រាជធានីភ្នំពេញ ៖ អង្គភាពស៊ីម៉ាក់ បានឱ្យដឹងថា រយៈពេល៦ខែ ដោយសារសង្គ្រាមឈ្លានពានថៃ មកដែនអធិបតេយ្យកម្ពុជា ស៊ីម៉ាក់ បានរុករកឃើញ និងកម្ទេចចោលគ្រាប់យុទ្ធភណ្ឌគ្រប់ប្រភេទ ចំនួនជាង៨,៤០០គ្រាប់ ដែលក្នុងចំនួននេះ មានគ្រាប់បែកចង្កោមចំនួន ៤,៤៣៦គ្រាប់ ។
យោងតាមបណ្តាញសង្គមហ្វេសប៊ុករបស់លោក ហេង រតនា អគ្គនាយកស៊ីម៉ាក់ បានឱ្យដឹងថា ការដោះស្រាយវិបត្តិសំណល់គ្រាប់យុទ្ធភណ្ឌសង្គ្រាមសៀមឈ្លានពានក្នុងរយៈពេល៦ ខែ (មករា-មិថុនា ឆ្នាំ២០២៦)នេះ អង្គភាព CMAC បានសម្រេចលទ្ធផលគួរឱ្យកត់សំគាល់ដូចជា ការងារផ្សព្វផ្សាយអប់រំយល់ដឹងពីគ្រោះថ្នាក់ដោយសារគ្រាប់មិនទាន់ផ្ទុះតាមក្រុមគោលដៅបានចំនួន ១៤,៤៧៧លើក មានប្រជាពលរដ្ឋចូលរួមសរុប ចំនួន១,៣៧៤,៨៨៧នាក់ ។
ចំពោះការងារស្រាវជ្រាវព័ត៌មានសំណល់យុទ្ធភណ្ឌសង្គ្រាមសៀមឈ្លានពាន ៖ អង្គភាព CMAC បានដំណើរការស្រាវជ្រាវព័ត៌មានតំបន់រងផលប៉ះពាល់ដោយសារសង្គ្រាមសៀមឈ្លានពាននៅតាមបណ្តាខេត្តទាំង៧ រួមមាន ៖ ខេត្តព្រះវិហារ ឧត្តរមានជ័យ បន្ទាយមានជ័យ បាត់ដំបង ពោធិ៍សាត់ សៀមរាប និងកោះកុង ក្នុង២២ស្រុក ស្មើនឹង៦០ឃុំ/សង្កាត់ ស្មើនឹង៣៣៥ភូមិ ដោយកំណត់ត្រាលទ្ធផលគឺទីតាំងទម្លាក់គ្រាប់បែកចំនួន ២៦៥ ពហុកោណ ស្មើនឹងផ្ទៃដីរងផលប៉ះពាល់ចំនួន ៤.៨២៩ហិកតា។ ទីតាំងគ្រាប់បែកចង្កោមចំនួន៣.៨៥៨ ពហុកោណ ស្មើនឹងផ្ទៃដីរងផលប៉ះពាល់ចំនួន ២៦២.៥០៦ហិកតា តាមការប៉ាន់ស្មានអាចទាហានសៀមបាញ់គ្រាប់បែកចង្កោមប្រភេទគ្រាប់១៥៥មម ចំនួនប្រមាណ១២០.០០០ ទៅ១៣០.០០០គ្រាប់ និងមានកូនគ្រាប់បែកចង្កោមប្រភេទ M42, M46 និងM85 ប្រមាណ៦លានទៅ៧លានគ្រាប់ ហើយអាចមានកម្រិតមិនផ្ទុះ (failure rate)ប្រមាណ ២៥%ទៅ៣០% ។ ទីតាំងគ្រាប់មិនទាន់ផ្ទុះប្រភេទផ្សេងៗទៀត មានចំនួន១.៤០១ ពហុកោណ មានផ្ទៃដីរងផលប៉ះពាល់ចំនួន១១៩.៨៧០ហិកតា ។
សរុបរួម ៖ មានចំនួន៥.៣៤៨ ទីតាំង(ពហុកោណ) ស្មើនឹង៣៨៧.២០៦ហិកតា (ឬ៣.៨៧២គីឡូម៉ែត្រការេ) ជាមួយកំណត់រកឃើញភស្តុតាងជាក់ស្តែងជាង១៨.៥០០ ភស្តុតាង ។
ស៊ីម៉ាក់ថា ភូមិសាស្ត្រមិនទាន់អាចស្រាវជ្រាវព័ត៌មានវាយតម្លៃតំបន់ផ្ទៃដីរងផលប៉ះពាល់បានមានចំនួន១៤ភូមិ និងតំបន់សមរភូមិជួរមុខតាមខ្សែបន្ទាត់ព្រំដែនទាំងស្រុង។ ការបោសម្អាតរំដោះផ្ទៃដីអាទិភាពសម្រាប់គាំទ្រជនភៀសសឹកវិលត្រឡប់ទៅលំនៅដ្ឋានវិញបានចំនួន៥.៩១១ខ្នងផ្ទះ ស្មើនឹងផ្ទៃដីប្រមាណជិត១.៤៥៥ហិកតា តំបន់ផ្ទៃដីសាលារៀនចំនួន៨៧ខ្នង មណ្ឌលសុខភាពស្មើនឹងផ្ទៃដី១៥៤ហិកតា តំបន់មណ្ឌលសុខភាពចំនួន២០ទីតាំង វត្តអារាមមានចំនួន៦វត្ត និងហេដ្ឋានរចនាសម្ព័ន្ធផ្សេងៗចំនួន១១៤ទីតាំង ។
ជាមួយគ្នានោះ មន្ត្រីជំនាញស៊ីម៉ាក បានរុករកឃើញ និងកម្ទេចចោលគ្រាប់យុទ្ធភណ្ឌគ្រប់ប្រភេទចំនួនជាង៨.៤០០គ្រាប់ ដែលក្នុងចំនួននេះមានគ្រាប់បែកចង្កោមចំនួន៤.៤៣៦គ្រាប់ ៕
ចែករំលែកព័តមាននេះ