កម្លាំងសាមគ្គីអ្នកភូមិអូររុន រួមដៃគ្នារុះរើសម្រាស់ ដើម្បីការពារស្ពានឈើកុំឱ្យខូចខាត ឬបាក់
- ស្ទឹងត្រែង
ខេត្តស្ទឹងត្រែង ៖ ក្រោមរូបភាព និងសកម្មភាពដ៏រស់រវើកពីភូមិអូររុន ឃុំអូរស្វាយ ស្រុកបុរីអូស្វាយសែនជ័យ បានបង្ហាញពីស្មារតីសាមគ្គីភាពយ៉ាងរឹងមាំ និងការទទួលខុសត្រូវខ្ពស់របស់ប្រជាពលរដ្ឋក្នុងមូលដ្ឋាន ក្នុងការរួមគ្នារុះរើសម្រាស់ឈើយ៉ាងធំសន្ធឹកសន្ធាប់ដែលហូរតាមទឹកមកទើជើងស្ពានឈើ ដើម្បីការពារកុំឱ្យមានការខូចខាត ឬបាក់ស្ពានដោយសារសម្ពាធទឹកហូរ។
បើតាមអ្នកភូមិអូររុនម្នាក់បានប្រាប់ថាបន្ទាប់ពីមានជំនន់ទឹកភ្លៀងហូរគួចយ៉ាងខ្លាំង បាននាំមកនូវកំណាត់ឈើ មែកឈើ និងកំទេចកំទីធម្មជាតិជាច្រើនមក កកស្ទះនៅជើងស្ពានឈើ ដែលក្លាយជាកម្លាំងរាំងស្ទះ លំហូរទឹក និងបង្កើតជាសម្ពាធយ៉ាងខ្លាំងមកលើស្ពាន។ ដោយមានការព្រួយបារម្ភយ៉ាងខ្លាំងពីសុវត្ថិភាពផ្លូវធ្វើដំណើរ និងការដាច់ទំនាក់ទំនងផ្លូវគោកក្នុងភូមិ-ឃុំ ប្រ
ជាពលរដ្ឋបានប្រមូលផ្តុំគ្នាយ៉ាងស្វាហាប់ ចុះកាប់ និងរុះរើសម្រាស់ទាំងនោះចេញពីគល់ស្ពាន។ សកម្មភាពនេះមិនត្រឹមតែប្រើប្រាស់កម្លាំងដៃ បង្គោលឈើ និងរ៉ៃកាប់ឈើផ្ទាល់ខ្លួនដោយកម្លាំងបាយ និងគ្រោះថ្នាក់ប៉ុណ្ណោះទេ ប៉ុន្តែថែមទាំងមានការចូលរួមប្រើប្រាស់ត្រាក់ទ័រ ដើម្បីជួយទាញ និងកាយកំណាត់ឈើធំៗចេញពីចរន្តទឹកហូរយ៉ាងមមាញឹកផងដែរ។
ស្មារតី “ជួយខ្លួនឯង និងរៀបចំសហគមន៍” របស់ប្រជាពលរដ្ឋភូមិអូររុន បានរំលេចយ៉ាងច្បាស់ពីមនសិការរួមក្នុងការថែរក្សាទ្រព្យសម្បត្តិសាធារណៈ។ ការរួមដៃគ្នារុះរើសម្រាស់ចេញពីគល់ស្ពានបានជោគជ័យនេះ មិនត្រឹមតែជួយរំដោះលំហូរទឹកឱ្យដើរបានល្អ ប្រ
សើរនិងកាត់បន្ថយហានិភ័យនៃការបាក់ស្ពានប៉ុណ្ណោះទេ ប៉ុន្តែថែមទាំងជាគំរូដ៏ប្រពៃនៃកម្លាំងសាមគ្គីក្នុង សហគមន៍ ដែលទប់ទល់នឹងបាតុភូតធម្មជាតិ និងការពារផលប្រយោជន៍រួមបានយ៉ាងទាន់ពេលវេលា៕
ចែករំលែកព័តមាននេះ