ទីក្រុងវ៉ាស៊ីនតោន៖ រដ្ឋបាលរបស់លោកដូណាល់ត្រាំជម្រាបជូនសមាជិកព្រឹទ្ធសភាថាជំនួយជាទឹកប្រាក់សម្រាប់អ៊ុយក្រែន៤រយលានដុល្លារដែលព្រឹទ្ធសភាបានអនុម័តទៅឱ្យអ៊ុយក្រែននោះ មិនមែនមានន័យថាចំណាយអស់ប៉ុណ្ណឹងគឺលែងផ្ដល់ឱ្យទៀតនោះទេ។ ខ្លួននឹងបន្តជួយអ៊ុយក្រែនរហូតដល់ឆ្នាំ២០២៩។ កាលពីខែឧសភា ក្រសួងការពារជាតិអាមេរិកបានផ្ញើលិខិតមួយច្បាប់ជូនសមាជិកព្រឹទ្ធសភាដើម្បីរៀបរាប់ថាត្រូវចំណាយលើអ្វីខ្លះ។ នេះបើយោងតាមប្រភពសម្ងាត់ម្នាក់ដែលដឹងអំពីសំណុំឯកសារនោះ។ ក្រុមគណបក្សប្រជាធិបតេយ្យ និងសមាជិកខ្លះរបស់គណបក្សសាធារណរដ្ឋរិះគន់ថាមន្ទីរបញ្ចកោណនៅបង្អែបង្អង់មិនព្រមផ្ដល់ជំនួយទៅឱ្យអ៊ុយក្រែនឱ្យបានឆាប់រហ័សបន្ទាប់ពីសមាជិកព្រឹទ្ធសភារបស់គណបក្សទាំង២បានអនុម័តតាំងពីឆ្នាំមុនមកម៉្លេះ។
ពីរខែបន្ទាប់ពីការផ្ញើលិខិតនោះ ជំនួយនៅតែមិនទាន់បញ្ចេញយកមកប្រើនៅឡើយទេ។ ព្រឹទ្ធសភាធ្លាប់បានតវ៉ាជាច្រើនដងហើយថាការបញ្ចេញសាច់ប្រាក់សម្រាប់ផ្ដល់ជំនួយទៅឱ្យអ៊ុយក្រែនមានភាពយឺតយ៉ាវ។ លោកហ្សេឡិនស្គីត្រៀមជួបលោកត្រាំនៅយប់នេះដើម្បីជំរុញឱ្យអាមេរិកបញ្ជូនប្រព័ន្ធការពារដែនអាកាសឱ្យបានលឿន និងដើម្បីចុះកិច្ចសន្យាជាមួយអាមេរិកទៅលើគម្រោងផលិតដ្រូន។ បន្ទាប់ពីជួបគ្នារួច លោកនឹងឡើងថ្លែងនៅក្នុងវិមានកាពីតូលនៅចំពោះមុខសមាជិកព្រឹទ្ធសភាទាំងមួយរយនាក់។ ចំណែកសមាជិករដ្ឋសភាមិនបាននៅវិមាននោះទេព្រោះពួកគេកំពុងដើរលំហែកាយរដូវក្ដៅ។
សមាជិកព្រឹទ្ធសភាមិនសប្បាយចិត្តទាល់តែសោះដែលមន្ទីរបញ្ចកោណមិនបញ្ជូនជំនួយឱ្យបានទាន់សភាពការណ៍។ នៅដំណាក់កាលចុងក្រោយនេះ លោកដូណាល់ត្រាំហាក់ដូចជាប្រកាន់ឥរិយាបថបែបវិជ្ជមានចំពោះអ៊ុយក្រែន។ លោកចុះហត្ថលេខាលើសំណើមួយដែលផ្ដល់សិទ្ធិឱ្យអ៊ុយក្រែនផលិតប្រព័ន្ធមីស៊ីលការពារដែនអាកាសម៉ាកផេទ្រាតនៅលើទឹកដីអ៊ុយក្រែនផ្ទាល់តែម្ដង។ មិនតែប៉ុណ្ណោះ លោកឱ្យតម្រុយថាអាចនឹងចុះហត្ថលេខាលើសេចក្ដីព្រាងច្បាប់ដាក់ទណ្ឌកម្មរុស្ស៊ីជាថ្មី។ កាលពីខែមេសា ព្រឹទ្ធសមាជិកមកពីគណបក្សសាធារណរដ្ឋ លោកមីចម៉ាក់ខឺណល (Mitch McConnell) បានចេញផ្សាយបទវិចារណកថាមួយរិះគន់ការផ្ដល់ជំនួយយោធាយឺតយ៉ាវ។
គម្រោងផ្ដល់ជំនួយដូចដែលមានសរសេររៀបរាប់នៅក្នុងលិខិតនោះរួមមានការកសាងសមត្ថភាព ការផ្ដល់គ្រឿងបរិក្ខារ បណ្ដុះបណ្ដាល និងសេវាកម្មផ្សេងៗសម្រាប់កងទ័ពអ៊ុយក្រែនការពារខ្លួនទល់នឹងការវាយលុករបស់រុស្ស៊ី។ ក្នុងនោះ ជំនួយ២០០លានដុល្លារសម្រាប់ទិញអាវុធ គ្រាប់រំសេវ និងគ្រាប់បែក។ ជំនួយ ៩៩,៩លានដុល្លារសម្រាប់ទិញរថយន្ត គ្រឿងបន្លាស់ និងគ្រឿងបរិក្ខារ និង១០០លានដុល្លារទៀតសម្រាប់សេវាកម្មផ្សេងៗដូចជាការដឹកជញ្ជូនជាដើម។ យោងតាមច្បាប់របស់អាមេរិក ប្រធានាធិបតីត្រូវតែអនុវត្តការផ្ដល់ជំនួយដែលព្រឹទ្ធសភាបានអនុម័តរួចហើយ ហើយមិនអាចរារាំងជំនួយនោះបានទេ៕ ប្រភព៖ Reuters
ចែករំលែកព័តមាននេះ