ទីក្រុងយេរូសាឡឹម៖ នាយករដ្ឋមន្ត្រីអ៊ីស្រាអែល លោកណឺតាន់យ៉ាហ៊ូ ផ្ទុះកំហឹងយ៉ាងខ្លាំងនឹងអភិបាលក្រុងញូយ៉ក លោកម៉មដានី ដែលជាមនុស្សរបស់គណបក្សប្រជាធិបតេយ្យ និងដែលចោទប្រកាន់ថាលោកជាឧក្រិដ្ឋជនសង្គ្រាម។ លោកណឺតាន់យ៉ាហ៊ូថាអភិបាលក្រុងរូបនេះកំពុងតែសាបព្រោះការស្អប់ខ្ពើមគ្នា។ លោកម៉មដានីអំពាវនាវឱ្យអាជ្ញាធរចាប់ខ្លួនលោកណឺតាន់យ៉ាហ៊ូយកទៅផ្ដន្ទាទោសពាក់ព័ន្ធនឹងសង្គ្រាមនៅតំបន់ហ្កាហ្សាប្រសិនបើលោកណឺតាន់យ៉ាហ៊ូធ្វើដំណើរទៅទីក្រុងញូយ៉កដើម្បីប្រជុំអង្គការសហប្រជាជាតិ។ លោកណឺតាន់យ៉ាហ៊ូនិយាយដោយសម្ដីសឿងបឿងថាលោកត្រូវតែទៅប្រជុំនៅអង្គការសហប្រជាជាតិនៅខែកញ្ញាខាងមុខនេះទោះបីលោកម៉មដានីមិនស្វាគមន៍លោកក៏ដោយ។
លោកណឺតាន់យ៉ាហ៊ូថ្លែងថាគាត់ (ម៉មដានី) គួរណាស់ជាអ្នកតំណាងឱ្យប្រជាជនរស់នៅទីក្រុងញូយ៉កទាំងមូល ហើយមិនត្រូវប្រកាន់ថាពួកគេជាជនជាតិជ្វីប កាន់សាសនាគ្រិស្ត ឥស្លាម ឬអ្វីទេ។ ប៉ុន្តែជាក់ស្ដែង គាត់ (ម៉មដានី) យកក្រុមមួយទៅប្រឆាំងក្រុមមួយទៀត។ កាលពីថ្ងៃអាទិត្យ លោកក៏បានច្រានចោលការចោទប្រកាន់ពីសំណាក់ ICC ផងដែរ និងចាត់ទុកថានោះជាឡប់ឡែ ឬឆាកល្ខោនដែលគេរៀបចំឡើងតែប៉ុណ្ណោះ។ ជាការវាយបកវិញទៅលើតុលាការនេះ លោកបានលើកឡើងថាប្រធានរដ្ឋអាជ្ញារបស់ ICC ទៅវិញទេដែលធ្វើរឿងមិនត្រឹមត្រូវ និងជាប់សង្ស័យពីបទបៀតបៀនផ្លូវភេទ។ ជាក់ស្ដែង ប្រធានរដ្ឋអាជ្ញារូបនេះត្រូវ ICC ដកចេញពីតំណែងបាត់ទៅហើយកាលពីថ្ងៃសុក្រ។
លោកណឺតាន់យ៉ាហ៊ូថ្លែងបន្តទៀតថាលោកកំពុងបារម្ភថាការគាំទ្រពីសំណាក់អាមេរិកចំពោះអ៊ីស្រាអែលដែលធ្លាប់តែស្រុះស្រួលគ្នាទាំង២គណបក្សនោះអាចនឹងមិនដូចមុនទេដោយសារក្រុមគណបក្សប្រជាធិបតេយ្យដែលមានចរិតបដិវត្តនិយម និងឆ្វេងនិយមចាប់ផ្ដើមចងសម្ព័ន្ធភាពជាមួយក្រុមលោកម៉មដានី។ លោកណឺតាន់យ៉ាហ៊ូក៏បានសម្ដែងការព្រួយបារម្ភអំពីគំនិតប្រឆាំងអ៊ីស្រាអែលនៅអាមេរិក និងនៅប្រទេសដទៃទៀតនៃលោកខាងលិច។ លោកថានៅពេលលោកសំណេះសំណាលជាមួយប្រជាជននៅទីក្រុងញូយ៉កដែលជាទីក្រុងមានជនជាតិជ្វីបរស់នៅច្រើនលំដាប់ទី២នៅទូទាំងសាកលលោកនោះ ជនជាតិជ្វីបមានអារម្មណ៍រស់នៅគ្មានសេចក្ដីសុខទេ។
នៅពេលឃោសនាបោះឆ្នោតកាលពីឆ្នាំមុន លោកម៉មដានីសន្យាថានឹងចេញបញ្ជាឱ្យនគរបាលទីក្រុងញូយ៉កចាប់ខ្លួនលោកណឺតាន់យ៉ាហ៊ូតាមដីការបស់ ICC។ ប៉ុន្តែលោកទទួលស្គាល់កាលពីសប្ដាហ៍មុនថាទីក្រុងដែលលោកគ្រប់គ្រងនេះមិនមានដែនសមត្ថកិច្ចផ្នែកផ្លូវច្បាប់ដើម្បីចាប់ខ្លួនលោកណឺតាន់យ៉ាហ៊ូទេ។ ដូច្នេះ លោកស្នើសុំឱ្យអាជ្ញាធរសហព័ន្ធចាត់ការរឿងនេះ។ លោកថាលោកចង់បញ្ជាក់ឱ្យបានច្បាស់ថាទីក្រុងញូយ៉កមិនស្វាគមន៍លោកណឺតាន់យ៉ាហ៊ូ និងឧក្រិដ្ឋជនសង្គ្រាមដទៃទៀតឡើយ។ លោកថាលោកយល់ច្បាស់អំពីកំហឹងរបស់មហាជន ហើយទីក្រុងនេះគោរពជានិច្ចនូវការសម្ដែងមតិ។
កាលពីថ្ងៃចន្ទ លោកត្រាំបានផ្ដល់ការធានាថាលោកណឺតាន់យ៉ាហ៊ូនឹងមិនត្រូវបានចាប់ខ្លួនបញ្ជូនទៅឱ្យ ICC ទេនៅពេលលោកស្ថិតនៅលើទឹកដីអាមេរិក។ លោកណឺតាន់យ៉ាហ៊ូនឹងធ្វើដំណើរទៅដល់ទីក្រុងវ៉ាស៊ីនតោននៅសប្ដាហ៍នេះដើម្បីជួបពិភាក្សាគ្នាជាមួយលោកត្រាំ និងចូលរួមពិធីបុណ្យសពអតីតព្រឹទ្ធសមាជិកមកពីគណបក្សសាធារណរដ្ឋ លោកលីនសេ ក្រាហាម ដែលជាអ្នកតំណាងឱ្យរដ្ឋខារ៉ូឡាយណាខាងត្បូង។ ក្រាហាមជាអ្នកគាំទ្រយ៉ាងប្ដូរផ្ដាច់ចំពោះរដ្ឋអ៊ីស្រាអែល។ លោកទទួលអនិច្ចកម្មកាលពី២សប្ដាហ៍មុនដោយសារការរហែកសរសៃឈាមបេះដូង។ លោកណឺតាន់យ៉ាហ៊ូចាត់ទុកលោកក្រាហាមជាអ្នកស្នេហាជាតិអាមេរិកដ៏ឆ្នើមម្នាក់៕
ចែករំលែកព័តមាននេះ