អន្តរជាតិ ៖ កីឡាករបាល់ទាត់ឆ្នើមនៅលីគកំពូលអាល្លឺម៉ង់ Bundesliga លោក Kevin Kampl បានសម្រេចបោះបង់អាជីពបាល់ទាត់ ហើយក្លាយជាអ្នកដាំដុះ និងលក់បន្លែផ្លែឈើ បន្ទាប់ពីការបាត់បង់ឪពុក និងបងប្រុសជាទីស្រឡាញ់ជាបន្តបន្ទាប់គ្នានៅក្នុងរយៈពេលត្រឹមតែ ៧ ខែប៉ុណ្ណោះ។
អតីតខ្សែបម្រើ Kevin Kampl បច្ចុប្បន្នវ័យ៣៥ឆ្នាំ ធ្លាប់ឈ្នះពានរង្វាន់អាល្លឺម៉ង់ DFB-Pokal ចំនួន ២ លើកជាមួយក្រុម RB Leipzig ហើយក៏ធ្លាប់ប្រកបអាជីពឱ្យក្រុម Bayer Leverkusen និង Borussia Dortmund ផងដែរ។ ប៉ុន្តែកីឡាករអន្តរជាតិស្លូវេនីរូបនេះ បានសម្រេចចិត្តចូលនិវត្តន៍ពីអាជីពបាល់ទាត់កាលពីដើមឆ្នាំ ២០២៦ បន្ទាប់ពីឪពុក និងបងប្រុសបានទទួលមរណភាពបន្តបន្ទាប់គ្នានៅក្នុងរយៈពេលត្រឹមតែ៧ខែ។
បច្ចុប្បន្ន Kevin Kampl បានផ្លាស់ទៅរស់នៅក្នុងកសិដ្ឋានមួយកន្លែងស្ថិតនៅលើកោះ Mallorca ឬ Majorca ដែលជាកោះធំជាងគេរបស់ប្រទេសអេស្ប៉ាញ ស្ថិតនៅក្នុងដែនសមុទ្រមេឌីទែរ៉ាណេក្នុងចំណោមប្រជុំកោះ Balearic ដែលជាកន្លែងរូបលោក និងក្រុមគ្រួសារដាំដុះដំណាំជាច្រើនប្រភេទ។
លោក Kevin Kampl បានថ្លែងកាលពីថ្មីៗនេះថា «ពួកយើងមានត្រសក់ផ្អែម ឪឡឹក ប៉េងប៉ោះ ខ្ទឹមបារាំង ម្ទេស និងផ្លែឈើជាច្រើនផ្សេងទៀត ដែលទាំងអស់នោះបានដុះលូតលាស់លឿនណាស់នៅទីនេះ។ ហើយប្រេងអូលីវដែលពួកយើងធ្វើនៅទីនេះក៏មានរសជាតិឆ្ងាញ់ខ្លាំងណាស់ដែរ»។
អតីតខ្សែបម្រើចូលនិវត្តន៍ពីក្រុមជម្រើសជាតិស្លូវេនី តាំងឆ្នាំ២០១៨ រូបនេះ បានរៀបរាប់បន្តថា «ខ្ញុំបានឆ្លងកាត់ឆ្នាំដ៏សែនអាក្រក់ ដែលគ្មានពាក្យអ្វីថ្លែងផ្សេងក្រៅពីពាក្យនេះទេ។ ជីវិតត្រូវតែដើរទៅមុខ បើទោះបីជាវាពិបាកខ្លាំងក្នុងការទទួលយកអ្វីៗគ្រប់យ៉ាងដែលបានកើតឡើងក៏ដោយ។ ប៉ុន្តែភាពស្ងប់ស្ងាត់ និងសេចក្តីសុខពួកយើងមាននៅលើកោះ Majorca បានជួយឱ្យពួកយើងមានអារម្មណ៍ធូរស្រាលច្រើន។ ខ្ញុំតែងតាមដានព័ត៌មានថ្មីៗអំពីអ្វីដែលក្រុម RB Leipzig កំពុងធ្វើ ហើយខ្ញុំនឹងបន្តធ្វើបែបនេះទៀត។ ខ្ញុំនឹងចំណាយពេលច្រើននៅក្នុងទីក្រុង ដូច្នេះគ្មាននរណាអាចដឹងមុនថា អនាគតនឹងនាំមកនូវអ្វីខ្លះនោះទេ»។
គួរបញ្ជាក់ថា Kevin Kampl ដែលបានកើតនៅប្រទេសអាល្លឺម៉ង់ បានបង្ហាញខ្លួនឱ្យក្រុមជម្រើសជាតិស្លូវេនីចំនួន ២៨ ប្រកួត និងរកបាន ២ គ្រាប់។ Kampl ធ្លាប់បានឈ្នះពានរង្វាន់លីគកំពូលអូទ្រីសជាមួយក្រុម Red Bull Salzburg ក្នុងឆ្នាំ ២០១៤ និងពានរង្វាន់អាល្លឺម៉ង់ DFB-Pokal ២ លើកជាមួយក្រុម RB Leipzig ផងដែរ៕ ប្រភព ៖ The Sun
ចែករំលែកព័តមាននេះ