ឪពុកម្តាយរវល់ទៅធ្វើការ ផ្ញើកូនអាយុជាង២ឆ្នាំ ឱ្យជីដូនមើលថែ ស្រាប់តែប្រទះឃើញល.ង់ស្លា.ប់ក្នុងទឹកពាង
- ភ្នំពេញ
រាជធានីភ្នំពេញ ៖ ឪពុកម្តាយរវល់ទៅធ្វើការងារបានផ្ញើរកូនស្រីអាយុជា២ឆ្នាំ អោយជីដូនមើលថែ ស្រាប់តែប្រទះឃើញលង់ស្លាប់ក្នុងទឹកពាង បង្កឲ្យការភ្ញាក់ផ្អើលកាលពីម៉ោង៦ល្ងាច ថ្ងៃទី២៧ខែ កក្កដាឆ្នាំ២០២៦ នៅចំណុចផ្ទះជនរងគ្រោះ ក្នុងភូមិត្រាំដោក សង្កាត់ពងទឹក ខណ្ឌដង្កោ រាជធានីភ្នំពេញ ។
សពក្មេងរងគ្រោះ ឈ្មោះ សុធា គង់ស្រីនាថ ភេទស្រី អាយុ២ឆ្នាំ៧ខែ ទីលំនៅផ្ទះកើតហេតុខាងលើ ។
ប្រភពព័ត៌មានពីឈ្មោះ ម៉ម តុលា ភេទស្រី អាយុ៤៦ឆ្នាំ ត្រូវជាយាយរបស់ក្មេងស្រីរងគ្រោះបានឲ្យដឹងថា សព្វថ្ងៃនាងខ្ញុំនៅផ្ទះមើលចៅៗតូចចំនួន៤នាក់ ហើយកូនៗនាងខ្ញុំចេញទៅធ្វើការតាំងពីព្រឹកលុះល្ងាចឡើងទើបត្រឡប់មកផ្ទះវិញ កន្លងមកចៅស្រីរបស់គាត់តែងតែតោងឡើងទៅលើពាងដើម្បីលេងទឹក ពេលឃើញបែបនេះ គាត់តែងតែស្ដីបន្ទោស និងចាប់ដាក់មកក្រោមវិញ។ នៅវេលាម៉ោង៥និង៣០នាទីល្ងាច ថ្ងៃទី២៧ ខែកក្កដា ឆ្នាំ២០២៦ គាត់កំពុងមើលចៅផ្សេងៗ ស្រាប់តែបាត់មិនឃើញចៅស្រី គាត់ក៏ដើររកមើលស្រាប់តែប្រទះឃើញនៅក្នុងទឹកពាងនៅក្បែរផ្ទះហើយក៏ស្រង់ឡើងតែមិនដឹងខ្លួន ហើយគាត់ក៏ដឹកយកទៅសង្គ្រោះនៅមន្ទីរពេទ្យហ្លួងម៉ែ ពេលមកដល់មន្ទីរពេទ្យគ្រូពេទ្យពិនិត្យរួច ប្រាប់ថា ចៅគាត់របស់គាត់បានស្លាប់បាត់ទៅហើយ ។
ករណីនេះបន្តិចក្រោយមកក៍មានកម្លាំងសមត្ថកិច្ចមូលដ្ឋាននិងជំនាញកោសល្យវិច័យបច្ចេកទេសនៃស្នងការដ្ឋាននគរបាលរាជធានីភ្នំពេញ បានចុះទៅកន្លែងកើតហេតុពិនិត្យទីតាំងកើតហេតុនិងកោសល្យវិច័យសពក្មេងរងគ្រោះផងដែរ ។
យោងតាមការពិនិត្យកន្លែងកើតហេតុ ព័ត៌មានប្រមូលបាន និងការបញ្ជាក់ពីឧកញ៉ាវេជ្ជបណ្ឌិត នង សុវណ្ណរ័ត្ន គ្រូពេទ្យកោសល្យវិច័យអមតុលាការរាជធានីភ្នំពេញ សន្និដ្ឋានបានថា ស្លាប់ដោយសារឈ្លក់ទឹកនៅក្នុងពាង។
ក្រោយកើតហេតុ ករណីនេះសមត្ថកិច្ចមូលដ្ឋាននិងជំនាញកោសល្យវិច័យបច្ចេកទេស បានចុះទៅពិនិត្យកន្លែងកើតហេតុ និងសពក្មេងរងគ្រោះរួចហើយ ក៍ប្រគល់អោយសាច់ញាតិធ្វើបុណ្យតាមប្រពៃណី ៕
ចែករំលែកព័តមាននេះ