ឥណ្ឌូណេស៊ី ៖ ក្រុមបាល់ទះបុរសកម្ពុជាបានឡើងទៅកាន់វគ្គពាក់កណ្តាលផ្តាច់ព្រ័ត្រជួបក្រុមបាល់ទះបុរសថៃនៃពានរង្វាន់
SEA V.Cup ជើងទី២នៅប្រទេសឥណ្ឌូណេស៊ីបន្ទាប់ពីយកឈ្នះលើក្រុមបាល់ទះបុរសហ្វីលីពីន ៣សិតទល់នឹង០ កាលពីថ្ងៃទី២៣ ខែកក្កដា ឆ្នាំ២០២៦។
មុនការប្រកួតវគ្គពាក់កណ្តាលផ្តាច់ព្រ័ត្រ ក្រុមបាល់ទះបុរសកម្ពុជា បានបង្ហាញឆន្ទះរួមគ្នា ក្នុងការទម្លាក់ក្រុមបាល់ទះបុរសថៃចេញពីការប្រកួតជើងទី២ នៃពានរង្វាន់ SEA V-Cup 2026 ម្តងទៀត ទោះបីជាស្ថានភាពកីឡាករកម្ពុជាមួយចំនួននៅពេលនេះ កំពុងស្ថិតក្នុងក្តីបារម្ភក៏ដោយ។
ការត្រៀមចិត្តកាយដើម្បីឡើងទៅជួបក្រុមថៃ ជាថ្មីនេះ គឺបន្ទាប់ពីក្រុមកម្ពុជា បានបន្តយកឈ្នះលើក្រុមហ្វីលីពីន ៣-០ ជាមួយគ្រាប់បាល់ ២៥-២០ ២៥-២១ និង២៦-២៤ កាលពីរាត្រីថ្ងៃទី២៣ កក្កដា ហើយពួកគេ មិនជឿថា ហ្វីលីពីន នឹងអាចយកឈ្នះក្រុមម្ចាស់ផ្ទះឥណ្ឌូណេស៊ី ៣-០ ក្នុងការប្រកួតចុងក្រោយប្រចាំពូលA នៅថ្ងៃទី២៤ កក្កដា ដើម្បីទម្លាក់កម្ពុជា ចេញពីលេខ២វិញនោះទេ ខណៈកម្ពុជា ក៏ទើបបានចាញ់ឥណ្ឌូណេស៊ី ៣-០ ដែរនោះ។
ការយកឈ្នះក្រុមហ្វីលីពីន៣សិតទល់នឹង០ កាលពីថ្ងៃព្រហស្បតិ៍នោះ ក្រុមកម្ពុជាបានប្តូរផ្តាច់ និងលះបង់អស់ពីកម្លាំងកាយចិត្ត ដើម្បីសម្រេចបានលទ្ធផលនេះ ព្រោះវាជាច្រកតែមួយគត់ ដែលជួយឱ្យពួកគេបានឡើងទៅវគ្គ១/២ផ្តាច់ព្រ័ត្រ បន្ទាប់ពីពួកគេបានចាញ់ក្រុមម្ចាស់ផ្ទះ៣សិត០ នៅថ្ងៃបើកឆាកនោះ។ នៅពេលប្រកួតជាមួយក្រុមហ្វីលីពីននោះ គឺអ្នកលើកបាល់ដៃទី១ សួន ចាន់ណារ៉ូ បានខំប្រឹងលេងទាំងសុខភាពមិនអំណោយផល រីឯ ផុល រតនៈ ត្រូវបានគ្រាហ៍ចេញពីទីលាន ក្រោយមានបញ្ហារបួសកជើងស្តាំ ។ ចំណែកស្មាត់ស្តាំមានកម្ពស់ខ្ពស់ជាងគេ ពិន សារុន បានរបួសរលាត់ស្បែកលើថ្ងាសមួយដុំ ខណៈអ្នកផ្សេងទៀត ក៏មានសភាពទ្រុឌទ្រោមផ្នែកគុណភាពកម្លាំងផងដែរ។
ក្រោយការប្រកួតបានបញ្ចប់ សួន ចាន់ណារ៉ូ មានអាការៈវិលមុខ និងបានក្អូតចង្អោរ ព្រោះអស់ថាពលខ្លាំងពេក ហើយរូបគេត្រូវបាននាំយកទៅដាក់សេរ៉ូម ដើម្បីមានកម្លាំងវិញ ។ ចំណែករបួសកជើងស្តាំរបស់ ផុល រតនៈ ក៏មិនទាន់ប្រាកដថា អាចប្រកួតនៅវគ្គពាក់កណ្តាលផ្តាច់ព្រ័ត្រជាមួយក្រុមថៃ នៅថ្ងៃទី ២៥ ខែកក្កដានោះដែរ ខណៈរបួសលើថ្ងាសរបស់ពិន សារុនមិនមានបញ្ហាអ្វីធំដុំរំខានដល់ការប្រកួតនោះទេ។
តាមរយៈការឡាយវីដេអូ លោក អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា បានសួរពីចំណាប់អារម្មណ៍ទៅគ្រប់កីឡាករ និងគ្រូបង្វឹក ហើយពួកគេសុទ្ធតែបានបង្ហាញឆន្ទៈយ៉ាងមោះមុត ក្នុងការត្រៀមប្រកួតជាមួយក្រុមថៃ នៅវគ្គពាក់កណ្តាលផ្តាច់ព្រ័ត្រ ។ ពួកគេរំពឹងថា នឹងអាចទម្លាក់ថៃម្តងទៀត ដើម្បីឡើងទៅការពារតំណែងជើងឯក ដែលពួកគេដណ្តើមបាន កាលប្រកួតជើងទី២ នៃពាន SEA V-Cup 2026នេះ នៅទឹកដីប្រទេសហ្វីលីពីន។
លោក នៅ សាម៉េត គ្រូបង្គោលក្រុមជម្រើសជាតិបាល់ទះកម្ពុជា បាននិយាយថា នៅថ្ងៃទី២៥ខែកក្កដានេះ យើងនឹងបានជួបគូប្រកួតដែលចង់ជួបហើយ ហើយអ្វីដែលសំខាន់ យើងនឹងខំប្រឹងប្រែងធ្វើដើម្បីឱ្យទទួលបានលទ្ធផលដូចកាលមុនអ៊ីចឹង។
គួរបញ្ជាក់ថា សម្រាប់ការប្រកួតជើងទី១ នៃពានរង្វាន់ SEA V-Cup 2026 នៅប្រទេសហ្វីលីពីន ក្រុមបាល់ទះកម្ពុជា បានទម្លាក់ក្រុមបាល់ទះបុរសថៃ នៅវគ្គពាក់កណ្តាលផ្តាច់ព្រ័ត្រ តាមរយៈការយកឈ្នះដោយលទ្ធផល៣សិតទល់នឹង១ ហើយកម្ពុជាបានបន្តយកឈ្នះក្រុមឥណ្ឌូណេស៊ី៣សិតទល់នឹង២នៅវគ្គផ្តាច់ព្រ័ត្រដើម្បីលើកពាន SEA V-Cup 2026ជាប្រវត្តិសាស្ត្រលើកដំបូង ដែលក្រុមបាល់ទះបុរសកម្ពុជា បានឈ្នះពាន និងមេដាយមាស កម្រិតអន្តរជាតិ ៕
ចែករំលែកព័តមាននេះ