បន្តប្រយ័ត្នបងប្អូន ! ឥទ្ធិពលព្យុះដូលហ្វីន នៅតែធ្វើឱ្យកម្ពុជាមានភ្លៀងផ្គររន្ទះ និងខ្យល់កន្ត្រាក់ ៣ថ្ងៃជាប់គ្នា
- ភ្នំពេញ
រាជធានីភ្នំពេញ ៖ ក្រសួងធនធានទឹក ៖ កម្ពុជានៅតែបន្តរងឥទ្ធិពលព្យុះ «ដូលហ្វីន» បណ្តាលឱ្យមានភ្លៀងនិងខ្យល់កន្ត្រាក់ តែមិនស្ថិតក្នុងផ្លូវដើរផ្ទាល់ឡើយ ។
ក្រសួងធនធានទឹក និងឧតុនិយម បានប្រកាសនាព្រឹកថ្ងៃទី០៣ ខែសីហានេះថា ៖ ស្ថានភាពធាតុអាកាសនៅព្រះរាជាណាចក្រកម្ពុជា សម្រាប់ថ្ងៃទី៣ ខែសីហា ឆ្នាំ២០២៦ ព្យុះសង្ឃរាទី១៣ ឈ្មោះ ដូលហ្វីន (Dolphin) T2613 នៅតែមានឥទ្ធិពលលើរបបខ្យល់មូសុងនិរតី ដែលបក់លើឈូងសមុទ្របេងហ្គាល សមុទ្រអាន់ដាម៉ាន់ សមុទ្រចិនខាងត្បូង អាងទន្លេមេគង្គ សមុទ្រកម្ពុជា និងលើព្រះរាជាណាចក្រកម្ពុជា ។ ព្រះរាជាណាចក្រកម្ពុជាពុំស្ថិតនៅក្នុងគន្លងផ្លូវដើររបស់ព្យុះ ដូលហ្វីន នេះទេ ។
ស្ថានភាពបែបនេះនឹងធ្វើឱ្យធាតុអាកាស ចាប់ពីថ្ងៃទី៣ ដល់ថ្ងៃទី៥ ខែសីហា ឆ្នាំ២០២៦៖
ក. តំបន់វាលរាប ៖ សីតុណ្ហភាពអប្បបរមាមាន២៥°C និងសីតុណ្ហភាពអតិបរមាអាចកើនឡើងដល់ ៣៦°C ។ ខ្យល់បក់មកពីទិសនិរតី និងទិសពាយព្យ ក្នុងល្បឿនមធ្យម ៣ ម៉ែត្រ/វិនាទី ។ ខេត្តបន្ទាយមានជ័យ, បាត់ដំបង, ពោធិ៍សាត់, កំពង់ឆ្នាំង, សៀមរាប, កំពង់ធំ, កំពង់ចាម, ត្បូងឃ្មុំ, ព្រៃវែង, ស្វាយរៀង, តាកែវ, កណ្តាល និងរាជធានីភ្នំពេញ។
ព្យាករណ៍ទឹកភ្លៀង ៖ អាចមានភ្លៀងធ្លាក់លាយឡំជាមួយ ផ្គរ រន្ទះ និងខ្យល់កន្ត្រាក់ ដែលអាចគ្របដណ្តប់លើផ្ទៃដីប្រមាណ ៥០%។
ខ. តំបន់ខ្ពង់រាប ៖ មានសីតុណ្ហភាពអប្បបរមាមាន ២៤°C និងសីតុណ្ហភាពអតិបរមាអាចឡើងដល់ ៣៥°C ។ ខ្យល់បក់មកពីទិសនិរតី និងទិសបស្ចិម ក្នុងល្បឿនមធ្យម ៤ ម៉ែត្រ/វិនាទី។ ខេត្តកំពង់ស្ពឺ, ប៉ៃលិន, ឧត្តរមានជ័យ, ព្រះវិហារ, ក្រចេះ, ស្ទឹងត្រែង, រតនគិរី, មណ្ឌលគិរី ព្រមទាំងតំបន់ជួរភ្នំដងរែក និងជួរភ្នំក្រវាញ ។ អាចមានភ្លៀងធ្លាក់លាយឡំជាមួយ ផ្គរ រន្ទះ និងខ្យល់កន្ត្រាក់ ដែលអាចគ្របដណ្តប់លើផ្ទៃដីប្រមាណ ៣០%។
គ. តំបន់មាត់សមុទ្រ ៖ សីតុណ្ហភាពអប្បបរមាមាន ២៥°C និងសីតុណ្ហភាពអតិបរមា ៣៥°C ។ ខ្យល់បក់មកពីទិសនិរតី និងទិសអាគ្នេយ៍ ក្នុងល្បឿនមធ្យម ២ ម៉ែត្រ/វិនាទី។ ខេត្តកោះកុង, ព្រះសីហនុ, កំពត, កែប និងតំបន់ជួរភ្នំបូកគោ ។ អាចមានភ្លៀងធ្លាក់លាយឡំជាមួយ ផ្គរ រន្ទះ និងខ្យល់កន្ត្រាក់ ដែលអាចគ្របដណ្តប់លើផ្ទៃដីប្រមាណ៤០%។
ដោយឡែកកម្ពស់រលកសមុទ្រមធ្យមអប្បបរមា ០,៥០ ម៉ែត្រ និងកម្ពស់រលកសមុទ្រមធ្យមអតិបរមាអាចឡើងដល់ ១,៧៥ ម៉ែត្រ ៕
ចែករំលែកព័តមាននេះ