ចក្រភពអង់គ្លេស ៖ បាល់ទាត់ជប៉ុននៅតែបន្តបង្ហាញអំពីឥទ្ធិពល និងភាពខ្លាំងរបស់ខ្លួននៅក្នុងលីគកំពូលអង់គ្លេស (English Premier League) ដែលជាលីគបាល់ទាត់ដ៏ល្បីល្បាញបំផុតនៅលើពិភពលោក ខណៈដែលការផ្ទេរកីឡាករជប៉ុនទៅកាន់ប្រទេសអឺរ៉ុបមួយនេះ នៅតែបន្តកើនឡើងខ្លាំងនៅក្នុងទីផ្សារដោះដូរកីឡាករនារដូវក្តៅឆ្នាំ២០២៦។
រដូវកាល Premier League ឆ្នាំ ២០២៦-២០២៧ នឹងស្វាគមន៍កីឡាករជប៉ុនមុខមាត់ថ្មីចំនួន ៣ រូប រួមមាន ខ្សែបម្រើស្លាប Tatsuhiro Sakamoto ដែលជួយក្រុម Coventry City ឱ្យឡើងមកកាន់លីគកំពូលអង់គ្លេសរដូវកាលថ្មីនេះ។ ខ្សែបម្រើការពារ Hidemasa Morita ដែលផ្លាស់ពីក្លិប Sporting CP នៅលីគកំពូលព័រទុយហ្គាល់មកចូលរួមជាមួយនឹងក្លិប Hull City និងខ្សែប្រយុទ្ធ Daizen Maeda ដែលបានផ្លាស់ពីក្លិប Celtic នៅលីគកំពូលស្កុតឡែនមកចូលរួមជាមួយក្លិប Ipswich Town។
មុខមាត់ថ្មីនៃកីឡាករទាំង ៣ រូបនេះ បានធ្វើឱ្យចំនួនសរុបនៃកីឡាករជប៉ុន ដែលប្រកួតប្រជែងនៅក្នុងក្របខណ្ឌ Premier League រដូវកាលថ្មីនេះ កើនឡើងដល់ ៨ រូប ដែលជាកំណត់ត្រាខ្ពស់បំផុតសម្រាប់ប្រទេសនៅតំបន់អាស៊ី។ កីឡាករជនជាតិជប៉ុន ៥ រូបផ្សេងទៀត រួមមាន ខ្សែបម្រើការពារ Wataru Endo (Liverpool), ខ្សែការពារ Kota Takai (Tottenham Hotspur), ខ្សែបម្រើ Daichi Kamada (Crystal Palace), ខ្សែបម្រើ Ao Tanaka (Leeds United) និងខ្សែបម្រើប្រយុទ្ធ Kaoru Mitoma (Brighton & Hove Albion)។
ការកើនឡើងចំនួនកីឡាករជនជាតិជប៉ុនចូលរួមក្នុងលីគកំពូលអង់គ្លេស បានឆ្លុះបញ្ចាំងពីគុណភាពនៃការបណ្តុះបណ្តាលយុវជនថ្នាល និងជាពិសេសសមត្ថភាពកីឡាករមកពីប្រទេសអាស៊ីខាងកើតមួយនេះ នៅក្នុងការសម្របខ្លួនទៅនឹងបាល់ទាត់កម្រិតកំពូល។ ពួកគេមិនត្រឹមតែទទួលបានការវាយតម្លៃខ្ពស់ចំពោះជំនាញបច្ចេកទេសប៉ុណ្ណោះទេ ប៉ុន្តែកីឡាករជប៉ុនក៏ថែមទាំងបានបង្កើតការចាប់អារម្មណ៍ខ្លាំង តាមរយៈអាជីពវិជ្ជាជីវៈ ភាពធន់នៃកម្លាំងកាយ និងការប្រកាន់ខ្ជាប់វិន័យខ្ពស់ផងដែរ។
តួលេខកីឡាករជប៉ុន៨រូបនេះ ប្រហែលជាមិនទាន់បញ្ចប់ត្រឹមនឹងនោះទេ។ ដ្បិតកីឡាករ ២ រូបផ្សេងទៀតគឺអ្នកចាំទី Zion Suzuki និងខ្សែបម្រើការពារ Kaishu Sano កំពុងស្ថិតក្នុងគោលដៅចង់បានរបស់ក្លិប Premier League មួយចំនួនផងដែរ។ ប្រសិនបើឈានដល់កិច្ចព្រមព្រៀងផ្លូវការមែននោះ សបញ្ជាក់ឱ្យឃើញថា បាល់ទាត់ជប៉ុនពិតជាខ្លាំង នឹងបន្តបង្កើតនូវសមិទ្ធផលថ្មីៗបន្ថែមទៀត៕ ប្រភព ៖ Znews
ចែករំលែកព័តមាននេះ