បុ.កគេស្ទើរស្លា.ប់ស្ទើររស់ កំពុងចរចារឿងសំណងពីអ្នកបង្ក
- កំពត
ខេត្តកំពត ៖ ស្ត្រីចំណាស់ម្នាក់បានរងរបួសយ៉ាងធ្ងន់ធ្ងរត្រូវបានកូនបញ្ជូនទៅសង្គ្រោះនៅមន្ទីរពេទ្យប្រទេសវៀតណាម ដោយមូលហេតុករណីគ្រោះថ្នាក់ចរាចរដ៏រន្ធត់មួយបានកើតឡើងកាលពីរំលងអាធ្រាត្រថ្ងៃទី២៥ឈានចូលថ្ងៃទី២៦ខែកក្កដាឆ្នាំ២០២៦កន្លងទៅនៅមុខសាលាខេត្តកំពតចាស់ក្បែររូបសំណាកត្រីសេះសមុទ្របាញ់ទឹក បង្កដោយរថយន្តម៉ាក(KIA)ពាកផ្លាកលេខ កែប 2A-5079 បើកបរដោយឈ្មោះទុំ សុគន្ធារត្ន័ ភេទប្រុស អាយុ៣២ឆ្នាំ រស់នៅភូមិកំពង់គ្រែង ឃុំកំពង់គ្រែង ស្រុកទឹកឈូខេត្តកំពត។
យោងតាមប្រភពពីកន្លែងកើតហេតុបានឲ្យដឹងថា: មុនពេលកើតហេតុគេឃើញរថយន្តម៉ាក(KIA)ពាក់ស្លាកលេខកែប2A-5079 បើកបរដោយបុរសម្នាក់តាមបណ្តោយផ្លូវមុខតំបន់ឆ្នេរព្រែកកំពត(មុខសាលាខេត្ត)ក្នុងទិសដៅពីជើងទៅត្បូងលុះដល់ចំណុចហួសរូបត្រីសេះសមុទ្របន្តិចក៏បានរេចង្កូតបុករះម៉ូតូកង់បីឥណ្ឌា.ម៉ូតូសេ១០០កូរ៉េរួចរូលបុកមនុស្សស្រីចំណាស់ម្នាក់ដែលកំពុងលក់ពងទាស្ងោរនិងលក់ម្ជូរនៅក្បែរខឿនផ្លូវនោះបណ្តាលឲ្យម៉ូតូសេ១០០កូរ៉េខូចខាតធ្ងន់មនុស្សស្រីចំណាស់រងរបួសធ្ងន់និងម៉ូតូកង់បីឥណ្ឌាខូចខាតមធ្យមយានយន្តទាំងពីរគ្រឿងដែលរងការខូចខាតនេះជារបស់ជនរងគ្រោះទាំងអស់។ ស្ត្រីរងគ្រោះមានឈ្មោះអ៊ុង ថាវី អាយុ៧២ឆ្នាំ រស់នៅភូមិទ្វីបខាងត្បូង សង្កាត់អណ្តូងខ្មែរ ក្រុងកំពត ខេត្តកំពត។
សូមបញ្ជាក់ថា ករណីគ្រោះថ្នាក់កើតឡើងខាងលើពុំមានកំលាំងសមត្ថកិច្ចចរាចរទៅអន្តរាវាស់វែងភ្លាមទេគឺមានតែជនបង្កនិងជនរងគ្រោះតែប៉ុណ្ណោះ។ ប្រភពដដែលឲ្យដឹងទៀតថា ក្រោយពីកើតហេតុ ជនបង្កបានជួយដឹកជនរងគ្រោះទៅសង្គ្រោះបន្ទាន់នៅមន្ទីរពេទ្យបង្អែកខេត្តភ្លាមៗដែរ តែដោយស្ថានភាពរបួសធ្ងន់ធ្ងរមន្ទីរពេទ្យបង្អែកខេត្តក៏បានដឹកជនរងគ្រោះទៅសង្គ្រោះបន្តនៅមន្ទីរពេទ្យប្រទេសវៀតណាម ។ រីឯជនបង្កក្រោយពីដឹកជនរងគ្រោះដល់មន្ទីរពេទ្យហើយក៏បានប្រគល់លេខទូរសព្ទ័របស់ខ្លួនឲ្យគ្រួសារជនរងគ្រោះហើយក៏បើករថយន្តបង្កនោះទៅផ្ទះបាត់ទៅ។ លុះព្រឹកឡើងមានប្រភពពត៌មានពីប្រជាពលរដ្ឋទើបសមត្ថកិច្ចចរាចរក្រុងកំពត ទៅពិនិត្យកន្លែងកើតហេតុនិងនាំយកវត្ថុតាងម៉ូតូកង់បីឥណ្ឌានិងម៉ូតូសង់កូរ៉េរបស់ជនរងគ្រោះមករក្សាទុកនៅអធិការដ្ឋាននគរបាលក្រុងរីឯរថយន្តបង្កដែលម្ចាស់អ្នកបើកបរយកទៅផ្ទះនោះក៏ត្រូវបានសមត្ថកិច្ចឲ្យយកមករក្សាទុកនៅអធិការដ្ឋាននគរបាលក្រុងវិញផងដែរ។
