ខេត្តក្រចេះ ៖ សពជនរងគ្រោះបានផុសឡើងកាលព្រឹកថ្ងៃទី៣១ ខែកក្កដា ឆ្នាំ២០២៦ បន្ទាប់បាត់ខ្លួនក្នុងទឹករយៈពេល ២ថ្ងៃ ក្រោយជួបគ្រោះថ្នាក់ចរាចរណ៍លើផ្លូវទឹក កាលពីវេលាម៉ោង១១:០០នាទីព្រឹក ថ្ងៃទី២៩ ខែកក្កដា ឆ្នាំ២០២៦ នៅចំណុចក្បាលកោះរៀល ស្ថិតក្នុងឃុំសំបូរ ស្រុកសំបូរ ខេត្តក្រចេះ ។
យោងតាមប្រភពព័ត៌មានពីសមត្ថកិច្ចមូលដ្ឋានបានឱ្យដឹងថា នៅមុនពេលកើតហេតុមានទូកចំនួន២គ្រឿង បើកបរដោយប្រជាពលរដ្ឋរស់នៅក្នុងឃុំបឹងចារ ស្រុកសំបូរ សរុបចំនួន ៤នាក់ បានធ្វើដំណើរទល់មុខគ្នា ក្នុងល្បឿនលឿន។ លុះមកដល់ចំណុចកើតហេតុខាងលើ ដោយសារខ្វះការប្រុងប្រយ័ត្ន ទូកទាំង ២គ្រឿង ក៏បានបុកគ្នាយ៉ាងពេញទំហឹង ។
ការប៉ះទង្គិចយ៉ាងខ្លាំងនេះ បានបណ្ដាលឱ្យជនរងគ្រោះម្នាក់ រងរបួសធ្ងន់ធ្ងរត្រង់ក្បាល ហើយត្រូវបានប្រជាពលរដ្ឋនៅជិតខាងជួយអន្តរាគមន៍ បញ្ជូនទៅសង្គ្រោះបន្ទាន់នៅមន្ទីរពេទ្យបង្អែកខេត្តក្រចេះភ្លាមៗ ។
ជនរងគ្រោះ ម្នាក់ទៀត បានធ្លាក់ចូលទៅក្នុងទឹកទន្លេ ហើយលិចបាត់ខ្លួនភ្លាមៗក្រោយពេលកើតហេតុ។ អ្នករួមដំណើរ ២នាក់ផ្សេងទៀត ពុំមានរងរបួសធ្ងន់ធ្ងរនោះទេ ដោយបានហែលទឹករួចខ្លួន និងត្រូវបានអ្នកភូមិជួយស្រង់ឡើងគោកទាន់ពេលវេលា ។
ក្រោយកើតហេតុ អាជ្ញាធរមានសមត្ថកិច្ចសហការជាមួយប្រជាពលរដ្ឋ បានបើកប្រតិបត្តិការរុករកជនរងគ្រោះដែលបាត់ខ្លួនយ៉ាងសកម្មអស់រយៈពេល ២ថ្ងៃ។ រហូតមកដល់ព្រឹកថ្ងៃទី៣១ ខែកក្កដា ឆ្នាំ២០២៦នេះ ទើបប្រជាពលរដ្ឋបានប្រទះឃើញសាកសពអណ្ដែតទឹកនៅចំណុចភូមិកាកុត ស្រុកចិត្របុរី ខេត្តក្រចេះ ។
ភ្លាមៗនោះ ប្រជាពលរដ្ឋបានរាយការណ៍ជូនសមត្ថកិច្ច ដើម្បីទំនាក់ទំនងទៅកាន់សាច់ញាតិឱ្យមកពិនិត្យ និងស្គាល់អត្តសញ្ញាណ។ បន្ទាប់ពីសមត្ថកិច្ចជំនាញបានចុះធ្វើកុសលវិច័យរួចរាល់ សពត្រូវបានប្រគល់ជូនគ្រួសារសាច់ញាតិ ដើម្បីនាំយកទៅធ្វើបុណ្យតាមប្រពៃណីនៅគេហដ្ឋាន ស្ថិតក្នុងឃុំបឹងចារ ស្រុកសំបូរ ខេត្តក្រចេះ ៕
ចែករំលែកព័តមាននេះ