យុវជន ៨នាក់ បង្ហោះម៉ូតូកែច្នៃនៅស្រុកជីក្រែង ត្រូវសមត្ថកិច្ចឃាត់ខ្លួន
- សៀមរាប
ខេត្តសៀមរាប ៖ ក្រុមក្មេងទំនើងចំនួន ៨នាក់ត្រូវបានកម្លាំងមូលដ្ឋានរាជអាវុធហត្ថ ស្រុកជីក្រែងធ្វើការឃាត់ខ្លួន បាន៨ នាក់ រួមទាំងវត្ថុតាងម៉ូតូ សង្សយ័ពាក់ពន្ធករណីបង្ហោះម៉ូតូនិង បង្ករំខានដល់ប្រជាពលរដ្ឋតាមសាធារណ ។
ប្រភពពីកម្លាំងកងរាជអាវុធហត្ថជំនាញខេត្ត បានប្រាប់ឱ្យដឹងនៅថ្ងៃទី២៤ ខែកក្កដាឆ្នាំ២០២៦ នេះថា ពាក្យស្លោក ពោលថា ក្រុមក្មេងទំនើងមួយគ្រា ធ្វើឱ្យសោកស្តាយមួយជីវិត ក្រោមការដឹកនាំបញ្ជាផ្ទាល់ពីលោកឧត្តម សេនីយ៍ត្រី សៀ ទីន មេបញ្ជាការកងរាជអាវុធ ហត្ថខេត្តសៀមរាប បានឱ្យកម្លាំងជំនាញរបស់កងរាជអាវុធហត្ថ ច ធ្វើការបង្ក្រាបក្រុមក្មេងទំនើង បង្ហោះម៉ូតូ ក៏ដូចជា បទល្មើសផ្សេង ៗ ឱ្យដីចភ្លៀងរលឹម ។
ប្រភពបានបញ្ជាក់ថា បន្ទាប់ពីធ្វើការឃាត់ខ្លួន ក្រុមក្មេងទំនើងទាំង ៨នាក់ យកមកធ្វើការអប់រំ និងឱ្យឪពុកម្តាយមកធានាយកត្រឡប់ទៅផ្ទះវិញ ។ ដូច្នេះ សូមប្អូនៗ ត្រូវបញ្ឈប់រាល់សកម្មភាពទំនើង ដែលបង្កការភ័យខ្លាចដល់អ្នកជុំវិញ ក៏ដូចជាបង្កភាពអនាធិបតេយ្យក្នុងសង្គម បើមិនដូច្នះទេកម្លាំងកងអាវុធហត្ថនឹងធ្វើការបង្ក្រាបយកទៅព្រមានអប់រំ ក៏ដូចជាចាត់វិធានការតាមផ្លូវច្បាប់ ជាធរមាន ផងដែរ។
សូមជម្រាបថា បន្ទាប់ពីមានប្រជាពលរដ្ឋបានផ្តល់ព័ត៌មាន តាមរយៈ លេខទូរស័ព្ទបន្ទាន់ ១២៩៦ របស់កងរាជអាវុធហត្ថ ដើម្បីសុំកិច្ចអន្តរាគមន៍លើករណីក្រុមក្មេងទំនើង នៅវេលាម៉ោង ១៦និង៤០នាទីល្ងាច ថ្ងៃទី២១ ខែកក្កដា ឆ្នាំ២០២៦ កម្លាំងអាវុធហត្ថស្រុកជីក្រែង ខេត្តសៀមរាប បានចុះធ្វើការបង្ក្រាបក្រុមក្មេងទំនើង បានចំនួន០៨នាក់ រួមទាំងម៉ូតូចំនួន ០៣គ្រឿង ដែលបានធ្វើសកម្មភាពបង្ហោះម៉ូតូ បង្កឱ្យមានការរំខានដល់ប្រជាពល រដ្ឋធ្វើដំណើរតាមដងផ្លូវ និងបង្កឱ្យបាត់បង់សណ្តាប់ធ្នាប់សាធារណៈ នៅចំណុចទួលព្នៅ ស្ថិតក្នុងភូមិកំពង់ក្ដី១ ឃុំកំពង់ក្ដី ស្រុកជីក្រែង ខេត្តសៀមរាប។
ប្រភពបញ្ជាក់ទៀតថា ជាវិធានការរដ្ឋបាល ម៉ូតូទាំង ០៣គ្រឿងត្រូវបានដកហូតរក្សាទុកជាបណ្ដោះអាសន្ននៅមូលដ្ឋានកងរាជអាវុធ ហត្ថស្រុកជីក្រែង។ ហើយអាជ្ញាធរអំពាវនាវដល់យុវជនទាំងអស់ សូមបញ្ឈប់រាល់សកម្ម ភាពទំនើងដែលនាំឱ្យប៉ះពាល់ដល់ការសិក្សា បំផ្លាញទ្រព្យសម្បត្តិ និងកិត្តិយសគ្រួសារ បង្កការភ័យខ្លាចដល់អ្នកជុំវិញ ក៏ដូចជាបង្កភាពអនាធិបតេយ្យក្នុងសង្គមផងដែរ ៕
ចែករំលែកព័តមាននេះ