ទីក្រុងតេអេរ៉ង់៖ ប្រទេសអ៊ីរ៉ង់ចោទប្រកាន់ថាអ៊ុយក្រែនវាយប្រហារកប៉ាល់ដឹកទំនិញមួយគ្រឿងនៅសមុទ្រកាស់ស្ពានបណ្ដាលឱ្យផ្ទុះឆេះ ស្លាប់នាវឹកម្នាក់ និងរបួសម្នាក់។ ក្រសួងការបរទេសអ៊ីរ៉ង់បានកោះហៅភារៈធារីនៃស្ថានទូតអ៊ុយក្រែនប្រចាំទីក្រុងតេអេរ៉ង់ដើម្បីបង្ហាញការប្រឆាំងជំទាស់នឹងអ្វីដែលខ្លួនហៅថាជាទង្វើឧក្រិដ្ឋ និងអរិភាពរបស់អ៊ុយក្រែន។ នេះបើយោងតាមការផ្សាយរបស់ទីភ្នាក់ងារព័ត៌មានអ៊ីរ៉ង់ IRNA។ ក្រសួងដដែលនេះអះអាងថាថ្នាក់ដឹកនាំអ៊ុយក្រែនទទួលស្គាល់ថាពិតជាមានការវាយប្រហារមែន។ អ៊ីរ៉ង់ថាទង្វើនេះឆ្លុះបញ្ចាំងនូវចរិតអវិចារណញាណ និងការយកគ្នាធ្វើជាសត្រូវរបស់អ៊ុយក្រែន។
អ៊ីរ៉ង់ប្រកាសថាខ្លួនត្រូវតែការពារផលប្រយោជន៍ជាតិរបស់ខ្លួន។ អ៊ីរ៉ង់ចាត់ទុកថាទង្វើរបស់អ៊ុយក្រែនជាការរំលោភមាត្រា២ ខ៤ នៃធម្មនុញ្ញអង្គការសហប្រជាជាតិ។ ទង្វើនេះអាចនឹងដុតបញ្ឆេះសង្គ្រាមអ៊ុយក្រែនកាន់តែខ្លាំង។ រដ្ឋមន្ត្រីការបរទេសអ៊ីរ៉ង់ លោកអាបាស់ អារ៉ាក់ឈី ក៏បានយកបញ្ហានេះទៅពិភាក្សាគ្នាតាមទូរស័ព្ទជាមួយអ្នកតំណាងជាន់ខ្ពស់របស់សហភាពអឺរ៉ុបទទួលបន្ទុកខាងកិច្ចការបរទេស លោកស្រីខាចា ខាឡាស់ ផងដែរ។ នេះបើយោងការបំភ្លឺរបស់ខុទ្ទកាល័យរបស់លោក។ លោកអារ៉ាក់ឈីសូមប្រកាសថ្កោលទោសជាទម្ងន់ចំពោះការវាយប្រហារពីសំណាក់យោធាអ៊ុយក្រែនទៅលើកប៉ាល់ដឹកទំនិញរបស់អ៊ីរ៉ង់នៅសមុទ្រកាស់ស្ពាន។
លោកសូមអំពាវនាវឱ្យមានការចាត់វិធានការដ៏ម៉ឺងម៉ាត់បំផុតពីសំណាក់ស្ថាប័នមួយចំនួនដូចជាក្រុមប្រឹក្សាសន្តិសុខអង្គការសហប្រជាជាតិ, សហភាពអឺរ៉ុប និងសហគមន៍អន្តរជាតិ។ លោកសូមឱ្យតាមចាប់ក្រុមជនដៃដល់ និងអ្នកគាំទ្រទង្វើឧក្រិដ្ឋនេះយកទៅផ្ដន្ទាទោសនៅចំពោះមុខច្បាប់។ នេះបើយោងតាមសេចក្ដីប្រកាសដែលត្រូវបានផ្សព្វផ្សាយតាមតេឡេក្រាម។ អ៊ីរ៉ង់កំពុងតែក្រពុលមុខយ៉ាងខ្លាំងនៅពេលនេះ។ ខ្លួនត្រូវទប់ទល់នឹងវិធានការបិទខ្ទប់ដែនសមុទ្រពីសំណាក់ប្រទេសអាមេរិកដែលជាហេតុធ្វើឱ្យកប៉ាល់ដឹកទំនិញមិនអាចបើកចេញ ឬបើកចូលកំពង់ផែអ៊ីរ៉ង់បានឡើយ។
