សង្គ្រាមអ៊ុយក្រែន ៖ ប្រធានាធិបតីអ៊ុយក្រែន លោកវ៉ូឡូឌីមៀរហ្សេឡេនស្គីអះអាងថា រុស្ស៊ីបានស្នើកម្លាំងជំនួយដ៏ច្រើនពីកូរ៉េខាងជើង គឹទាហាន៣០.០០០នាក់ថែមទៀត ដើម្បីជួយប្រយុទ្ធប្រឆាំងអ៊ុយក្រែន។
លោកហ្សេឡេនស្គី ប្រកាសអាសន្នជាថ្មីពីសម្ព័ន្ធភាពរវាងរុស្ស៊ី និងកូរ៉េខាងជើងប្រឆាំងអ៊ុយក្រែន។ លោកថា ក្រុងមូស្គូបានស្នើកម្លាំងជំនួយយោធាដ៏ច្រើនពីកូរ៉េខាងជើង។ តាមបណ្ដាញសង្គមX លោកសរសេរកាលពីថ្ងៃទី២៥ កក្កដា ថា រុស្ស៊ីចង់ទទួលបានទាហាន៣០.០០០នាក់ថែមទៀតពីកូរ៉េខាងជើង។ ចាប់តាំងពីខែមិថុនា មកការរៀបចំនានាកំពុងធ្វើ ក្នុងតំបន់វ៉ារ៉ូនីយេវរុស្ស៊ីដើម្បីទទួលទាហានទាំងនេះ ។ តំបន់វ៉ារ៉ូនីយេវមានព្រំដែនជាប់ជាមួយអ៊ុយក្រែន។
លោកបន្តថា កូរ៉េខាងជើងក៏រៀបចំខ្លួនផងដែរបញ្ជូនឲ្យរុស្ស៊ីនូវប្រព័ន្ធបាញ់មីស៊ីលបាលីស្ទិកថែមទៀត។ លោកព្រមានថា ការដាក់ពង្រាយកងទ័ពកូរ៉េខាងជើងនោះ មិនត្រឹមតែជាការគំរាមកំហែងមួយចំពោះអ៊ុយក្រែនប៉ុណ្ណោះទេ។ រុស្ស៊ីបង្រៀនកូរ៉េខាងជើងឲ្យចេះធ្វើសង្គ្រាម ឲ្យកែលម្អគ្រឿងសព្វាវុធរបស់ខ្លួននិងឲ្យទទួលបានបណ្ដាបទពិសោធន៍ពិតប្រាកដនៅលើទីលាន ក្នុងការប្រើគ្រឿងសព្វាវុធរបស់ខ្លួន។ បែបនោះជាការគំរាមកំហែងមួយ សម្រាប់មនុស្សគ្រប់គ្នានៅអាស៊ី ដែលបណ្ដាមីស៊ីលកូរ៉េខាងជើងបាញ់ទៅដល់។
ការអះអាងនោះរបស់លោកហ្សេឡេនស្គីកើតមានប៉ុន្មានថ្ងៃបន្ទាប់ពីទស្សនកិច្ចនៅក្រុងមូស្គូរបស់រដ្ឋមន្ត្រីការបរទេសកូរ៉េខាងជើងលោកCHOE SON HUI ។ កូរ៉េខាងជើងសម្ដែងការគាំទ្រពេញទំហឹង ចំពោះនយោបាយក្នុងនិងក្រៅប្រទេសរបស់រុស្ស៊ីសំដៅលុបបំបាត់មូលហេតុនៃជម្លោះនៅអ៊ុយក្រែន និងការពារអធិបតេយ្យភាពរបស់ខ្លួន៕
ចែករំលែកព័តមាននេះ