ក្រុមគ្រួសារជនរងគ្រោះ អំពាវនាវដល់ស្នងការរាជធានីភ្នំពេញ ចាត់វិធានការលើក្រុមតាំងខ្លួនជាខ្លារបស់ «មេ០៧» ប្រើហិ.ង្សាយ៉ាងសាហាវ
- ភ្នំពេញ
រាជធានីភ្នំពេញ ៖ ផ្ទុះតាមបណ្ដាញសង្គមហ្វេសប៊ុកធ្វើឱ្យមានមតិយោបល់ថា សមត្ថកិច្ចមិនគួរលើកលែងឱ្យក្មេងទំនើងយកឈ្មោះ «មេ០៧» ដែលជារហស្សនាមអនុប្រធានការិយាល័យនគរបាលព្រហ្មទណ្ឌកម្រិតស្រាលថាជាមេ ដោយពួកគេជិះម៉ូតួដេញកៀប និងដេញតាមចាប់ក្មេងស្លូតត្រង់តាមដងផ្លូវ និងធ្វើការវាយដំយ៉ាងសាហាវផងដែរ ។ ការអំពាវនាវនេះ បានស្នើត្រង់ៗទៅលោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ សូមមេត្តាពិនិត្យករណីខាងលើនេះផង ។
បាតុភាពនេះបានកើតឡើង នៅពេលជនស៊ីវិលមួយក្រុមតាំងខ្លួនជាខ្លារបស់ «មេ០៧» ជិះម៉ូតូជាច្រើនគ្រឿងដេញតាមយុវជន ២នាក់ដែលជិះម៉ូតូឌុបគ្នាហើយស្រែកថាចោរៗ រហូតឈានដល់ការធាក់ផ្ដួលម៉ូតូរួចប្រើហិង្សាវាយដំយុវជនម្នាក់ក្នុងចំណោម ២នាក់នោះបណ្ដាលឲ្យរងរបួសរហូតដល់សន្លប់មួយសន្ទុះ ។ ការប្រទូស្តរ៉ាយរបស់ពួកតាំងខ្លួនជាកូនខ្លានោះ ត្រូវបានគេបង្ហោះតាមហ្វេសប៊ុកបន្តគ្នាពីមួយទៅមួយ ។
ហេតុការណ៍នេះ បានកើតឡើងកាលពីវេលាម៉ោងប្រមាណ ១រំលងអធ្រាត្រឈានចូលថ្ងៃទី ២៦ ខែកក្កដា ឆ្នាំ ២០២៦កន្លងទៅ នៅចំណុចកែងរវាងមហាវិថីព្រះនរោត្តមនិងផ្លូវលេខ៤៦៦ ស្ថិតក្នុងភូមិ១៣ សង្កាត់ទន្លេបាសាក់ ខណ្ឌចំការមន ។ សមត្ថកិច្ច និងអាជ្ញាធរមូលដ្ឋានបានឱ្យដឹងថា ករណីនេះ គឺក្រុមក្មេងទំនើងជិះម៉ូតូដេញចាប់គ្នាដូចព្យុះតាមដងផ្លូវផ្អើលពេញភ្នំពេញ ដោយចេញពីម្ដុំវិមានឯករាជ្យដេញតាមមហាវិថីព្រះនរោត្ដម ពីខាងជើងទៅខាងត្បូង រហូតដល់កែងជាមួយផ្លូវលេខ៤៦៦ ជនរងគ្រោះជិះម៉ូតូដួល ។ ពេលនោះត្រូវក្មេងទំនើងចាប់វាយទាត់ធាក់កណ្តាលមុខយ៉ាងសាហាវ និងអះអាងថាខ្លួនជាខ្លា មេ០៧ ការិយាល័យព្រហ្មទណ្ឌកម្រិតស្រាល ស្នងការដ្ឋាននគរបាលរាជធានីភ្នំពេញ ។