ប្រភពពីអធិការរងក្រុងផ្នែកចរាចរឲ្យដឹងថា: នៅថ្ងៃបន្ទាប់គឺថ្ងៃទី(28,7,26) សមត្ថកិច្ចបានកោះហៅភាគីទាំងពីរ: ( ភាគីបង្កនិងភាគីរងគ្រោះ)មកដោះស្រាយសម្របសម្រួលសំណងដល់ជនរងគ្រោះដែលកំពុងសង្គ្រោះ បន្ទាន់នៅមន្ទីរពេទ្យប្រទេសវៀតណាម ពេលនោះតំណាងខាងជនរងគ្រោះសុំឲ្យខាងភាគីបង្កជួយ១៥០០០ដុល្លា។ រីឯតំណាងភាគីបង្កបានប្រាប់ទៅតំណាងជនរងគ្រោះនិងសមត្ថកិច្ចវិញថាខ្លួនគ្មានលទ្ធភាពទេ ពេលនោះតំណាងជនរងសួរថាតើជួយដល់ជនរងគ្រោះប៉ុន្មាន តំណាងជនបង្កថាបើ៣០០០ដុល្លាខ្លួនអាចជួយបាន។
ក្រោយពីនិយាយសម្របសម្រួលមិនត្រូវគ្នាក៏បែកគ្នាទៅ ហើយភាគីទាំងពីរសន្យានិងជួបជជែកគ្នារឿងសំណងជាលើកទី២ទៀត។ ប្រភពបន្តទៀតថា នៅរសៀលថ្ងៃទី៣១ខែកក្កដាឆ្នាំ២០២៦ម្សិលមិញនេះ សមត្ថកិច្ចចរាចរក្រុងកំពតបានអញ្ជើញភាគីទាំងពីរមកដោះស្រាយសម្របសម្រួលជាលើកទី២ ម្តងទៀត។
សមត្ថកិច្ចក៏ធ្វើការសម្របសម្រួលឲ្យភាគីទាំងពីរនិយាយគ្នាដោយសម្រួលចុះលោកចាំស្តាប់ ពេលនោះសមត្ថកិច្ចបានសួរខាងភាគីរងគ្រោះថាតើសម្រេចសុំឲ្យភាគីបង្កសងប៉ុន្មាន ? ភាគីខាងរងគ្រោះថាខ្លួនសុំ១២០០០ដុល្លារ រហូតចុះមកនៅត្រឹម១១០០០ដុល្លា រីឯភាគីបង្កថាខ្លួនគ្មានលទ្ធភាពទេ ពេលនោះភាគីខាងជនរងគ្រោះសួរទៅតំណាងភាគីបង្កថាតើអាចជួយបានប៉ុន្មាន? តំណាងភាគីបង្កថា ខ្លួនមានលទ្ធភាពជួយបន្ថែមបានតែ៥០០ដុល្លាទៀតទេ សរុប៣៥០០ដុល្លា។ ពេលនោះគឺការដោះស្រាយសម្របសម្រួលរបស់សមត្ថកិច្ចចរាចរក្រុងមិនបានសម្រេចឡើយ។
មហាជនចាំមើលថាតើជនបង្កធ្វើឲ្យមានមនុស្សរងរបួសធ្ងន់ធ្ងរ និងខូចខាតសម្ភារ:យានយន្តរបស់ជនរងគ្រោះថែមទៀតនោះ ចាំមើលច្បាប់រកយុត្តិធម៌ជូនដល់ជនរងបែបណា ហើយជនបង្កបើកបរដោយខ្វះប្រុងប្រយ័ត្នឲ្យមានគ្រោះថ្នាក់កើតឡើងខាងលើ តើច្បាប់ត្រូវផ្តន្ទាទោសនិងសំណងការខូចខាតដល់ជនរងគ្រោះយ៉ាងណាដែរ ។
ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