ប្រុងប្រយ័ត្ន! អាជីវករម្នាក់លក់សាច់ជ្រូកនៅផ្សារបឹងកុក ត្រូវចោរប្រើល្បិ.ចលួ.ចកាបូបលុយយកអស់ជិត ១០លានរៀល
- កំពង់ចាម
ខេត្តកំពង់ចាម ៖ មុខសញ្ញាចោរសកម្មចំនួន៣នាក់ក្នុងនោះប្រុសមួយស្រីពីរ បានធ្វើសកម្មភាពលួចយកកាបូបលុយរបស់អាជីវករលក់សាច់ជ្រូកនៅផ្សារបឹងកុក ក្រុងកំពង់ចាម ចំនួន៨លានរៀល ហើយបាននាំគ្នាគេចខ្លួនបាត់។គិតរហូតមកដល់ល្ងាចថ្ងៃទី២៧កក្កដា ឆ្នាំ ២០២៦ សមត្ថកិច្ចមិនទាន់ស្រាវជ្រាវរកឃើញជនសង្ស័យណាម្នាក់នោះទេ។
បើតាមអាជីវករលក់ដូរឈ្មោះអឿន សុភា អាយុ៥២ឆ្នាំ បានរៀបរាប់ឲ្យដឹងថា មុនពេលកើតហេតុគឺមេឃមានភ្លៀងធ្លាក់មួយសន្ធុសធំ ហើយក៏បានរាំងទៅវិញគ្រានោះគាត់កំពុងតែមើលទូរសព្ទដៃ នៅលើតូបរបស់ខ្លួនជ្រុងខាងកើតផ្សារបឹងកុក វេលាម៉ោងប្រហែល៥ល្ងាច ថ្ងៃទី២៦កក្កដា។ បន្ទាប់មកស្រាប់តែមានក្មេងប្រុសម្នាក់ដើរមកក្បែរតូបរបស់គាត់ដោយស្រែកប្រាប់ថាអ៊ំលុយអ្នកណាគេជ្រុះ! គ្រាន់តែឮបែបនេះក៏ឈានជើងចេញមកមើលហ្នឹងរើសលុយប្រភេទក្រដាស១០០ រៀល ប្រហែលមួយម៉ឺនរៀល។
អ្នកលក់សាច់ជ្រូករូបនេះបានបន្តឱ្យដឹងទៀតថា សកម្មភាពបានកើតឡើងប្រហែលមួយនាទីនោះ ពេលក្រឡេកមកមើលកាបូបលុយព្យួរនៅហ្នឹងសសរតូប ស្រាប់តែបាត់មិនឃើញ លុះពេលមើលជុំវិញតូបមិនមានឃើញមនុស្សណាម្នាក់នោះទេ ។ ដោយក្នុងកាបូបនោះមានលុយ៨លានរៀល លិខិតឆ្លងដែនមួយសន្លឹក អត្តសញ្ញាណប័ណ្ណមួយសន្លឹក
ត្រូវបានចោរលួចយកទៅបាត់ ហើយក៏បានឆោឡោសួរគេឯងនៅក្បែរនោះព្រមទាំងបានទូរសព្ទហើយកូនស្រីមកកន្លែងតូបលក់ដូរ។ សូមបញ្ជាក់ថាពេលកើតហេតុគឺនៅផ្សារបឹងកុក កន្លែងគាត់លក់ដូរដោយអ្នកលក់ផ្សេងទៀតគេបាននាំគ្នាត្រឡប់ទៅផ្ទះវិញអស់នៅសល់តែគ្រែប៉ុណ្ណោះ។មិនបង្អង់យូរកូនស្រីរបស់គាត់បានប្រញាប់ប្ដឹងផ្ទាល់មាត់ទៅកម្លាំងសមត្ថកិច្ច បានចុះមកធ្វើការសួរនាំក្រោយពេលកើតហេតុហើយរហូតមកដល់ព្រឹកថ្ងៃទី២៧កក្កដា កម្លាំងសមត្ថកិច្ចជាច្រើននាក់បានចុះមកម្ដងទៀត បានធ្វើការស្រាវជ្រាវដើម្បីរកមុខសញ្ញាក្រុមចោរលួច។
តាមរយៈកាមេរ៉ាសុវត្ថិភាពមុនពេលកើតហេតុគេបានឃើញមនុស្សបីនាក់ជិះម៉ូតូមួយគ្រឿង scoopy ពណ៌ខ្មៅមិនមានពាក់ស្លាកលេខ ដោយមនុស្សស្រីអ្នកឌុបបានឈប់នៅមុខផ្ទះប្រជាពលរដ្ឋ ហើយមានចោរប្រុសបានឡើងតូបយកកាបូបលុយរបស់គាត់រួចនាំគ្នាចេញទៅបាត់ ។នៅមិនឆ្ងាយប៉ុន្មានពីកន្លែងដូរលក់សាច់ជ្រូកប្រហែល៥០ម៉ែត្រកាលពីប៉ុន្មានខែមុន ក្រុមចោរអាចមុខសញ្ញាដដែលនេះលួចកាបូបលុយរបស់អាជីវករលក់បន្លែឈ្មោះឆន់ កាលណោះក្រុមចោរជិះម៉ូតូ scoopy ពណ៌ខ្មៅបែបនេះដែរ។អាជីវកររូបនេះបានអះអាងថាកន្លងមកករណីចោរលួចកាបូបរបស់អាជីវករនៅផ្សារបឹងកុកគឺមានច្រើនមកហើយ។
លោកវរៈសេនីយ៍ឯកអ៊ឹង ប៊ុន អធិការនគរបាលក្រុងកំពង់ចាម ប្រាប់ឲ្យដឹងដែរថាជុំវិញករណីនេះរូបលោកបានឲ្យកម្លាំងជំនាញក្រោមឲ្យបានចុះធ្វើការស្រាវដើម្បីតាមប្រមាញ់រកមុខសញ្ញា ៕
ចែករំលែកព័តមាននេះ