​ទីក្រុងមូស្គូ៖​ អង្គភាពសន្តិសុខសហព័ន្ធរុស្ស៊ី (FSB) បានប្រកាសថា លោក​Pavel Durov​ ស្ថាបនិកកម្មវិធីផ្ញើសារ​ Telegram​ ត្រូវបានចោទប្រកាន់តាមផ្លូវច្បាប់ពីបទជួយសម្រួលដល់សកម្មភាពភេរវកម្ម។ ការចោទប្រកាន់នេះធ្វើឡើងដោយអះអាងថា Telegram មិនបានលុបចោលបណ្តាញ សន្ទនា និង Bot មួយចំនួន ដែលត្រូវបានប្រើប្រាស់ក្នុងសកម្មភាពបង្កអំពើវិនាសកម្ម និងភេរវកម្មនៅលើទឹកដីរុស្ស៊ី។ នេះបើយោងតាមការចុះផ្សាយរបស់សារព័ត៌មាន ស៊ីនហួ នៅថ្ងៃទី២៩​ ខែកក្កដានេះ។

តាមការចោទប្រកាន់របស់ FSB បណ្តាញទាំងនោះត្រូវបានប្រើដោយអង្គភាពសម្ងាត់របស់អ៊ុយក្រែន ដើម្បីរៀបចំផែនការវាយប្រហារ បង្កអំពើហិង្សា ឆបោកតាមប្រព័ន្ធអ៊ីនធឺណិត និងសកម្មភាពផ្សេងៗ ដែលរុស្ស៊ីអះអាងថាបានបណ្តាលឱ្យមានអ្នកស្លាប់ និងរបួសជាច្រើន រួមទាំងស្ត្រី និងកុមារ ព្រមទាំងការខូចខាតទ្រព្យសម្បត្តិមានតម្លៃរាប់ពាន់លានរូបល៍។

FSB ក៏បានអះអាងថា សេវាស្វែងរកគូស្នេហ៍​ Dayvinchik​ នៅលើ Telegram ត្រូវបានប្រើប្រាស់ដោយភ្នាក់ងារសម្ងាត់អ៊ុយក្រែន ដែលបានក្លែងខ្លួនជានារីវ័យក្មេង ដើម្បីទាក់ទងយុវជនរុស្ស៊ី និងជំរុញឱ្យពួកគេចូលរួមសកម្មភាពខុសច្បាប់។ អាជ្ញាធររុស្ស៊ីអះអាងថា ចាប់តាំងពីខែកក្កដា ឆ្នាំ២០២៥ មក មានយុវជនរុស្ស៊ីចំនួន ៤៦នាក់ ត្រូវបានចាប់ខ្លួននៅក្នុងតំបន់ចំនួន ១៦ ពាក់ព័ន្ធនឹងសកម្មភាពវាយប្រហារ និងដុតបំផ្លាញទីតាំងផ្សេងៗ តាមការណែនាំរបស់អង្គភាពសម្ងាត់អ៊ុយក្រែន។

Telegram ត្រូវបានបង្កើតឡើងនៅឆ្នាំ២០១៣ ដោយលោក Pavel Durov ហើយបច្ចុប្បន្នមានអ្នកប្រើប្រាស់សកម្មជាង ១ពាន់លាននាក់ក្នុងមួយខែ។ ទោះជាយ៉ាងណា ព័ត៌មានខាងលើគឺជាការចោទប្រកាន់របស់ភាគីរុស្ស៊ី ហើយមិនមានការបញ្ជាក់ឯករាជ្យ ឬការឆ្លើយតបពីលោក Pavel Durov ឬ Telegram នៅក្នុងសេចក្តីរាយការណ៍នេះទេ៕