ដាំដូងក្រអូបលើផ្ទៃដីជាង២ហិកតា ប្រមូលផលមិនប្រកាន់រដូវ កំពុងបំពេញតម្រូវការទីផ្សារក្នុងនិងក្រៅខេត្ត
- ប៉ៃលិន
ខេត្តប៉ៃលិន ៖ កសិករមួយគ្រួសារបានសម្រេចចិត្តដាំដំណាំដូងក្រអូប នៅលើដីចម្ការជាង២ហិកតារបស់ខ្លួន ព្រោះសង្កេតឃើញថា ដូងនេះ ជាដំណាំដែលមានទីផ្សារខ្ពស់ ហើយផ្តល់ផលបានរយៈពេលយូរអង្វែង ។
ជាក់ស្តែង កាលពីថ្ងៃទី៣១ ខែកក្កដា ឆ្នាំ២០២៦ នេះ កសិករម្នាក់បានអះអាង និងលើកឡើងថា ដូងដែលគាត់ដាំ គឺជាប្រភេទដូងម្យ៉ាងដែលមានក្លិនឈ្ងុយជាងដូងធម្មតា គឺក្រអូបទាំងទឹក និងសាច់ ដែលធ្វើឱ្យដូងរបស់គាត់នេះ មានភាពពេញនិយមខ្លាំងសម្រាប់ការទទួលទាន ។
បើតាមប្រភពព័ត៌មានពីស្ត្រីម្ចាស់ចម្ការម្នាក់ ឈ្មោះ សែម សុខខឿន អាយុប្រហែល៦០ឆ្នាំ រស់នៅក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន បានរៀបរាប់ឱ្យដឹងថា នៅក្នុងរយៈពេលចុងក្រោយនេះ ដោយគាត់សង្កេតឃើញថា គាត់បានធ្វើការផ្លាស់ប្ដូរផ្ទៃដីមួយចំនួនរបស់ខ្លួន ពីការដាំដុះដំណាំតាមរដូវកាល ដូចជាដំណាំពោតក្រហម និងដំឡូងមី បែរមកដាំដុះដំណាំដូងក្រអូបនេះវិញម្តង ។ ហើយចម្ការដូងក្រអូបរបស់គាត់ កំពុងតែប្រមូលផល និងផ្គត់ផ្គង់ទីផ្សារនៅក្នុងខេត្ត និងលក់ដូររហូតដល់ក្រៅខេត្តថែមទៀតផង ។
ប្រភពដដែលពីម្ចាស់ចម្ការបានឱ្យដឹងថា ដំណាំដូងក្រអូបរបស់គាត់ មានទីតាំងស្ថិតនៅភូមិសួនអំពៅកើត សង្កាត់ប៉ៃលិន ក្រុងប៉ៃលិន ខេត្តប៉ៃលិន ហើយការកកើតចម្ការដូងនេះ គឺផ្តើមចេញពីចំណង់ចំណូលចិត្តទទួលទានទឹកដូង និងសាច់ដូងក្រអូបជារៀងរាល់ថ្ងៃ ដោយគាត់គិតថា ដំណាំដូងអាចប្រមូលផលបានពេញមួយឆ្នាំមិនប្រកាន់រដូវកាលនោះទេ លើសពីនេះទៅទៀត
គឺអាចកែច្នៃបានច្រើនមុខ និងលក់ទៅកាន់ទីផ្សារបានច្រើនកន្លែង មិនថានៅក្នុងខេត្តប៉ៃលិន ឬនៅតាមបណ្ដាខេត្តនានានោះ
ទេ ។
ស្ត្រីម្ចាស់ចម្ការបានបន្ថែមទៀតថា ក្នុងខេត្តប៉ៃលិន និងទូទាំងប្រទេសរបស់យើង ទីផ្សារផ្លែដូងក្រអូបខ្ចី គឺមិនពិបាករកនោះទេ ឱ្យតែផ្លែដូងមានស្តង់ដាល្អ មានរសជាតិឈ្ងុយឆ្ងាញ់ មានក្លិនក្រអូប គឺមិនចាញ់ទំនិញដែលនាំចូលពីបរទេសនោះទេ ។ គាត់បញ្ជាក់ថា អ្វីដែលសំខាន់ គឺត្រូវឱ្យបងប្អូនយើងអាចទទួលទាន ផ្លែដូងនៅក្នុងស្រុក មានតម្លៃសមរម្យ មិនចាំបាច់ទទួលទិញពីបរទេសមកទេ ។
បច្ចុប្បន្ននេះ ចម្ការដូងក្រអូបខាងលើ មានទំហំជាង២ហិកតា ដោយអាចប្រមូលផលជាដំណាក់កាល ដែលមានអតិថិជនទាំងនៅក្នុងខេត្តប៉ៃលិន និងមានអ្នកធ្វើដំណើរមកពីក្រៅខេត្តផងដែរ ។ លើសពីនេះ តាមរយៈការជ្រើសរើសពូជ និងការថែទាំគឺនឹងអាចប្រមូលផលបាននៅអាយុត្រឹម២ឆ្នាំកន្លះប៉ុណ្ណោះ តែគេក៏ត្រូវប្រើជីបំប៉នឱ្យបានត្រឹមត្រូវ ទើបទទួលបានផលបានច្រើន ជាក់ស្តែង ដូចជាការប្រមូលក្នុងឆ្នាំនេះគឺអាចប្រមូលផលបាន១០០០ផ្លែ ក្នុង១សប្តាហ៍ និងកើនឡើងជាបន្តបន្ទាប់នៅលើកក្រោយទៀត ។
ស្ត្រីម្ចាស់ចម្ការបានបញ្ចាក់បន្ថែមថា ប្រសិនបើប្រជាពលរដ្ឋ ដែលចង់ដាំដំណាំដូងក្រអូបនេះ គឺចាំបាច់ត្រូវមានប្រព័ន្ធទឹកស្រោចស្រពឱ្យបានគ្រប់គ្រាន់ តាំងពីចាប់ផ្ដើមដាំរហូតដល់ដូងធំ ពោលគឺ កាន់តែធំកាន់តែត្រូវការទឹកជាច្រចាំ ។ បច្ចុប្បន្ន គាត់មានផែនការធ្វើថ្នាលបណ្តុះកូនដូងក្រអូបលក់នៅលើទីផ្សារផងដែរ ។
បើតាមការបញ្ជាក់របស់មន្ត្រីជំនាញកសិកម្មនៃមន្ទីរកសិកម្ម រុក្ខាប្រមាញ់ និងនេសាទខេត្តប៉ៃលិនបានឱ្យដឹងថា នៅក្នុងសង្កាត់ប៉ៃលិន មានផ្ទៃដីដាំដុះដំណាំកសិកម្មចំនួន៧៨២៥ហិកតា គ្រួសារធ្វើកសិកម្ម ចំនួន១៤៧៣គ្រួសារ និងគ្រួសារដាំដុះដូងសរុបមាន៦គ្រួសារ ដែលមានផ្ទៃដី៨ហិកតា ចំពោះផ្ទៃដីដាំដូង ដែលអាចប្រមូលផលបានមានតែ៥ហិកតាប៉ុណ្ណោះ.។
ចែករំលែកព័តមាននេះ