អាសូរ! បុគ្គលិកធនាគារ១រូប ជួបគ្រោះអកុសល នៅផ្លូវជាតិលេខ៣
- ភ្នំពេញ
រាជធានីភ្នំពេញ ៖ បុរសជាបុគ្គលិកធនាគារអេស៊ីលីដាម្នាក់បានជិះម៉ូតូវ៉ាជែងកង់បីជ្រុលទៅបុករថយន្តសណ្តោងកុងតឺន័រដែលឈប់ចតលើផ្លូវបណ្ដាលឲ្យជនរងគ្រោះដួលបោកស្លាប់យ៉ាងអាណោចអាធ័ម នៅវេលាម៉ោង១០និង២០នាទីយប់ ថ្ងៃទី២២ខែកក្កដាឆ្នាំ២០២៦ ទល់មុខភោជនីយដ្ឋាន សម្រស់ទួលកី ផ្លូវជាតិលេខ៣ ភូមិទួលកី សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ ។
ជនរងគ្រោះ មានឈ្មោះ ស៊ីវ ចន្ថា ភេទប្រុស អាយុ៤៦ឆ្នាំ មុខរបរបុគ្គលិក ធនាគារអេស៊ីលីដា ស្នាក់នៅបុរីពិភពថ្មីគំរោង១ សង្កាត់កំបូល ខណ្ឌកំបូល ជិះម៉ូតូម៉ាក HONDA GIORNO ពណ៌ស 1KU 8446 ជាមធ្យោបាយ ។
ប្រភពព័ត៌មានបានអោយដឹងថា មុនពេលកើតហេតុ គេបានឃើញបុរសម្នាក់បើករថយន្តសណ្តោងកុងតឺន័រ ម៉ាក hyundai ពណ៌ស ពាក់ស្លាកលេខ កំពង់ស្ពឺ 3A 6676 បានបើកឈប់អែមកៀនផ្លូវ តាមបណ្ដោយផ្លូវជាតិលេខ៣ទិសដៅពីជើងទៅត្បូង ហើយអ្នកបើកបរ បានចុះទៅញាំបាយឆានៅក្បែរនោះ គាប់ជួនពេលនោះ ស្រាប់តែបុរសរងគ្រោះបានជិះម៉ូតូម៉ាក HONDA GIORNO ពណ៌ស ធ្វើដំណើរក្នុងទិសដៅស្របគ្នា ហើយបានវ៉ាជែងកង់បីមួយគ្រឿងខាងស្តាំដៃ ធ្វើអោយម៉ូតូជ្រុលទៅបុកពីក្រោយរថយន្តកុងតឺន័រទាំងកំរោល បណ្ដាលឲ្យម៉ូតូខ្ទេចស្រុញផ្នែកខាងមុខគាប់ជាប់កន្ទុយរថយន្តកុងតឺន័រ និងធ្វើឲ្យមនុស្សបែកក្បាលហូរឈាមស្លាប់ទាំងមួកសុវត្ថិភាពយ៉ាងអាណោចអាធ័ម ។ ដោយឡែកខាងរថយន្តវិញ អ្នកបើកបរឃើញហេតុការណ៍បែបនេះ ក៍បានគេចចេញទៅបាត់តែម្ដង ។
ក្រោយកើតហេតុ សមត្ថកិច្ចបានធ្វើលិខិតប្រគល់សពអោយសាច់ញាតិយកទៅធ្វើបុណ្យតាមប្រពៃណី ចំនែកមធ្យោបាយទាំង២ ត្រូវបានសមត្ថកិច្ចជំនាញចរាចរណ៍វាស់វែងយកទៅរក្សាទុកនៅការិយាល័យនគរបាលចរាចរណ៍ផ្លូវគោករងចាំដំណោះស្រាយនៅពេលក្រោយទៀត ៕
ចែករំលែកព័តមាននេះ