជាចំណុចសំខាន់សម្រាប់ការបិទបញ្ចប់សង្គ្រាមជាស្ថាពរ។ ម៉្យាងទៀតពាក្យសម្ដីនេះជាការប្រឆាំងជំទាស់ជាចំហទៅនឹងគោលជំហររបស់រដ្ឋាភិបាលលោកត្រាំ ហើយវាជាករណីដ៏កម្រដែលអ៊ីស្រាអែលធ្វើអត្ថាធិប្បាបែបនេះ។
យោងតាមកិច្ចព្រមព្រៀងនោះ ក្រុមហាម៉ាស់ត្រូវចាប់ផ្ដើមកាត់រំសាយអាវុធរបស់ខ្លួន ចំណែកអ៊ីស្រាអែលត្រូវបញ្ឈប់ការវាយប្រហារ និងចាប់ផ្ដើមដកកងទ័ពជាបណ្ដើរៗចេញពីតំបន់ហ្កាហ្សាដែលសព្វថ្ងៃនេះពួកគេគ្រប់គ្រងប្រហែល៦០%។ លក្ខខណ្ឌនេះធ្វើឡើងដោយផ្អែកទៅលើបទឈប់បាញ់កាលពីខែតុលាដែលនាំទៅដល់ការបិទបញ្ចប់ប្រតិបត្តិការសឹករបស់អ៊ីស្រាអែលមួយភាគធំ និងដោះលែងចំណាប់ខ្មាំងដែលនៅសេសសល់ទាំងប៉ុន្មាន។ លោកណឺតាន់យ៉ាហ៊ូនឹងឆ្លងកាត់ស្ថានភាពដ៏លំបាកមួយផ្នែកនយោបាយនៅពេលមានការបោះឆ្នោតនាខែតុលាខាងមុខនេះ។ លោកសង្កត់ធ្ងន់ថាអ្វីដែលជាចំណុចសំខាន់គឺក្រុមហាម៉ាស់ត្រូវតែកាត់រំសាយអាវុធជាមុនសិន។ លោកថ្លែងបន្តទៀតថាកងទ័ពអ៊ីស្រាអែលនឹងបន្តចាត់វិធានការដែលចាំបាច់គ្រប់យ៉ាងដើម្បីការពារខ្លួន ការពារដែនដីដែលពួកគេកាន់កាប់ និងការពារពលរដ្ឋអ៊ីស្រាអែល។
លោកថ្លែងបន្តទៀតថារដ្ឋាភិបាលលោកត្រាំបានផ្ញើទៅឱ្យអ៊ីស្រាអែលនូវសេចក្ដីព្រាងនៃកិច្ចព្រមព្រៀងបញ្ចប់សង្គ្រាម។ យើងមិនឯកភាពតាមសំណើនោះទេព្រោះមិនមែនជាសេចក្ដីព្រាងដែលយើងជាអ្នករៀបចំឡើង។ យើងបានធ្វើចំណារផ្សេងៗដើម្បីកត់សម្គាល់អំពីមតិយោបល់របស់យើង។ នេះជាជំហររបស់ពួកយើង។ លោកថ្លែងដូច្នេះនៅក្នុងខ្សែអាត់វីឌីអូដែលបង្ហោះនៅលើបណ្ដាញសង្គម។ កាលពីមុននេះ ក្រុមប៉ាឡេស្ទីនបានជួបជុំគ្នាទ្រង់ទ្រាយធំដើម្បីចូលរួមពិធីបុណ្យសពមនុស្សជាងមួយរយនាក់ដែលស្លាប់នៅក្នុងការវាយប្រហាររបស់អ៊ីស្រាអែលកាលពីឆ្នាំ២០២៣។ មនុស្សជាង៣រយនាក់ស្លាប់កាលពីថ្ងៃទី២២ ខែវិច្ឆិកា ឆ្នាំ២០២៣។ ពោលគឺត្រឹមតែប៉ុន្មានសប្ដាហ៍ប៉ុណ្ណោះក្រោយពេលផ្ទុះសង្គ្រាមរវាងអ៊ីស្រាអែល និងហាម៉ាស់។
សាកសពមមនុស្សប្រហែល៤០នាក់ត្រូវគេជីកបានមិនយូរប៉ុន្មានបន្ទាប់ពីក្រុមអ្នកជួយសង្គ្រោះប្រើប្រាស់ឧបករណ៍ផ្សេងៗដើម្បីជីកកកាយគំនរបាក់បែក។ ប៉ុន្តែមនុស្សជាច្រើននាក់ទៀតកប់ក្រោមបេតុង។ កាលពីចុងសប្ដាហ៍មុន ក្រុមអ្នកជួយសង្គ្រោះបានជីកកកាយគំនរបាក់បែកនៃអគារជាច្រើនខ្នង និងរកឃើញសាកសពមនុស្ស១១២នាក់។ ក្នុងនោះ កុមារមានចំនួន៤០នាក់។ ចំនួននេះមិនទាន់គិតទៅដល់សាកសព១៥៧នាក់ទៀតដែលមិនទាន់បានរកឃើញនៅឡើយទេ៕ ប្រភព៖ AP
ចែករំលែកព័តមាននេះ