ខេត្តប៉ៃលិន កែលម្អតំបន់ «ជ្រោះសែនសុខ» បង្កើតតំបន់ទេសចរណ៍ថ្មីទាក់ទាញភ្ញៀវជាតិ និងអន្តរជាតិ
- ប៉ៃលិន
ខេត្តប៉ៃលិន ៖ គេមិនអាចមើលរំលងបានឡើយចំពោះវិស័យទេសចរណ៍ ព្រោះវាជាវិស័យឧស្សាហកម្មដែលគ្មានផ្សែងមួយ ដ៏មានសារសំខាន់បំផុត ថែមទាំងនាំមកនូវចំណូលប្រចាំថ្ងៃដល់ប្រជាពលរដ្ឋរស់នៅក្នុងតំបន់ ក៏ដូចជាផ្តល់កំណើនសេដ្ឋកិច្ចសម្រាប់ខេត្តផងដែរ ។
ដូច្នេះហើយ ទើបនៅថ្ងៃទី២៥ ខែកក្កដា ឆ្នាំ២០២៦ លោកជំទាវបណ្ឌិត បាន ស្រីមុំ អភិបាលនៃគណៈអភិបាលខេត្តប៉ៃលិន អមដំណើរដោយមន្ត្រីជំនាញ បានអញ្ជើញចុះពិនិត្យមើលវឌ្ឍនភាពនៃការកែលម្អហេដ្ឋារចនាសម្ព័ន្ធបន្ថែមទៀត នៅត្រង់ចំណុចជ្រោះសែនសុខ ស្ថិតក្នុងភូមិបឹងព្រលឹត ឃុំស្ទឹងកាច់ ស្រុកសាលាក្រៅ ខេត្តប៉ៃលិន ប្រកបដោយសោភ័ណភាព ក្នុងគោលបំណងលើកកម្ពស់វិស័យទេសចរណ៍ក្នុងខេត្តមួយនេះ ឱ្យកាន់តែរីកចម្រើនឡើង។
បើតាមប្រសាសន៍របស់លោកជំទាវបណ្ឌិត បាន ស្រីមុំ អភិបាលខេត្តប៉ៃលិន បានលើកឡើងថា ៖ ការកែលម្អហេដ្ឋារចនាសម្ព័ន្ធ និងសោភណភាពនៅតំបន់ជ្រោះសែនសុខ គឺដើម្បីទាក់ទាញភ្ញៀវទេសចរជាតិ និងអន្តរជាតិ ឱ្យចូលមកលេងកាន់តែច្រើនកុះករ ហើយថែមទាំងជួយជំរុញកំណើនសេដ្ឋកិច្ច និងបង្កើនជីវភាពរស់នៅប្រចាំថ្ងៃរបស់ប្រជាពលរដ្ឋ ឱ្យកាន់តែធូរធារល្អប្រសើរឡើង ។
លោកជំទាវអភិបាលខេត្ត បានបន្តទៀតថា បើបានរៀបចំឱ្យមានវិស័យទេសចរណ៍កាន់តែច្រើនកន្លែង នោះកំណើនសេដ្ឋកិច្ចក៏កាន់តែរីកចម្រើនឡើង ព្រោះទូទាំងសកលលោកគេចាត់ទុកវិស័យទេសចរណ៍ ជាកម្លាំងចលករដ៏សំខាន់បំផុត ជាឧស្សាហកម្មគ្មានផ្សែង ក្នុងការជួយជម្រុញកំណើនសេដ្ឋកិច្ចមូលដ្ឋាន ។ លើសពីនេះ ទេសចរណ៍ ពិតជាជួយដល់ជីវភាពប្រជាពលរដ្ឋ ដោយផ្តល់នូវប្រាក់ចំណូល និងលើកកម្ពស់ជីវភាពរស់នៅប្រចាំថ្ងៃរបស់ពួកគាត់ តាមរយៈការលក់ដូរ និងសេវាកម្មទេសចរណ៍ផងដែរ ។
លោកជំទាវអភិបាលខេត្តប៉ៃលិន ក៏បានបញ្ជាក់ដែរថា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា គឺបានបន្តខិតខំប្រឹងប្រែងដោះស្រាយនូវរាល់ការលំបាក និងសំណូមពររបសប្រជាពលរដ្ឋ ព្រមទាំងបានខិតខំកសាងអភិវឌ្ឍប្រទេសជាតិឱ្យមានការរីកចម្រើនលើគ្រប់វិស័យ ជាពិសេសការកសាងហេដ្ឋារចនាសម្ព័ន្ធរូបវ័ន្តនានាដូចជា ៖ ផ្លូវថ្នល់ ស្ពាន សាលារៀន មន្ទីរពេទ្យ ជាដើម ហើយបច្ចុប្បន្ន រដ្ឋបាលខេត្តប៉ៃលិន ក៏បានខិតខំកែលម្អហេដ្ឋារចនាសម្ព័ន្ធសាធារណៈនានា រួមទាំងការដាំដើមឈើ ការដាំផ្កាលម្អបន្ថែម និងការថែទាំ ការកែលម្អសួនច្បារ សួនពុះចែកទ្រូងផ្លូវ ឱ្យកាន់តែល្អឡើង ដើម្បីឆ្លើយតបទៅនឹងតម្រូវការរបស់ប្រជាពលរដ្ឋលើផ្នែកបរិស្ថាន និងសុខភាព ដែលបន្ថែមក្រវាត់ពណ៌បៃតងក្នុងទីក្រុង ប្រកបដោយសោភណភាពស្រស់បំព្រង ក្នុងការទាក់ទាញភ្ញៀវជាតិ និងភ្ញៀវបរទេស ឱ្យមកលេងកម្សាន្តក្នុងខេត្តប៉ៃលិន កាន់តែច្រើនឡើងៗ ៕
ចែករំលែកព័តមាននេះ