អ្នករាយការណ៍ព័ត៌មានរបស់ទូរទស្សន៍អាល់ចាស៊ីរ៉ាបានផ្ដល់សេចក្ដីពន្យល់ត្រង់ចំណុចនេះថាការដែលអាមេរិកវាយប្រហារឆ្នេរសមុទ្រខាងជើងរបស់អ៊ីរ៉ង់បានដាក់សម្ពាធកាន់តែធ្ងន់បន្ថែមទៀតលើការធ្វើពាណិជ្ជកម្មលើលំហសមុទ្រ។ នៅក្នុងលិខិតថ្កោលទោសរបស់ខ្លួន ក្រសួងការបរទេសអ៊ីរ៉ង់សង្កត់ធ្ងន់ថារដ្ឋាភិបាលរបស់ខ្លួនមិនដែលចូលខ្លួនទៅពាក់ព័ន្ធនៅក្នុងសង្គ្រាមអ៊ុយក្រែនម្ដងណាឡើយ។ ហេតុការណ៍បាញ់ប្រហារកប៉ាល់អ៊ីរ៉ង់នេះកើតឡើងចំពេលដែលប្រមុខដឹកនាំអ៊ុយក្រែន លោកហ្សេឡិនស្គី ប្រកាសនៅលើបណ្ដាញអ៊ិចថារដ្ឋាភិបាលរបស់លោកទើបតែសម្រេចបានសមិទ្ធផលដ៏ធំមួយដោយវាយប្រហាររយៈចម្ងាយឆ្ងាយនៅសមុទ្រកាស់ស្ពាន។ លោកថាយោធាអ៊ុយក្រែនវាយប្រហារកប៉ាល់ជាច្រើនគ្រឿងដែលបន្លំភ្នែកអ្នកដទៃជាកប៉ាល់ស៊ីវិល ប៉ុន្តែតាមពិតត្រូវបានប្រើប្រាស់ដោយយោធា។ ប៉ុន្តែលោកមិនបានប្រកាសចំៗថាបានវាយប្រហារកប៉ាល់ដឹកទំនិញរបស់អ៊ីរ៉ង់ទេ។
នៅក្នុងករណីមួយទៀត លោកហ្សេឡិនស្គីចោទប្រកាន់ថារុស្ស៊ីបានបញ្ជូនរូបភាពដែលថតដោយផ្កាយរណបរបស់ខ្លួនទៅលើទីតាំងនានានៅតំបន់ឈូងសមុទ្រ រួមទាំងទីតាំងយោធារបស់អាមេរិកផងដែរ រួចហើយបញ្ជូនទៅឱ្យអ៊ីរ៉ង់។ លោកអះអាងថាកាលពីថ្ងៃទី១៩ និងទី២០ ខែកក្កដា ផ្កាយរណបរុស្ស៊ីថតជាប់មូលដ្ឋានទ័ពអាកាសនៅប្រទេសបារ៉េន ហ្សកដង់ និងគូវែត។ អ៊ីរ៉ង់ និងអ៊ុយក្រែនមើលមុខគ្នាមិនចំទេចាប់តាំងពីសង្គ្រាមអ៊ុយក្រែនផ្ទុះឡើងកាលពីឆ្នាំ២០២២ព្រោះអ៊ីរ៉ង់បន្តផ្គត់ផ្គង់ទៅឱ្យរុស្ស៊ីនូវដ្រូនអត្តឃាតម៉ាកសាហ៊ីត ហើយរុស្ស៊ីប្រើប្រាស់ដ្រូននេះវាយប្រហារអ៊ុយក្រែនស្លាប់ជនស៊ីវិលជារៀងរាល់ថ្ងៃ។ អ៊ុយក្រែនអះអាងថារហូតមកដល់ពេលនេះ ខ្លួនបាញ់ទម្លាក់ដ្រូនផលិតនៅអ៊ីរ៉ង់នោះអស់ជាង៤,៤ម៉ឺនគ្រឿង៕
ចែករំលែកព័តមាននេះ