មហាជនគាំទ្រចំណាត់ការម៉ឺងម៉ាត់របស់ប្រធានសហព័ន្ធកីឡាប្រដាល់គុនខ្មែរជុំវិញរឿងរ៉ាវកីឡាករថៃលួ.ចវ៉ៃមន្ត្រីកីឡាកម្ពុជានៅអូស្ត្រាលី
- ភ្នំពេញ
រាជធានីភ្នំពេញ ៖ លោកឧត្តមសេនីយ៍ទោ ខូវ ឆាយ ប្រធានសហព័ន្ធកីឡាប្រដាល់គុនខ្មែរបានប្រកាសយ៉ាងមុឺងម៉ាត់កាលពីថ្ងៃទី២៦ ខែកក្កដា ថា«មិនដកពាក្យបណ្ដឹងជាដាច់ខាត»ទោះបីមានការសុំអង្វរសម្របសម្រួលពីភាគីថៃរឿងកីឡាករថៃលួចវាយឆ្មក់លើមន្ត្រីកីឡាគុនខ្មែរក្នុងព្រឹត្តិការណ៍ប្រកួតប្រដាល់នៅប្រទេសអូស្ត្រាលីកាលពីថ្ងៃទី១៧ ខែកក្កដា ឆ្នាំ២០២៦។
ទោះបីជាមានការសុំសម្របសម្រួលក្តី ក៏មានការលើកឡើងពីមហាជនថា ភាគីបង្កហេតុ(ថៃ)ព្យាយាមដោះស្រាយដើម្បីតែផលប្រយោជន៍ និងកិត្តិយសផ្ទាល់ខ្លួន បន្ទាប់ពីបានប្រព្រឹត្តអំពើហិង្សាក្រៅសង្វៀនលើមន្ត្រីកីឡាគុនខ្មែរលោកពេជ្រ សុផាន់ ដែលជាគ្រូបង្វឹករបស់កីឡាករពេជ្រ សម្បត្តិ ។
ភាគីថៃដឹងថា បើមិនសម្របសម្រួលឱ្យភាគីកម្ពុជាដកពាក្យបណ្តឹងនោះវិញទេ ពួកគេនឹងបាត់បង់ការគាំទ្រយ៉ាងខ្លាំងពីមហាជនមិនខាន ។ ជាងនេះទៅទៀត ហេតុការណ៍នេះបានជះឥទ្ធិពលអាក្រក់ដល់កីឡាករថៃឈ្មោះសុងគ្រ ផិចយិនឌី (Songraw Petchyindee) ដែលត្រូវឡើងប្រកួតតំណាងឱ្យភាគីអូស្ត្រាលី ក្នុងកម្មវិធីប្រកួតបន្តបន្ទាប់ទៀតនៅចុងខែកក្កដា ឆ្នាំ២០២៦ នេះ។
សហព័ន្ធកីឡាគុនខ្មែរបានសម្រេចរុញសំណុំរឿងនេះទៅឱ្យប្រព័ន្ធច្បាប់ និងតុលាការនៃប្រទេសអូស្ត្រាលីដែលជាទីតាំងកើតហេតុជាអ្នកចាត់ការ និងចេញសាលក្រមសេចក្តីសម្រេចជាផ្លូវការ ។
បច្ចុប្បន្ន ប្រជាពលរដ្ឋខ្មែរទាំងក្នុងប្រទេស និងអ្នករស់នៅប្រទេសអូស្ត្រាលី បានបង្ហាញការគាំទ្រយ៉ាងពេញទំហឹងចំពោះចំណាត់ការផ្លូវច្បាប់របស់លោក ខូវ ឆាយ ដើម្បីស្វែងរកយុត្តិធម៌ និងការពារសេចក្តីថ្លៃថ្នូររបស់មន្ត្រីកីឡាខ្មែរ។