លុះក្រោយមក ទើបមានកម្លាំងការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញ ដែលកំពុងល្បាតមកដល់កន្លែងកើតហេតុ និងចាប់វាយខ្នោះក្រុមក្មេងទំនើងដែលអះអាងថាជាខ្លា មេ០៧ អនុប្រធានការិយាល័យព្រហ្មទណ្ឌកម្រិតស្រាល តែត្រូវបានបដិសេធថា មិនមែនខ្លានោះទេ ។
សមត្ថកិច្ចខណ្ឌចំការមននិយាយថា នគរបាលការិយាល័យព្រហ្មទណ្ឌកម្រិលស្រាលរាជធានីភ្នំពេញ បានឃាត់ខ្លួនយុវជនម្នាក់ក្នុងចំណោមបក្ខពួកមួយចំនួនប្រគល់ឱ្យប៉ុស្តិ៍នគរបាលរដ្ឋបាលទន្លេបាសាក់ មិន មែនកម្លាំងប៉ុស្តិ៍ទៅចាប់ឃាត់នោះទេ ។ បន្ទាប់មក បានសម្របសម្រួលដោយភាគីខាងក្មេងទំនើងដែលអះអាងថា ខ្លួនជាខ្លា មេ០៧ បានសងសំណងថ្លៃព្យាបាលរបួសចំនួន ៥ម៉ឺនរៀល ហើយភាគីខាងរងគ្រោះក៏ព្រមទទួលយកដោយមិនប្ដឹងប្ដល់ និងព្រមថតវីដេអូនិយាយថា មិនមានការបង្ខិតបង្ខំពីសមត្ថកិច្ចទេ ។
ជាមួយនេះ ក្រោយពីបានឆ្លងយោបល់ទៅការិយាល័យព្រហ្មទណ្ឌកម្រិតស្រាលរាជធានីភ្នំពេញ បានឯកភាពឱ្យទៅផ្ទះវិញ ទើបសមត្ថកិច្ចខណ្ឌចំការមន ព្រមឱ្យជនរងគ្រោះ និងក្មេងទំនើងដែលយកឈ្មោះនាយរងការិយាល័យ «មេ០៧» ធ្វើខ្នងបង្អែកទៅផ្ទះរៀងៗខ្លួន និងឲ្យធ្វើកិច្ចសន្យាបញ្ឈប់ការយកឈ្មោះកងកម្លាំងមកគាបសង្កត់ ឬដេញចាប់មនុស្សតាមផ្លូវ ព្រោះជាទង្វើខុសច្បាប់ ។
ស្រាប់តែនៅថ្ងៃទី ២៦និងថ្ងៃទី ២៧ ខែកក្កដា ឆ្នាំ ២០២៦ ក៏មានការបង្ហោះផ្សាយតាមហ្វេសប៊ុក ធ្វើឱ្យជនរងគ្រោះជាមួយបងស្រីមិនសុខចិត្ត និងទាមទារឱ្យសមត្ថកិច្ចចាត់វិធានការតាមផ្លូវច្បាប់លើក្មេងទំនើង ដែលយកឈ្មោះ មេ០៧ ប្រើហិង្សាយ៉ាងសាហាវ ។ នៅពេលមើលតាមការបង្ហោះហ្វេសប៊ុក ឃើញក្មេងទំនើងដេញចាប់ខ្លួន និងមិនបានដឹងថា ខ្លួនសន្លប់ និងប្រកាច់ទាញសរសៃញាក់ពេញខ្លួនបែបនេះទេ ទាល់តែឃើញវីដេអូដែលបង្ហោះទើបដឹង ។
ក្រុមគ្រួសារជនរងគ្រោះ បានស្នើតាមការឡាយ (live)ព័ត៌មាន សូមលោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ចាប់ក្មេងទំនើងខ្លាមេ០៧ចាត់ការតាមផ្លូវច្បាប់ផង ៕
ចែករំលែកព័តមាននេះ