អត្រាមរណៈភាពដែលបានកត់ត្រាដោយសារ តែគ្រោះថ្នាក់ចរាចរណ៍នៅឆមាសទី១ នៃឆ្នាំ២០២៦នេះ បានកើនឡើងវិញជាថ្មី ជាមួយនឹងកំណើនកើនឡើងរហូតដល់ទៅ១១ភាគរយ ។
ស្ថិតិនេះត្រូវបានបញ្ជាក់នៅក្នុងលិខិតរបស់លោក ស សុខា ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ នៅក្នុងលិខិតមួយផ្ញើជូននាយករដ្ឋមន្ត្រី កាលពីចុងខែកក្កដា កន្លងទៅថ្មីៗនេះ ។
ប្រភពដដែលបានអះអាងថា គ្រោះថ្នាក់ចរាចរណ៍បានឆក់យកជីវិតមនុស្ស៧៧៣នាក់ ក្នុងរយៈពេលពេញមួយឆមាសទី១ នៃឆ្នាំ២០២៦ កើនឡើង១១ភាគរយ បើធៀបនឹងករណីដែលបានកត់ត្រា ចំនួន៦៩៤ នាក់ក្នុងអំឡុងពេលដូចគ្នាក្នុងឆ្នាំ២០២៥ ។
ក្រៅពីចំនួនអ្នកស្លាប់ គ្រោះថ្នាក់ចរាចរណ៍បានបង្ករបួសដល់មនុស្ស១.៩៤៤ នាក់ផ្សេងទៀតក្នុងអំឡុងដដែល ដោយកើនឡើង៣២ ភាគរយ ។
អ្នករបួស និងអ្នកស្លាប់ទាំងនេះ គឺដោយសារតែគ្រោះថ្នាក់ចរាចរណ៍ចំនួន១.២៧៩ ករណីកើនឡើង២០ភាគរយ ហើយមូលហេតុចម្បងរួមមាន ការបើកបរលើសល្បឿនកំណត់ មិនគោរពច្បាប់ចរាចរណ៍ និងសិទ្ធិអាទិភាពការជែង និងការបត់មិនប្រយ័ត្ន និងការបើកបរក្នុងស្ថានភាពស្រវឹង ។
ដោយសារតែកំណើនឡើងវិញជាថ្មី នៃគ្រោះថ្នាក់ចរាចរណ៍ ក្រសួងមហាផ្ទៃ បានស្នើឱ្យប៉ូលិសចរាចរណ៍ពង្រឹងច្បាប់ចរាចរណ៍ផ្លូវគោក ចាប់ពីថ្ងៃទី១ ខែកញ្ញា ដោយផ្តោតការអនុវត្តយ៉ាងតឹងរ៉ឹង លើតំបន់ដែលមានហានិភ័យខ្ពស់ដូចជា រាជធានីភ្នំពេញ ខេត្តព្រះសីហនុ កណ្តាល កំពង់ស្ពឺ និងស្វាយរៀង ៕
ចែករំលែកព័តមាននេះ