ទីក្រុងប៉េកាំង៖ ខ្យល់ព្យុះនូលចាប់ផ្ដើមបក់ទៅដល់តំបន់ដីគោកប្រទេសចិនកាលពីយប់មិញ និងនាំមកនូវភ្លៀងធ្លាក់ខ្លាំងលាយខ្យលកន្ត្រាក់នៅភាគខាងត្បូងរួមទាំងទីក្រុងហុងកុងផងដែរ។ ហេតុនេះ អាជ្ញាធរបានជម្លៀសមនុស្សរាប់សែននាក់នៅខេត្តក្វាងទុង និងលុបចោលជើងហោះហើររាប់សិបខ្សែ។ តំបន់នោះត្រូវបានដាក់នៅក្នុងភាពអាសន្នកម្រិតខ្ពស់។ មជ្ឈមណ្ឌលជាតិព្យាករអាកាសធាតុប្រកាសថាខ្យល់ព្យុះនូលបក់ទៅដល់តំបន់មាត់សមុទ្រតំបន់ហួយតុង នៃទីក្រុងហួយចូវនៅខេត្តក្វាងទុងភាគខាងត្បូងនៅម៉ោង៣:៥០ទៀបភ្លឺ។
មន្ទីរសង្កេតអាកាសធាតុប្រចាំទីក្រុងហុងកុងប្រកាសថាខ្យល់ព្យុះនូលដែលមានល្បឿនអតិបរមា១៤៥គីឡូម៉ែត្រក្នុងមួយម៉ោងនោះបក់ជិតដល់ចំណុចកណ្ដាលនៃទីក្រុងនេះហើយ ហើយបក់ទៅរកខេត្តក្វាងទុង។ បន្ទាប់មក ខ្យល់ចាប់ផ្ដើមថមថយកម្លាំងបក់បន្តិចវិញ។ ភ្លៀងលាយខ្យល់កន្ត្រាក់នឹងបន្តកើតមាននៅក្នុងផ្នែកខ្លះនៃតំបន់នេះ។ គិតត្រឹមល្ងាចថ្ងៃសៅរ៍ អាជ្ញាធរជម្លៀសមនុស្សជាង៣,៤សែននាក់ទៅកាន់ទីកន្លែងសុវត្ថិភាព។ នេះបើយោងតាមសេវាកម្មបណ្ដាញផ្សព្វផ្សាយរបស់ចិនឈ្មោះ China News Service។
មជ្ឈមណ្ឌលជាតិព្យាករឧតុនិយមរបស់ប្រទេសចិនព្យាករថាខេត្តក្វាងទុងភាគខាងត្បូង និងខេត្តហ្វ៊ូចៀនភាគឦសាននឹងមានភ្លៀងធ្លាក់ខ្លាំងលាយខ្យល់កន្ត្រាក់ពេញមួយថ្ងៃអាទិត្យនេះ។ គេហទំព័ររបស់អាកាសយានដ្ឋានទីក្រុងហុងកុងបង្ហាញថាជើងហោះហើរជាង១៥០ខ្សែត្រូវបានលុបចោលនៅថ្ងៃសៅរ៍ និងថ្ងៃអាទិត្យ។ នៅពេលខ្យល់ព្យុះនូលបក់ទៅដល់ហុងកុង គេឃើញថារន្ទាសម្រាប់សាងសង់អគារខ្ពស់ៗនៅទីនោះត្រូវបាក់រលំមកដី។ ប៉ុន្តែសំណាងល្អ ហេតុការណ៍នេះមិនបានបណ្ដាលឱ្យនរណាម្នាក់រងរបួស ឬស្លាប់ទេ។
ក្រឡេកទៅមើលសភាពការណ៍នៅកោះតៃវ៉ាន់វិញម្ដង។ គណៈកម្មការកណ្ដាលទទួលបន្ទុកខាងការព្យាករអាកាសធាតុនៅលើកោះនេះប្រកាសថាខ្យល់ព្យុះនូលបានបង្កជាភ្លៀងធ្លាក់នៅផ្នែកខ្លះនៃភាគខាងត្បូង និងខាងកើតកាលពីល្ងាចថ្ងៃសៅរ៍។ ខ្យល់ព្យុះនេះបក់កាត់ដែនសមុទ្រខាងត្បូងរបស់តៃវ៉ាន់ និងបក់ហួសទីនោះជាបណ្ដើរៗហើយ។ កាលពីដើមខែកក្កដានេះ ខ្យល់ព្យុះបាវីបង្កជាខ្យល់កន្ត្រាក់ដ៏ខ្លាំង និងភ្លៀងធ្លាក់យ៉ាងជោគជាំនៅប្រទេសចិនភាគខាងកើត ហើយបង្ខំឱ្យមនុស្សជាង២លាននាក់ជម្លៀសខ្លួនជាបន្ទាន់។ ខ្យល់ព្យុះមួយទៀតឈ្មោះម៉ៃសាក់បក់ទៅដល់ប្រទេសចិនភាគខាងត្បូងកាលពីថ្ងៃទី៣ ខែកក្កដា៕ ប្រភព៖ AP
ចែករំលែកព័តមាននេះ