យេម៉ែន-អារ៉ាប៊ីសាអូឌីត ៖ ពួកឧទ្ទាមហ៊ូធីយេម៉ែនគាំទ្រដោយអ៉ីរ៉ង់ប្រកាសថា បានបាញ់មីស៊ីល និងបញ្ចេញដ្រូន ប្រឆាំងអារ៉ា
ប៊ីសាអូឌីត ជាការតបតចំពោះការវាយប្រហារតាមអាកាសរបស់ប្រទេសនោះ លើទីក្រុងយុទ្ធសាស្ត្រហូដីដា ដែលពួកគេកាន់កាប់នៅជាប់សមុទ្រក្រហម ។
នេះជាការកើនឡើងថ្មីនៃភាពតានតឹង ជុំវិញផ្លូវសមុទ្រសំខាន់ៗនៅមជ្ឈឹមបូព៌ា ខណៈសហរដ្ឋអាមេរិកនិងអ៉ីរ៉ង់បន្តវាយប្រហារគ្នាពិសេស ដើម្បីដណ្ដើមត្រួតត្រាច្រកសមុទ្រហ័រមូស ។ ឧត្ដមសេនីយទោយ៉ាហ៍យ៉ាសារេ អ្នកនាំពាក្យយោធារបស់ពួកហ៊ូធី ថ្លែងកាលពីថ្ងៃទី២៥ កក្កដា ក្នុងសេចក្ដីប្រកាសមួយថា ការវាយប្រហាររបស់កងកម្លាំងហ៊ូធីសំដៅលើបណ្ដាទីតាំងរបស់ក្រុមហ៊ុនប្រេងយក្សអារ៉ាប៊ីសាអូឌីត ដែលធំជាងគេបំផុតលើពិភពលោកអារ៉ាមកូ ក្នុងទីក្រុងយ៉ានប៊ួនិងក្រុងជីហ្សាន ស្ថិតនៅជាប់សមុទ្រក្រហម ។
អារ៉ាប៊ីសាអូឌីតនៅមិនទាន់ចេញប្រតិកម្មពីរឿងនោះក្នុងពេលភ្លាមៗនៅឡើយ។ ផ្នែកការពារស៊ីវិលរបស់ប្រទេសនេះនិយាយថា ការប្រកាសអាសន្នត្រូវបានបន្លឺឡើងជាច្រើនលើក កាលពីព្រឹកថ្ងៃទី២៥កក្កដា នៅក្រុងយ៉ានប៊ួនិងក្រុងជីហ្សាន ។ ភាពតានតឹងនៅតំបន់សមុទ្រក្រហម ជាការគំរាមកំហែងថ្មីលើការដឹកជញ្ជូនតាមសមុទ្ររបស់ពិភពលោក ។
ភាពតានតឹងក្នុងសមុទ្រក្រហមនោះ គំរាមបិទខ្ទប់ថែមទៀត ការដឹកជញ្ជូនតាមសមុទ្ររបស់ពិភពលោក ព្រោះពួកឧទ្ទាមថ្លែងថា ពួកគេនឹងបិទច្រកសមុទ្របាបអែលម៉ាន់ដេប ចំពោះបណ្ដានាវាទាក់ទិននឹងអារ៉ាប៊ីសាអូឌីត។ ច្រកសមុទ្រនេះស្ថិតនៅចុងខាងត្បូងនែឧបទ្វីបអារ៉ាប៊ិក ហើយការបិទខ្ទប់ច្រកសមុទ្រនេះប៉ះពាល់ដល់ការធ្វើនាវាចរណ៍ ភ្ជាប់សមុទ្រក្រហមទៅឈូងសមុទ្រអាដេន។ ប្រមាណជា១២%នៃពាណិជ្ជកម្មពិភពលោកគឺប្រមាណជា១ភាគ៤នៃនាវាដឹកកុងតឺន័រឬដឹកប្រេងពិភពត្រូវឆ្លងកាត់ច្រកសមុទ្រនេះ។
កាលពីសប្ដាហ៍មុនពួកហ៊ូធីបានវាយប្រហារនាវាដឹកប្រេង២គ្រឿងរបស់អារ៉ាប៊ីសាអូឌីត ក្នុងសមុទ្រក្រហម។ ជាការតបតវិញអារ៉ាប៊ីសាអូឌីត បានវាយប្រហារទីក្រុងកំពង់ផែហូដីដាយេម៉ែន។ នេះជាការអះអាងកាលពីថ្ងៃទី២៥កក្កដា របស់ក្រុមចម្រុះប្រឆាំងហ៊ូធីនាំមុខដោយអារ៉ាប៊ីសាអូឌីត។ ការវាយប្រហារតាមអាកាសរបស់អារ៉ាប៊ីសាអូឌីតនោះ ធ្វើឡើងកាលពីយប់ថ្ងៃទី២៤កក្កដា ប៉ះពាល់ដល់កំពង់ផែនៃទីក្រុងនោះ ព្រមទាំងសហគ្រាសទូរគមនាគមន៍រដ្ឋ បណ្ដាលឲ្យមនុស្ស២នាក់រងរបួស។
នេះបើតាមការអះអាងរបស់អ្នកនាំពាក្យក្រសួងសុភិបាលរបស់ហ៊ូធី។ រដ្ឋមន្ត្រីការបរទេសអីុរ៉ង់លោកអាប់បាស់អារ៉ាស់ជី អំពាវនាវឲ្យរកដំណោះស្រាយខាងការទូតនិងការចរចា ដើម្បីដោះស្រាយជម្លោះយេម៉ែន ចៀសវាងការប៉ះទង្គិចគ្នាខាងយោ
ធា៕
ចែករំលែកព័តមាននេះ