ប្រទេសកូរ៉េខាងត្បូង ៖ ប្រទេសកូរ៉េខាងត្បូងបានស្នើឡើងនូវការផ្លាស់ប្តូរពន្ធលើអចលនទ្រព្យ ដោយនឹងតម្រូវឱ្យម្ចាស់អចលនទ្រព្យច្រើនខ្នង និងមានតម្លៃថ្លៃ បង់ពន្ធខ្ពស់ជាងមុន ដើម្បីរក្សាលំនឹងទីផ្សារអចលនទ្រព្យដែលឡើងថ្លៃខ្លាំង។ នេះបើតាមប្រភពពីទីភ្នាក់ងារសារព័ត៌មាន Reuters បានចេញផ្សាយ។
ការប្រកាសកាលពីថ្ងៃចន្ទកន្លងទៅ បានធ្វើឡើងបន្ទាប់ពីកិច្ចប្រជុំបិទទ្វារមួយ ដែលដឹកនាំដោយលោកប្រធានាធិបតី លី ជេម្យុង (Lee Jae Myung) ដែលក្នុងនោះទីផ្សារភាគហ៊ុន និងទីផ្សារអចលនទ្រព្យក្នុងស្រុកត្រូវបានលើកយកមកពិភាក្សា ខណៈពេលរដ្ឋាភិបាលព្យាយាមបន្ធូរបន្ថយកំហឹងសាធារណៈជុំវិញបញ្ហាតម្លៃផ្ទះឡើងខ្ពស់ និងទីផ្សារភាគហ៊ុនដែលមិនស្ថិតស្ថេរ។
តាមរដ្ឋមន្ត្រីក្រសួងហិរញ្ញវត្ថុ លោក គូ យុនឆុល (Koo Yun-cheol) បានថ្លែងដូច្នេះថា «យើងនឹងកែទម្រង់ពន្ធដារលើវិស័យអចលនទ្រព្យឱ្យមានលក្ខណៈសមស្រប ដើម្បីបង្កើតទីផ្សារលំនៅឋានដែលផ្ដោតលើការរស់នៅពិតប្រាកដ ក្រោមគោលការណ៍ថា ផ្ទះគឺជាកន្លែងសម្រាប់រស់នៅ មិនមែនសម្រាប់ទិញដូរ រកស៊ី នោះទេ»។
នៅក្នុងចំណោមការផ្លាស់ប្តូរផ្សេងៗដែលដាក់បញ្ចូលក្នុងការកែសម្រួលក្រមពន្ធប្រចាំឆ្នាំ ដែលបានប្រកាសកាលពីថ្មីៗនេះ ក្រសួងហិរញ្ញវត្ថុបានស្នើកម្រិតលើកលែងពន្ធទៅលើអចលនទ្រព្យសម្រាប់អ្នកមានផ្ទះតែ ១ ហើយរស់នៅក្នុងផ្ទះនោះផ្ទាល់ផងដែរ។ ក្រសួងក៏បានស្នើដំឡើងអត្រាពន្ធលើការកាន់កាប់អចលនទ្រព្យរហូតដល់ទៅ ២,៣ % ដោយផ្អែកលើតម្លៃផ្ទះ និងការផ្លាស់ប្តូរក្រមពន្ធ (ច្បាប់ស្តីពីសារពើពន្ធ) ផ្សេងទៀត ដែលបង្កើនបន្ទុកពន្ធលើអ្នកដែលមានផ្ទះច្រើន និងផ្ទះមានតម្លៃថ្លៃ។
លោក គូ បានបញ្ជាក់ថា សម្រាប់គ្រួសារមានផ្ទះតែ ១ បន្ទុកពន្ធនឹងថយចុះ បើផ្ទះនោះមានតម្លៃក្រោម ៣ ពាន់លានវ៉ុន (២,១ លានដុល្លារអាមេរិក)។ ប៉ុន្តែចាប់ពី ៣ ពាន់លាន ទៅ ៤ ពាន់លានវ៉ុន ពន្ធនឹងត្រូវដំឡើងតាមលំដាប់លំដោយ ហើយប្រព័ន្ធពន្ធនឹងត្រូវរៀបចំឱ្យមានលក្ខណៈធម្មតា និងសមស្របទៅតាមតម្លៃទីផ្សារជាក់ស្តែង សម្រាប់ផ្ទះមានតម្លៃចន្លោះពី ៤ ពាន់លាន ទៅ ៥ ពាន់លានវ៉ុន។
ធនាគារកណ្តាលប្រទេសកូរ៉េ (Bank of Korea) ដែលក៏មានការព្រួយបារម្ភផងដែរអំពីកំណត់ត្រាប្រាក់ចំណេញក្នុងឧស្សាហកម្មបន្ទះឈីប ដែលនាំឱ្យមានអតិផរណាខ្ពស់ និងតម្លៃផ្ទះឡើងថ្លៃនោះ បានដំឡើងអត្រាការប្រាក់ កាលពីខែមុនជាលើកដំបូងនៅក្នុងរយៈពេល៣ឆ្នាំកន្លះ និងបានបង្ហាញសញ្ញាថាមានការដំឡើងបន្ថែមទៀតនៅពេលខាងមុខ។
ក្នុងចំណោមសំណើកែទម្រង់ក្រមពន្ធផ្សេងទៀត ក្រសួងហិរញ្ញវត្ថុកូរ៉េខាងត្បូងគ្រោងនឹងដាក់បញ្ចូលការលើកលែងពន្ធលើការផលិតក្នុងស្រុកសម្រាប់ការលក់ក្នុងស្រុកលើវិស័យថាមពលពន្លឺព្រះអាទិត្យ និងថាមពលខ្យល់ អាគុយដែលអាចសាកថ្មបាន ឧបករណ៍បន្ទះឈីប (Semiconductors) សម្ភារៈសំខាន់ៗ និងមនុស្សយន្តបច្ចេកវិទ្យាបញ្ញាសិប្បនិម្មិត AI ដោយក្រសួងមានផែនការដាក់ស្នើសំណើនេះទៅកាន់សភាត្រឹមថ្ងៃទី ៣ ខែកញ្ញា៕
ចែករំលែកព័តមាននេះ