គួររំលឹកផងដែរថា ករណីកីឡាករថៃលួចវាយលោកគ្រូ ពេជ្រ សុផាន់ គឺជាហេតុការណ៍ហិង្សាក្រៅសង្វៀនដ៏កក្រើកមួយដែលបានកើតឡើងក្នុងព្រឹត្តិការណ៍ប្រកួតគុនខ្មែរ Best of the Best នៅទីក្រុងស៊ីដនី ប្រទេសអូស្ត្រាលី កាលពីល្ងាចថ្ងៃទី១៧ ខែកក្កដា ឆ្នាំ២០២៦។
ជនបង្កហេតុគឺជាកីឡាករថៃឈ្មោះ សុងគ្រ ផិចយិនឌី (Songraw Petchyindee) ដែលត្រូវឡើងប្រកួតតំណាងឱ្យអូស្ត្រាលី ។ តាមគម្រោង កីឡាករថៃរូបនេះត្រូវប្រកួតមិត្តភាពជាមួយកីឡាករខ្មែរ ឡុង សំណាង ក្នុងប្រភេទទម្ងន់៦៧គីឡូក្រាម ប៉ុន្តែរូបគេមិនគោរពច្បាប់ប្រកួតបានបណ្ដោយឱ្យខ្លួនលើសទម្ងន់រហូតដល់២គីឡូក្រាម ។ អ្នករៀបចំការប្រកួតបានសម្របសម្រួលរុញគូនេះទៅប្រកួតចុងក្រោយគេ ដើម្បីទុកពេលឱ្យគេសម្រកទម្ងន់ឱ្យនៅត្រឹម៦៨គីឡូក្រាម និងថ្លឹងម្តងទៀត ។ ប៉ុន្តែ កីឡាករថៃរូបនេះមិនព្រមធ្វើតាម បែរជាឡើងមកអុកឡុកលើសង្វៀនទាំងមិនទាន់ដល់វេន និងស្រែកហៅ ឡុង សំណាង ឱ្យចេញមកវាយជាមួយខ្លួន។
ក្នុងស្ថានភាពច្របូកច្របល់នោះ កីឡាករថៃរូបនេះបានលួចវាយឆ្មក់ចំចំហៀងមុខ និងក្បាលលោកគ្រូ ពេជ្រ សុផាន់ ពីក្រោយខ្នងទាំងដែលលោកគ្រូមិនបានដឹងខ្លួន និងមិនទាន់បានត្រៀមខ្លួនឡើយ ។
សកម្មភាពអសីលធម៌ និងមិនមានវិជ្ជាជីវៈជាកីឡាករនេះ បានធ្វើឱ្យមហាជនខ្មែរទូទាំងប្រទេសសម្ដែងការមិនពេញចិត្ត និងខឹងសម្បារយ៉ាងខ្លាំង។ ភ្លាមៗនោះ លោកឧត្តមសេនីយ៍ទោ ខូវ ឆាយ ប្រធានសហព័ន្ធកីឡាប្រដាល់គុនខ្មែរ បានបដិសេធរាល់ការសុំសម្របសម្រួលពីភាគីថៃ និងបានរុញសំណុំរឿងហិង្សានេះទៅឱ្យប្រព័ន្ធច្បាប់ និងតុលាការអូស្ត្រាលីចាត់ការតាមផ្លូវច្បាប់ជាធរមាន ដើម្បីការពារកិត្តិយសជូនលោកគ្រូ ពេជ្រ សុផាន់ និងមន្ត្រីកីឡាគុនខ្មែរ។
ព័ត៌មានលម្អិតបន្ថែមអំពីដំណើរការក្តីនៅតុលាការអូស្ត្រាលីជុំវិញហេតុការណ៍ក្ដៅគគុកដូចបាយពុះខាងលើ នឹងត្រូវធ្វើបច្ចុប្បន្នភាពជាបន្តបន្ទាប់ទៀត នៅពេលសាលក្រមផ្លូវការត្រូវបានប្រកាសឡើង ៕
ចែករំលែកព័តមាននេះ