ផ្អើលទាំងយប់! ឡិចស៊ីស១គ្រឿងបើកសុខៗស្រាប់តែឆ្លងចរន្តអគ្គិសនី ឆាបឆេះយ៉ាងសន្ធោសន្ធៅនៅគល់ស្ពានជ្រោយចង្វា
- ភ្នំពេញ
រាជធានីភ្នំពេញ ៖ បុរសនារី២នាក់ បានបើកបររថយន្តគោលបំណងឡើងស្ពានជ្រោយចង្វារ មកដល់ត្រឹមគល់ស្ពានស្រាប់តែរថយន្តមានការហុយផ្សែងនិងឆេះភ្លាមៗសន្ធោសន្ធៅ កាលពីវេលាម៉ោង៩និង៤០នាទីយប់ ថ្ងៃទី២៧ ខែកក្កដា ឆ្នាំ២០២៦ នៅគល់ស្ពានជ្រោយចង្វារខាងលិច សង្កាត់ស្រះចក ខណ្ឌដូនពេញ រាជធានីភ្នំពេញ ។
ប្រភពព័ត៌មានបានឲ្យដឹងថា មុនពេលកើតហេតុ គេបានឃើញបុរសនារី២នាក់ បើកបររថយន្ត LEXUS CT200h ពណ៌ស ពាក់ផ្លាកលេខ ភ្នំពេញ 2BC-1302 ធ្វើដំណើរមកកាន់រង្វង់មូលកួចកាណុង បម្រុងនិងឡើងស្ពានជ្រោយចង្វារ ក៏ស្រាប់តែឆ្លងចរន្ត បណ្តាលឲ្យរថយន្តមានការហុយផ្សែងឆាបឆេះមួយកំណាត់ផ្នែកខាងមុខតែម្តង ។
ប្រភពដដែលបានបន្តថា ដោយឃើញដូចនេះ ពលរដ្ឋនាំគ្នារាយការណ៍ជូនមន្ត្រីអគ្គិភ័យ ដើម្បីសុំការអន្តរាគមន៍ជាបន្ទាន់តែម្តង ។ លុះបានមួយសន្ទុះធំ គេបានឃើញរថយន្តពន្លត់អគ្គិភ័យរបស់ការិយាល័យនគរបាលបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញ ធ្វើដំណើរមកដល់បានអន្តរាគមន៍សង្គ្រោះនិងបាញ់ពន្លត់ភ្លាមៗផងដែរ ។
ករណីអគ្គិភ័យនេះត្រូវបានមន្ត្រីជំនាញគ្រប់គ្រងបានទាំងស្រុង ដោយមិនអោយមានមនុស្សរងរបួសនោះទេ ចំណែករថយន្តដែលឆេះ ត្រូវបានមន្ត្រីជំនាញ ប្រគល់ជូនម្ចាស់វិញ ដើម្បីស្ទូចយកទៅជួសជុលដោយខ្លួនឯង ៕
ចែករំលែកព័តមាននេះ