ផ្លូវមេអន្តរភូមិ ១១ គីឡូម៉ែត្រនៅសង្កាត់ត្រើយកោះ ខូចខាតយ៉ាងធ្ងន់ធ្ងរ ពលរដ្ឋ និងព្រះសង្ឃស្នើសុំអាជ្ញាធរជួយជួសជុល
- កំពត
ខេត្តកំពត ៖ ផ្លូវមេអន្តរភូមិមួយខ្សែប្រវែង ១១គីឡូម៉ែត្រ ឆ្លងកាត់ ៤ភូមិក្នុងសង្កាត់ត្រើយកោះ ក្រុងកំពត ខេត្តកំពតចាប់ពីភូមិតាអង្គ ភូមិដូនតោក ភូមិស្រែ និងភូមិបឹងតាព្រាម កំពុងរងការខូចខាតយ៉ាងធ្ងន់ធ្ងរ ស្ទើរតែធ្វើដំណើរលែងបាន និងជាហេតុធ្វើឱ្យប៉ះពាល់យ៉ាងខ្លាំងដល់ការធ្វើដំណើរប្រចាំថ្ងៃរបស់បងប្អូនប្រជាពលរដ្ឋនៅក្នុងមូលដ្ឋាន ។
ជុំវិញបញ្ហាខាងលើនេះ ព្រះសង្ឃ និងប្រជាពលរដ្ឋ បាននិងកំពុងសម្តែងការព្រួយបារម្ភ ហានិភ័យបញ្ហាជួបគ្រោះថ្នាក់ចរាចររាល់យាន្តដែលធ្វើដំណើររបស់ប្រជាពលរដ្ឋលើផ្លូវមួយខ្សែនេះ ក៏ដូចជាដាក់សំណូមពរយ៉ាងទទូចដល់អាជ្ញាធរ និងមន្ត្រីជំនាញ មេត្តាចុះពិនិត្យ និងមានវិធានការស្តារ ឬជួសជុលឡើងវិញ ដើម្បីសម្រួលដល់ការធ្វើដំណើររបស់ពួកគាត់ ។
តាមការលើកឡើងពីប្រជាពលរដ្ឋនៅក្នុងតំបន់នោះបានឱ្យដឹងថា ស្ថានភាពផ្លូវនាពេលនេះ គឺមានសភាពខូចខាតធ្ងន់ធ្ងរលំបាកខ្លាំងក្នុងការធ្វើដំណើរឆ្លងកាត់លើផ្លូវមួយខ្សែនេះ និងមានការលំបាកទ្វេដង ជាពិសេសក្នុងរដូវវស្សាដែលមានភ្លៀងធ្លាក់ ។ ពលរដ្ឋបានលើកជាសំណួរដោយក្តីបារម្ភថា «តើផ្លូវមួយខ្សែនេះស្ថិតក្រោមការទទួលខុសត្រូវរបស់ខាងណាពិតប្រាកដ? ហើយតើអាជ្ញាធរ ឬមន្ត្រីជំនាញនឹងចុះជួយពិនិត្យមើលពេលណា ឬមួយត្រូវទុកឱ្យពលរដ្ឋឆ្លងកាត់ទាំងលំបាកបែបនេះបន្តទៀត?» ៕
ចែករំលែកព័តមាននេះ